PRESS RELEASE No.19/2021

SIAHA, 24 Hmypi, 2021 - Atanoh my dawh 11:00 Am pa ta MTP Amôtlâh Tlyliah liata Puhpa Thidaw Hlychho 'L' Memorial Football Trophy (Men) nata Pihnô   Nobao Hlychho 'L' Volleyball Trophy (Women) cha Chief Guest Puhpa Beirahmo Syhly, EM i/c Sports & Youth Services, MADC ta Ribbon chakiepa ta a pahy.

Pahyna Programme he Puhpa H. Beiralua, President, MTP Sub-Headquarters: Amôtlâh ta chhihtha ta, Rev. B. Lalhnema (ECM Pastor) ta Devotion hmâh ta, MTP Branch: Amôtlâh-I zy ta MTP lâ ama lâh. Puhpa H. Joseph, Secretary i/c Games & Sports, MTP Sub-HQ: Amôtlâh ta report pie ta, Puhpa A. Chhualai, Artiste ta mo pakha hlasapa ta zawpi avypazy a palôhpahawh.

He Tournament he MTP Sub-Headquarters: Amôtlâh ta a pachhuahpanohpa châ ta, MTP Sub-Headquarters: Amôtlâh ôna chhôh liata khih ypa - Amôtlâh, Thiahra, Tipi Ferry nata Riasika khih zy tawhta Team ataopa ta pua chyu ei ta, Tisôpi nata Old Tisôpi zy chhao hruapa ama châna hawhta amâ hlao thei hra.

Chapaw châta Football, Chanô châta Volleyball pachhuahpanohpa a châ. Football Team 14 châ ei ta, Volleyball Team 9 ama châ. Atanoh târi 24 Hmypi, 2021 pa ta pathaopa châ ta, târi 27 Hmypi, 2021 (noh 4 chhôh) liata pachhâ thei awpa ta apatohpatiapa a châ. 

Chief Guest Puhpa Beirahmo Syhly bie reina chyupa daihti a hmâpa liata a bierei tlâhpi viapazy:-

1. Puhpa Thidaw Hlychho & Pihnô Nobao Hlychho Memorial Trophy pachhuahpanoh tuhpa Organising Board,  a sôh nata thih zy sponsor tuhpa Puhpa RC. Beilaizi Bohia, atanoh liata avaw hlao theipa Puhpa Thidaw pathla zydua nata Siaha lâ tawhta kei nâ vaw zipa zydua chô lâ liata alynabie reih na ta, he su liata nô nata paw, hawti alai achyh nata player nah zydua hnoh ta chhao alynabie ei cha hlâ hra ei.

2. Memorial Tournament a châna hawhta chhôhkha châ nata khitlâh zawpi châ chhao palôlie achhih ta, hiakha lâ deikua thyutliapazy saiheina vâta he hawhta Tournament pachhuahpanohpa a châ tahpa players nata he liata avypazy ta eima pahno awpa ta ei reih khoh kaw.

3. Atanoh liata eimâ taopasua awpa he eimâ patohpatiana (preparation) apha nahta pha lei cha a field liata âlâ awpa a châ. Thyutlia nah pi he tournament a y nahta ngâlâh exercise zy la hoh pi ta, tournament avaw y khao lei nahta (exercise) la hoh khao lei pi ta, tournament avaw y nahta deikua cha  field chhôh angia ngiathia awpa khoh pi ta, eimâ ngiah nahta deikua daihti chhao pachhâ thei leipa ta thachhâpa zy y thlâh tyh pi ta; he he atanoh eima nôpaw nah ta tournament miah ama taopa tawhta ataopathi ta, eima sapa hnatlâna - a fit-na phapa eima hnei awpa apeimawh na tahpa he atanoh tawhta palôru nama phaoh awpa ei khoh ngaita kaw.

