Tipa MADC Complex liata 72nd Indian Republic Day ahmâpa a châ

 

TIPA, 26 Nawh, 2021 – Atano my dawh 11:00 Am liata a ei kha nawpa ta MADC Complex tlyhmia, Tipa liata a ei kha nawpa ta 72nd Republic day of India alyna Programme ahmâpa a châ.

 

Daihti hmiatuapa liata Chief Guest Puhpa K. Chhuabei, EM i/c PWD etc. MADC ta Indian National Flag parai ta, he khai tawhta National Anthem (Music) play pa châ ta, Chief Guest ta biereina ta a pazi.

 

Chief Guest Puhpa K. Chhuabei, EM bierei tlâhpi viapazy:- 

 

“MADC Opipa sâ 2-na yna su Tipa khih liata atanoh Indian Republic Day ei 72-na ahmâ thei awpa ta daihti phapa miah pie tuhpa eima Khazohpa hnoh ta alynabie reih na ta, he su liata Programme avaw hlao theipa zydua nata COVID-19 Pandemic vâta he su liata avaw hlao thei leipa zydua hnoh ta chhao Republic Day – 2021  anaohna Samaw, zana chôta cha hlâ ei na ta, alykheina nata khokheina ei cha hlâ chyu ei.”

 

“Târi 26 January, 1950 noh he India châta cha noh peimawh ngaita pa, eima my thei lei awpa noh a châ; he noh he ta Indian Constitution cha hmâ pathaopa vaw châ ta, he noh he India chyhsa zydua châta cha eimâ lyna noh nata ryureina ei hrâhpa hnei thei awpa ta biehneina eima vaw hneina noh a châ.”

 

“Republic Day – January 26 he India ta dâhpipa eima vaw hmâ pathaona pahno thlâhna châ ta, sasyh ryu arei theina awpa ta a kô pipa sâ 3 - Legislature, Executive nata Judiciary zy eima vaw hneina noh a châ. Republic Day alyna hmâpa he ta India ta khotalaina a hnei thei nawpa nata atanoh taihta â boh kawpa ta eima y thei nawpa ta a vaw hriapasa tuhpa zydua eimâ theih heih awpa apeimawh kaw.”

 

“India ta dâh pipa vaw hmâpa ta sasyh dâh atao theina a vaw hnei hana zawhzi ta keimo Marasawzy chhao vâhnei chhih kawpa ta Abeipa ta eima râh nôpaw hmiatuapazy hmâpa ta sasyh ryu arei theina hmiatuapa Pawi-Lakher Regional Council vaw hnei pi ta, Lai nata Mara zy he eima taozie nata chei-o zy alyuna hluhpi hnei hra sala chipho hropa eima châpa ta pahnopa a châ vâta eima nôpaw hmiatuapazy ta ryureina eihrâpa hnei awpa pha vaw tah ei ta, Marasaw châta kao nano nanopa liata hmah vaw la lymâ ei ta, Mara Freedom Party zy chhao ama vaw paduapa a châ.”

 

“Âmo zy ta Mara chipho kyhpachâna chôta riahpha kawpa ta keih ama chakâ lymâna zawhzi nata ama hriasapana zawhzi ta Marasawzy ta ryureina eihrâhpa chaba hra awpa ta Autonomy Biehneina piepa eima vaw châpa he aly â chhih hmeiseih. Atanoh Marasawzy ta eikha nawpa ta Republic Day eima hmâna daihti liata eima nôpaw hmiatuapazy athei pi ta, zana nata palyupalihna chhao eima hlâ hmeiseihpa a châ.”

 

“Mara Autonomous District Council piepa eima vaw châ daihti liata Mizoram cha Union Territory piepa châ hra ta. Kô 1986 liata Mizoram cha Union Territory tawhta State lâta kiasâh via heih ta, keimo deikua eima duahmo a olopa ta a vaw y.”

 

“He daihti lia he ta Mara, Lai nata Chakma Autonomous District Council liata Member zy cha Mizoram State MLA nah ryta liata y laihpa ta eima duahmo chhao â pahlie leipa a châ; a tliata tawh deikua eima râh luhpazy duahmo ahnai kawpa liata sopa a châ.”

 

“He kyh vâta zâhkô Indian Independence Day chy liata duahmo asâh viapa liata so awpa ta eima hiapa cha atanoh taihta hlaotlohna y leipa ta, chavâta atakô Republic Day he ano-eihta hmâ awpa ta Executive Committee ngâlâh dei châ leipa ta eima NGO laichaipa MTP, MSO nata MCHP General Headquarters nopawpazy chhao ta Meeting liata reipahmohpa ta eima vaw pathlupa a châ.”

 

“He kyh liata NGOs nata Mararâh zawpi zy deichhyna nata tha patlôna reikah thata dao pi ta, Awnanopazy chhao ta thlah miah ama chhâkhei lymâ vâta MADC Executive Committee vyuhpa nata Marasaw zydua vyuhpa ta alynabie ei reih hmeiseih.”

