PRESS RELEASE No.4/2021

SIAHA, 14 Nawh, 2021 - Atanoh dawh 2:30 Pm kha ta Puhpa N. Zakhai, CEM, MADC ta ano official chamber liata MJA (Mizoram Journalist Association), Siaha District member zy apakyhna hnei ta, atakô 2021 aly kawpa ta eima tlô thei vâta kôthiehpa anaohna nata thopi dolâh-na a hneikhei ei.

Puhpa N. Zakhai chata biereina chyupa hnei ta, MADC sawhkhâ he MJA Siaha District nahta apha kawpa ta vaw hrialâh tyh ta, eima kho chaipa cha Mararâh hmah pasiesa awpa achâna hawhta MADC chhao MJA chhao, he kyh liata tiama papua via lymâ awpa apeimawh zie reih ta. Kô 2020 liata kho akhi leina a y hapa chhao ta atakô 2021 liata zôpha viapa ta Mararâh châta hria awpa ta MADC ta â chhuahna hawh ta MJA Siaha District chhao Mararâh chata tiama kawpa ta hria awpa ta ahaw ta, a pasyu  hra ei. 

COVID-19 Pandemic vâta khizaw pi ta economy liata rairuna  atyh hai ta, India sawhkhâ chhao ta rairuna â tyh ngâhaipa hawhta Mizoram sawhkhâ chhao rairuna thata atyh ta, keimo Mizoram State liata ADC zy chhao hlao (Salary) tah deileipa ta cha rai hria nawpa (Non Salary) sôh he October 2020 tawhta vaw tlô khao leipa ta, chavâta MADC chhao ta rai hria nawpa kyh liata rairuna â tyh zie reih ta, he sôh he miah pie patoh awpa ta Mizoram sawhkhâ lâta ahawna chhao ama tao zie a reih.

He hawhta rairuna a y ngâhaino ta Mararâh liata Awnanopa zy, NGO zy nata MJA Siaha District tawh hleikhô ta Mara zawpizy tawhta thlahchhâkheina zy, thapatlôna reikah zy nata deichhyna hmia khochhih kawpazy ama hmô lymâ tyh vâta alynabie reih ta, atakô 2021 liata Mararâh châta apha kawpa ta hriapazao awpa amâ chhuah zie a reih.

COVID-19 Pandemic hry ta Mararâh châta biehneina sâh viapa hia ngâhaipa alaichadai awpa ta Puhpa MH. Tiabi, EM i/c LAD, Puhpa M. Laikaw, MDC & President, BJP Siaha District, Satlia Delson Nôtlia, State Secretary nata Vice President, Central Schemes Monitoring & Vigilance, Mizoram zy cha atahmâ he Delhi lâ ama sie ngâhaipa thâtihzy reih ta, hlaotlohna khochhih kawpa ama vaw hmô thei nawpa ta thlahchhâ bao awpa ta ahawna a tao hra.

Atanoh liata a hruanazy pachâ peimawhpa ta avaw hlao theipa MJA, Siaha District member zydua hnoh ta alynabie a reih.

He daihti liata Puhpa N. Zakhai, CEM zachhihpa chata Puhpa Jeffrey Khara, Editor, Moonlight ta BA (IGNOU) a vaw pass pa cha â lykhei zie reih ta, kô 50 hlei uhthei hapa khô lâ ta he hawhta BA zy a vaw tao hoh thlâpa he Marasaw thyutliapazy pahaona pha kawpa a châ hmeiseih tah ta, â lykhei zie pamosana châta ryuchâ (Citation) nata phusâ Rs.3,000/- hlâna a hnei pâ hra. Pihnô S. Lalmuanpuii, Dy. Secretary (Fin. & Accounts) chhao ta alykheina châta hmosai piepa a hlâ hra.

MJA, Siaha District Member tawhta Puhpa M. Baithai, Editor  (Chhim Aw), Puhpa B. Dawpho, Editor  (The Times of Maraland), Puhpa Jeffrey Khara, Editor   (Moonlight), Puhpa CZ. Hluna, Stringer   (DDK), Puhpa V. Pawhla, Editor   (New Skylink Vision) zy ta avaw hlao thei ei ta, biereina chyupa nata atakô chhôh liata MJA Siaha zy ta MADC tawhta ama hnabeiseihpazy reina ama hnei.

He thopi dona liata  Puhpa K. Hrahmô, EM (i/c Edu. etc.), Puhpa K. Chhuabei, EM (i/c PWD etc.). Puhpa K. Siakhai, Adviser to CEM zy a hlao thei hra ei ta, biereina chyupa ama hnei chyu hra.

Official lâta hrua eihpa Puhpa K. Chhihrau, Secretary(Leg.), Pihnô S. Lalmuanpuii, Dy. Secretary (Fin. & Accounts), Puhpa Beirokhu Beitâ, I & PO zy chhao amâ hlao hra.

ISSUED BY:-

Information & Public Relation Department

Mara Autonomous District Council

Siaha.