49th District Council Day liata Puhpa N. Zakhai, Hon’ble CEM, MADC Bietapa

 

SIAHA, 29, Pachawh, 2021, Pobienoh - Ahmiatua ta Mara Autonomous District Council Day (MADC) ei 49-na eima vawtlô theipa vâta eima Khazohpa lâ alynabie reih na ta, cha raohpa ta Mara zawpi zydua hnoh ta MADC Day 2021 anaohna Samaw ei cha hlâ ei.

 

Atanoh he Marasawzy pi ta, MADC  châta avaw hriapasatuapazy, eima Chi nata Pho thapasapa nata kyhpachâpa ta keih avaw chakâ lymâ tuhpa zydua my leipa ta khâ eimâ thei awpa a peimawh ngaita.

 

MADC he târi 29th Pachawh 1972  pa liana khata hmôpa châ ta, MADC he ta chyhsa zydua châta byhnâ châ khai thei hra vei sala, kô 49 chhôh a vaw sie hapa liana heta eima râh châta hmahsiena thata tlôkhei ta, Marasaw eima vâhnei zie nata Abeipa ta kyh maniah a pachâzie he pahno thaipa ta, eimâ ly ngaita awpa a châ.

 

Ahy hriapasana nata novâhna tlyma, siana nata thai-sona vâta châ leipa ta Abeipa eima Khazohpa ngiachhiena nata kyhpachâna vâ dei ta Chi nata Pho ta rei tlâh châ leipa Marasawzy cha Rev. RA. Lorrain nata a chhôhkhazy hmâpa ta Thâtihpha ta maniah kaw pakhaihsa ta, kao hluhpi liata byhnâ thata dao lymâpa ta, he MADC chhao he a hmô theipa eima châ tah lei thei va na; a rôhna ngaita.

 

Kô 2022 liata MADC kô 50 a tloh-na (Golden Jubilee) eima kaw tlô bâ awpa châ ta, he daihti liata rairunazy a y leipa ta a châ khiah eimâ phana rakha liata a rônah thei chaina hawhta hmâh awpa ta apachhuahpanoh ngâhaipa a châ.

 

Atahmâ ta MADC sawhkhâna a sie ngâhaipa 11th Term (2017-2022)  he, â thaona tawhta atanoh taihta rairuna nano nanopazy nata COVID-19 hripipa zy ta tha ta miah tlôthlupa ta, maniah patypamâ lymâ ta, he hawhta rairuna a y ngâhai no ta kô 4 chhôh tlai Abeipa ta miah chhihtha ta, Officer nata Staff zy hriapasana nata tiamanazy vâta a châ tah lei thei vana; he zydua he eimâ hriaparaohna a pha vâta a châ; atanoh liata eima MADC duahmo, a ei pachaipa ta Office chhôh âmohôhna nata zawpi châta rai eima hriapazy mopa ta, kô a sie chieh hapazy nahta khopathliahpa ta cha hmahsiena thata eima hnei lymâ; he kyh liata eima Officer nata Staff zydua hnoh ta chhao alynabie reih na ta; a taopathi via awpa nata hriapasa via awpa deikua eima hnei hô lô; cha kyh liata ti nata râh châta nata eima tusaw nata chhâ a vaw y awpa zy châta tahpa ta tiama papua via lymâ awpa ta, atanoh MADC Day ei 49-na atyhna noh liata eimâ haw chanei.

 

Kô 2019 liata hmôpa COVID-19 hripipa ta kô 2020 kô thaona tawhta atanoh taihta miah pabua ta, vâhnei chhih kawpa ta eima Mararâh lia deikua hri a ohpa hluh lei pi ta, he he Sawhkhâ nata zawpizy hriaparaohna vâta nata zawpi zy reingiana nata âsohsina vâta a châ; he hlâta âsohsi via lymâ awpa peimawh ta, sawhkhâ ta dâh nata phôh a taopazy zyh lymâ awpa ta eimâ pasyu hmeiseih.

 

Atahmâno he Mizoram State pôpalôhpa ta meikâpa ta miah pabua ta, eima Mararâh lia cheingei chhao, thokha cha amô azia leipa ta meikâpa pachhaipa ta khih apadeipazy ama y; ama hriapasanazy pahno pi ta, eima reithai hmeiseih. 

 

He hawhta a châ no ta meikâpa â vaw thaona dâh deikua sisaw leipa liata a châ khoh kaw. Râbaoh asiepazy ta eima sohsi awpa peimawh kaw ta, O lâ liata chhao eimâ sohsi awpa apeimawh ngai ta. Sawhkhâ ta ti nata mei tawhta avaina châta pachu pahreina nata dâh nata phôh a taopazy he, keimo zawpi ta eima zyh leipa ta a châ khiah hraoleipa dei a châ. Chavâta eima O lyu nata râhmâhpa zydua, ti nata mei tawhta â boh thei nawpa ta keimo mo pakha chyu liata maohphaohna â pahnieh tahpa pahnona chô ta asohsi chyu awpa ta eimâ pasyu hmeiseih.

 

Mararâh he keimo Marapazy eih, eima râh a châ, a chhôh liata a y pa zydua; Mara reih, aleilô nata abie hneina zydua chhao keimo eih sai a châ. Kyhpachâna chôta mohôh, pabohsa ta cheih-chalo lymâ awpa chhao eima tao awpa hialia a châ hra. Mararâh khôtho lâta a y pa zydua chhao ta, cha cha pahno thaipa ta eima râh thapasana ama hnei via lymâ hra awpa nata Mara reih chhao ama thai lyhlia awpa a peimawh ngaita. Chatanachata Marasawzy cha khataih lia rai y hr’aw ei sih la, apôhkha ngaitapa ta hmahsiena phapa liata eima laiseih lymâ aw.

 

Marapazy pi he Abeipa ta eima chhâh maniah châ lymâ aw ta; Mararâh he Pho hropazy ta maniah dihsao awpa nata maniah ama parao-pakei awpa rai pasaih aw ma pi.

 

Mara râh liana heta aryhna nata hmahsiena khochhihpa vaw charei lymâ mawh sy.

 

Ei châ ly kaw ei.

 

ISSUED BY:-

Information & Public Relation Department

Mara Autonomous District Council

Siaha.