 

“Marasawzy pi he Khazohpa photlypa eima châ tah lei thai pa châ vei; nohtla beileina râh tahpa ta ama reipa London khihpi tawhta Khazohpa ta Rev. RA. Lorrain nah nôvah miah kaw tuapa ta, eima Mararâh, râhzohpa cha miah pakhaihsa ei ta, Awnanopa miah ama paduapa hleikhô ta Mara reih, châropa miah taopa ei ta, Marasawzy ta hmialâ daihti liata kuphei ta eimâ dua thei hra nawpa tahpa ta Ryureina eihrâhpa eima hnei thei nawpa ta lâpi miah pahmôtuhpa chhao ama châ. He tlupo ta Khazohpa ta kyh miah pachâ ta, kô 100 hleita vaw sie chy hra sala, atanoh he TV liata eima hmô tyhpa Motor zy cha keimo tlai ta kiah ha bâ hra pi ta, chahawh pyly ta Computer nata Mobile phone zy chhao, nôpaw nata saw a hriapasana viapazy ta cha chalei nawpa sôhzy apachô laihpa ta keimo Marasawzy tlai ta eima vaw hnei thei lymâ haw. He zydua he Khazohpa ngiachhiena vâ deita na a châ tahpa eima my lei awpa apeimawh hmeiseih.”

 

“Khazohpa ta Rev. RA. Lorrain hmâpa ta Mara reih miah a piepa chhao a roh thaipa nata a cheih thaipa Marasaw châ eimâ chhuah chyu awpa chhao apeimawh ngaitapa ta ei pahno.”

 

“He Marapa chipho he alei pathlei lei nawpa ta Mara reih hnei pi ta, chi nata pho ta miah tao tuhpa chhaichhi peimawh kawpa cha reih a châna hawhta Mara reih he eima thai chyu awpa apeimawh ngaita. Atanoh liata he hawhta Republic Day ano-eihta eimâ hmâna chhâpa chhao chipho hropa châ pi ta, ryureina eihrâhpa ahneipa eima châna pamosana chhao a châ thei hra aw. Chavâta Mara reih he cheih lymâ si la, eima chheipâh liata Mara reih athai leipazy he pathaisa achhuah si la, athai thlâhpa, acheih hluh leipazy ta chei hluh via lymâ achhuah ei suh u.”

 

“Achhâ chaina lia ta ei rei khoh awpa deikua, Marasawzy pi he, eima mahnô mahpaw chhâ daihti tawhta reiraoh kawpa, keimo lâ ta a vaw lie pakhua heih awpa hnabeiseihna hneileipa ta tha nata zâh i leipa ta ku riaphapa, tlâhrai siaria lia chhao ta reiraoh kawpa eima châpa kha, atanoh Republic Day eimâ hmâna noh lia chhao ta eima my lei awpa ta ei rei khoh ngaita. Eima mahnô mahpaw hmopha taopa nata hriapasanazy kha my leipa ei si la, thisaih ta ama chaleipa Mararâh he keimo Marasawzy pi ta eima pabohsa awpa nata eima palaiseihsa awpa peimawh ta, atanoh liata eima reiraohpa hawhna he ta eima râh nôpawzy, eima Awnano nôpawzy nata eima NGO leader zy ta ‘he lâ sy’ ama tahpa maih liata reiraoh kawpa ta keih chakâ lymâ awpa ta cha hrua ei na ta, ei châ haw ei. Ei châ ly kaw ei.”

 

Chief Guest ta daihti eihrâhpa hmâpa ta Republic Day alyna châta National Flag paraina nata Biereina ahnei khai tawhta Tipa-I biatuhpa Puhpa FC. Lawmkima,EM i/c E & F, Tipa-II biatuhpa Puhpa K. Siakhai, Adviser to CEM zy ta biereina chyupa hnei chyu hra ei ta, Laihsa Jessica B. Khuhly, Laihsa Jevis Beireizi, Laihsa Cindy Lynapawpi zy ta mo pakha ta hla ama sa chyu.

 

Daihti chhâna lâ liata Puhpa T. Seido, MDC, Laki biatuhpa ta alynabie reina daihti hmâh ta, Machâ NG. Khôsa, ECM Local Church: Tipa Vaihpi ta Khazohpa lâ alynabie reina thlahchhâna a hnei khai tawhta 72nd Republic Day alyna programme he pachhâsapa a châ.

 

Puhpa K. Chhuabei he Puhpa P. Tluasa, SE, PWD nata Puhpa Beirokhu Beita, I & PO zy ta zi ei ta, MJA Siaha tawhta Puhpa Jeffrey Khara, Editor, Moonlight ta a zi hra.

 

ISSUED BY:-

Information & Public Relation Department

Mara Autonomous District Council

Siaha.