PRESS RELEASE No.20/2021

Siaha, 19 Pamih, 2021 - Zâhnia (18 Pamih (March) 2021) zâ dawh 7:00 Pm pa ta Meisavaih MTP Hall, Siaha liata 1st Inter Village Football Tournament 2021 cha Chief Guest Puhpa N. Zakhai CEM MADC ta a pahy.

Pahyna Programme he Puhpa Khusa Khaila, Hon. Secretary, SDFA ta chhihtha ta, Puhpa T.Vabeichhuakhu, Vice President, SDFA ta Devotion hmâh ta, Puhpa N. Beikhochhi, Secretary, Org. Committee ta report pie ta, Pihnô Vasty Azyu ta mo pakha hlasapa ta zawpi avypazy a palôhpahawh.

Chief Guest Puhpa N. Zakhai CEM MADC bie reina chyupa daihti a hmâpa liata a bierei tlâhpi viapazy:-

Ahmiatua ta daihti nata tlâna phapa maniah pietuhpa eima Khazohpa hnohta alyna bie reih na ta, eima E.M i/c Sports & Youths, Puhpa Beirahmô Syhly,   SDFA (Siaha District Football Association) nata Siaha District Joint Village Council - zy nama saiheina eina patosapa vâ ei chi ta, palôh hmeiseihpa  ta châly ei na ta, Maraland Cup - 2021 moh ta Samaw ei cha hlâ ei.

First Inter Village Football Tournament ahlao awpa ta Siaha khih khôtho lâ tawhta a vawtlô pakhypa zydua he Tournament daihti he aly kawpa ta hmâ chyu awpa ta khokheina cha hlâ ei na ta, he tournament vâta palôh âpasasa pathleinazy y lei awpa ta hnabeiseihna ta, a vawtlô pakhypa nata apachhuapanohtuhpa zydua alypa nata hlaotloh kawpa ta daihti hmâ khoh chyu awpa ta khokheina ei cha hlâ  ei.

Pahno chyupa hawhta Covid-19 vâta eima râh lia chhaota Programme hluhpi chalihsapa ta vaw y lymâ chy ta, tahma he a zie y viapa vâta SDFA nata Siaha District joint VC zy ta hmah ama vaw lapa a châ. Aly â chhih ngâsa.

Thyutliapazy heta pari-panga theipa tawhta aboh lymâ pa ta, Sport chi nano nano pazy liata hmah ama sie lymâ thei n’awpa ta chhithatuh phapazy eima chahneipa he vâhnei a chhih ta, arôhna ngaita. Nama chôlia chhao ta alyna bie ei reih chanei hra.

Marasawzy he chyhsa chyhta châ hr’aw ei sihla, Achuna nata Sports liazy ta Abeipa ta byhnâ maniah apie khoh hmeiseih. Cha hawhpa byhna cha eima dao thai khiata cha Khizaw lia chhaota alâ pha awpa eima châ. Cha haino ta byhnâzy dao thai leipa ta, Marasaw Sport liata moh akaw lâ laih awpa ta ei hnabeiseih kawpazy thlaita ama chhichâna pahno khao lei awpa ta ama y tyhpazy deikua he pachâna tha ta eina pie. Sports lâta hmahsie lymâ ta, Khizaw râh hrolâ akaw lâ papua awpa ta cha Abeipa china chôta tiama papua ta, pari-panga theipa nata pa-ô pazypa tawhta asohsi awpazy he apeimawh hmeiseihpa a châ.

Vâhnei chhihkawpa ta eima pacha pha beih leipa ta eima râh nôpawpazy hriapasana zawhzi ta Abeipa byhna to pi ta, Tlyhlia (Artificial turf Field) pha ngaitapazy hmâ thei awpa eima vaw hnei haw. Aly â chhih hmeiseihpa a châ.   He Field heta eima thyutliapazy chhao Sport liata tha ta hmahsiena a pie hr’awna ta ei pangiasa. Chadei châvei; Thosai khih liata Sericulture Department, MADC râh chhao Boxing Training Centre châta pasaipa châ ta, thyutliapazy châta Boxing lâta hmahsiena tha ta atlôkhei na ta hnabeiseihna kha châ ei hnei hra. 

Siaha District Football Association nata Siaha District Joint Village Council zy, he liata avaw hlao theipa zydua Sports liata hmah eima sie via lymâ thei n’awpa ta hria paraoh lymâ awpa ta cha hrua ei na ta, ei châ hawh hra ei.

Ei châ ly kaw ei.

Puhpa N. Zakhai he Puhpa Beirahmo Syhly, EM i/c Sports & Youth Services, MADC, Puhpa T. Seido, MDC, Pihnô Patricia T. Azyu, SWO, MADC, Satlia Syuhlo Beichakhei Mara, CEM P.S, MADC nata Puhpa Pawsa Lava, AITO zy ta zi ei ta, Puhpa Beirahmo Syhly, EM a châ ngahaipa nata Siaha DFA liata President ta vote of thanks reihna hnei ta daihti pachhasapa a châ.

ISSUED BY:-

Information & Public Relation Department

Mara Autonomous District Council

Siaha.