MADC ta 72 Indian Republic Day ahmâh

 

SIAHA, 26 Nawh (January), 2021 – Atanoh my dawh 10:00 Am liata Puhpa N. Zakhai, CEM, MADC ta MADC tlyhmia liata Indian Republic Day alyna châta Indian National Flag a parai.

 

Puhpa N. Zakhai chata Indian flag a parai khai tawhta biereina hnei pazi ta, Marasaw, chi nata pho ta miah padua tuhpa Khazohpa hnoh ta alynabie a reih.

 

Puhpa N. Zakhai bierei tlâhpi viapazy:-

 

Râh châta ei hrialâhpa zydua nata atanoh Indian Republic Day ei 72 na aly awpa ta he su liata a hmaohpakhypa zydua hnohta alyna bie reih na ta, khokheina sâh chaipa ei cha hlâ ei.

            

India Republic day he Kô 1950 liata India dâhpipa, India Constitution eima hmâh pathaona alyna châta akô chareih ta, padai leita ta atanoh hawhpa Nawh Thlapa Târi 26 liata hmâh tyhpa a châ. India râh he eima pahnopa hawhta Bristish ryureina ry liata Kô 200 hlei a y tawhta Independent – khotalaina hmopa eima châ. Kô 1947, Thlazoh thlapa târi 15 liata India ta khotalaina a hmo tawh khata Kô 3 chhôh cha India râh avao ta chhihtha n’awpa ta Bristish sawhkhâ ta dâh a taopa, Government of India Act 1935 kha a rypaoh dâh hawhta pananopa ta India râh chhithatuhpa hmiatuapazy khata India râh kha ama vaw chhitha. Anodeikua cha râh hropa ta India râh chhitha n’awpa dâh ama taopa kha aphapa ta ama pahno leipa vâta Constitution Drafting Committee thlai paduapa cha ta, Dr.B.R Ambedkar kha Chairman ta raopa a châ. India râh dâhpipa taopa kha a rainao vei, Eima pahnopa hawhta India râh liata pahrâhpa photo, chito nata reihto, phôryhpa nano nanopa zyhpa zy châta dâh tao awpa cha hmo rairu ngâsâpa a châ. Châhrasala Dr.B.R Ambedkar tiamana nata hriapasana zawhzi ta India dâhpipa cha kô 1950 Nawh thlapa târi 26 liata hmâh thei awpa ta patlopa châ ta, he noh he India Republic Day” tahpa ta phuahpa a vaw châ. Republic of India tahpa y zie chaipa cha India râh liata pahrâhpa moto, chito, photo he ahy bei, ahy pho, ahy chhôhkha ry liata hmâhta y khao ma pi, moto he châna nata tovyuh, duahmo nata ryhpaohna alyuna nata a khopa hneipa, khotalaipa sai eima châ, tahna a châ chai. India râh he khotalaipa, photo apazao pakhypa, Union Republic of India eima châ tahpa he atanoh he su liata a hmaohpakhypa zy pita eima pahno chanei heih awpa apeimawh kaw. 

            

India râh khotalaina hmotuhpa India phozy paw (Father of the Nation of India) tahpa ta bipa, Puhpa Mahatma Gandhi khata India râh Sovereign Republic eima châna areipasiana liata cha “India râh he Sadô kawh ngâsâpa, a chhôh liata pawpi chi nano nanopa, apaw lai viapazy, apaw chyh viapazy, adih tlâ leipa ta ama Pawna Sadôh” tahpa ta reih ta, a reihpasia thai ngâsâ. 

            

Atanoh India râh liata eima Prime Minister Narendra Modi heta India Republic râh a châna apalâsa phakawpa ta ei pahno. Eima Prime Minister zachhihpa he eima pahno chyupa hawhta a hati nota cha “ Chaiwala, Thopi zuahpa hati châ ta, a pitloh tawhta India râh kawh ngâsâpa liata Prime Minister tlôh theipa a châ. He heta India râh liata pahrâhpa zydua pi he khotalaipa châna nata tovyuh, ryhpaohna alyupa hneipa sai eima châ, tahpa apalâsa ngâsâ.

            

Râh châta eima hrialâhpa zydua nata atanoh he su liata avy theipazy, nama pahno chyupa hawhta a kô hro zydua kha cha India Republic Day rohna ngâsâpa alyna he Siaha District Tlyliah liata a lohawh ngâsâpa ta Deputy Commissioner Siaha patohpatiana ry liata hmâh tyhpi ta, atako deikua cha leithei leina vâta nata eima chhihthatuhpa nata khitlâh nopawpazy ryhraona vâta ano eihta eimâ hmâh awpa avaw byuh haw. Achhâpa miano y ta, rei awpa kho achhihtu leipa rairie a châpa ta ei pahno. A sâkhana liata cha eima râh nôpawpa eima tly patlohpazy nata eima Officer zy châna nata duahmo, Order of Precedence ahnai ngâsâpa ta Mizoram Sawhkhâ ta khahlâ zydua tawhta atanoh taihta a sopa, ei hluhpi ama ngiachhiena hiapa ta eima daoh tawh chhaota uasa hlao leipa pi ta, ama nah ama chahu raruah lymâpa, eima kho leina nata nô u reina palâsana ta atanoh he, he su, MADC Office Complex liata hmâhpa eima châ. Zakô India Independent noh chhao kha helia pyly ta India Independence Day kha hmâhpa eima châ. Eima hmo hiapa nata ahnawpa he hlao maniah ama patloh awpa a châ.

            

Asânona liata cha Potlana hri, Covid-19 tawhta eima boh thei n’awpa ta sawhkhâ luhpazy ta sukha liata chyhsa hluhpi apahmaoh awpa ama paryhsa leipa vâta nata ahniatu tlâ lei awpa ta biepiepa kha zyh lymâ chyu awpa a châpa vâta he su liata a hmâhpa eima châ.

            

Râh châta ei hrialâhpa nata ei chi heihpazy, atanoh India Republic Day alyna liata ei rei khoh heihpa cha, India chyhsa eima châpa eima vâhneizie nata India ti nata râh chyhsa eima châna hawhta keimo kuphei ta aduah theipa chyhsa tiamapa nata ngâchhihpa, ti nata râh chyhsa phapa, reingiahpa nata dâh nata phoh zyhpa pho châ awpa ta ei châ haw chanei ei.

            

Tloh leikawna chôta keima nata râh châta ei hrialâhpazy ta sawhkhâna eima siekhei rakha tawhta District Conucil chhôh liata hmâhsiena vaw tlopa rei pahlao awpa aphapa ta ei pahno. 

 

1. Kô kha hlei khô hapa 2015 tawh khata a chuhaipa Central nata State liata UPSC nata MPSC Preliminary Exam pass pazy cha Incentive Cash Award – UPSC Rs.100000/- (Rupees One Lakh) nata MPSC Rs.20000/- (Rupees Twenty thousand) pie lymâpa a châ.

 

2. Union Minister i/c Sports, atliata liata miah akaw tly no khata Sport Complex pitlohpa miah taopa awpa akhona miah chhota, he châta râh kawh ngâsâpa Chhatlâh liata chaleipa a châ. He he a pitloh thei khiata la eima thyutliapazy ta ataopasuana khizaw liata atlô ngâsâpa ta nie ama tlua thei hra aw tahpa hnabeiseihna lai ngâsâpa eima hnei. He su lia pyly heta Solid Waste Management châta râh piepa châ ta, Solid Waste Management project he hlao tloh awpa ta hnabeiseihpa a châ hra.

 

3. Atahma he Sixth Schedule Amendment eima hiapa kha ahmao pabyuh daihmâ hapa ta pahno pi ta, eima tha apawh ngâsâ. Biehneina laipa eima hiapa he Mara râh liata Political Party to nata Mara râh zawpi ta palohraoh ngâsâpa ta eima hiapa a châ. Atahmâ he eima nôpawpa Puhpa M.Laikaw MDC, Puhpa MH.Tiabi EM nata Satlia Delson Notlia zy ta Central Minister zy adaohpa ta Delhi liata ama châh hai. Ama châta thlah chhâkhei awpa ta atanoh he liata ahmaoh pakhypa nata Mara râh zawpi zydua hnoh ta ei châ haw ei.

                        

Achhâ chaina liata cha atanoh taihta eima râh nata a chhôh liata pahrâhpazy aboh ngâsâpa ta miah chhithatuhpa Abeipa hnoh ta alyna bie eima zydua vyuhpa ta reih chanei na ta, nama zydua hnoh ta khokheina sâh chaipa ei cha hlâ chanei ei.

                        

Ei châ ly kaw ei,  Jai Hind.

 

MADC ta he hawh ta anoeihta eimâ hmâna chhâpa cha Mizoram sawhkhâ ta Warrant/Order of Precedence a taopa liata CEM, EM nata MDC zy duahmo ahnai kawpa liata ama sopa pasâh via awpa ta hiapa hlaotlohna a y mâh vei vâta a châ.

 

Covid-19 vâta Republic Day alyna liata chyhsa hluhpi hrua thai’pa châ lei ta, Official thokhazy, Ex-MLAs, Ex-MDCs, Presidents, All Political Parties, Siaha District, ECM (Hqrs) tawhta Senior Executive Secretary nata Moderator zy hruapa châ ei ta, MTP, MSO, MCHP General Headquarters President & General Secretary, MJA Siaha zy dei hruapa ama châ. Seat arrangement liata Social distancing taopa châ ta, avaw hlaopa zydua Face Mask amâ pahly (ky) khai.

 

ISSUED BY:-

Information & Public Relation Department

Mara Autonomous District Council

Siaha.