4. Adâhtlâhpipa ta Marasaw he eima palôru lai ngâsâ ta, eima thathi ngâsâ heih tlôh ta; eima palôru lai kaw hrasala eima thahoh-na ta â vaw daih khao lei nahta tao thei thlâh awpa chhao ahmeiseihpa râh liata tao thei khao tyh ma pi. Cha cha khâpa vâta ma eima tah khiah eima thathina ta miah pahnie ha ta, khatinorai ta apahâ leipa ta hria hnolo awpa eima châ na tahpa kha a zâ my ha tyh pi ta, Sports tao awpa ta cha mydi zy thyu patoh byuh ta, mydi thyu ru kaw ta, kha zy kha vaw hoh khao lei pi ta, mydi thyu hoh pi vâ, exercise la hoh pi vâ eima tah thlâh khiah cha kheihawh Sports rai tao hra ei si la, akih tlô thai aw ma pi tahpa kha players zy ta eima pahno awpa a châ. 

5. Chavâta hlaotlohna to awpa ta cha tiama awpa apeimawh tahpa eima pahno awpa apeimawh. Hmisâ pha awpa eima khoh khiah lotion zy eimâ thu awpa byuh ta, vo panyu awpa ta cha ti zy asi hoh ta, lotion zy athu abyuh. Sports - Football/Volleyball thai awpa ta cha eima pôhpa â fit awpa byuh. A fit awpa ta cha heih zy ama thyu hlâta thyu tah, exercise eima la awpa abyuh. Cha hawhta châ awpa ta cha tiamana a byuh.

6. Eima râh economic duahmo â chu lei vâta kheihawh Sports rai backup tuh phapa hnei tyh lei pi ta, chavâta akih tlô arairu kaw tyh. Châhrasala atahmâ cha India sawhkhâ phana zawhzi ta akih tlô nawpa lâpi (chance) eima hnei.

Cha liata eima khitlâh nôpaw nahzy ta miah ama nahthlie thai awpa ei kho kawpa cha - eima thyutlia nah Sports vaw pahâh ei ta, Sports taona chhaichhi (Football boot etc.) peimawhpazy vaw hnei khai tyh vei ei. Keimo nôpawzy ta eima bao theina kao a ypa cha MGNREGS sôh hmôpa tawhta eima nohkha tha zy thyu pasaih ei si la, khih nata tlâh pha awpazy khoh pi ta, khih nata tlâh pha awpa ta cha Thyutlia he eima pha awpa byuh. Thyutlia zy pha awpa ta cha niedo liata ama y lei awpa peimawh tlôh ta. 

7. Atanoh eima râh liata thyutlia zy pi he ku raihriazy vaw thei khao lei pi ta, eima nôpaw zy ta miah dao tu ha ei chi ta, ku hriahria eima thai khao lei nahta cha tao awpa vaw hnei khao lei pi ta, eima y vaw ru ta, eima y avaw ru khiah cha hmopha leipa kha yru papai nawpa ta eima vaw hmâ tyh.   Thyutlia zy ta Sports eima tao hluh khiah sapa hnatlâna vaw pha aw ta, ku raihria hohna chance chhao â sâh kawpa a châ. Chavâta nô & paw zy ta eima sawnahzy Sports tao ama hoh daihti liata backup lymâ awpa ta eimâ haw hmeiseih. 

8. Thyutliazy chhao thatlô bâhseih sai châ pi ta, atahmâ chhâ raihria chhâ châ vei tahpa ta O liata mobile diepa nata pati niepa ngâlâh ta rai ta eima hneipa he eima bâsai bâ awpa apha kawpa ta ei pahno. Mobile die die die, pati nie miah vaw aw ei; âhmie a vaw chhie pâ nahta paphôh pâ tyh pi eima tahpa he Thyutlia zy ta bâsai bâ ei suh u. Chahleikhô tawhta eima nôpaw machâ râhsâ lâ liata âmo ta lyu tao ei, raihria chaimâh ei ta, keimo thatlô bâhseih O lia eimâ die thlâhpazy he âsu khao vei; "eima nôpaw ama thachhâ ha na, kei rai ei hria thei ha bâ na, keima ta ei hriapa he ei nô-paw paniesa bâ hra tua sa la" tahpa palôru he phaoh bâ ei si la tahpa he ei khoh ngaita kaw. Chalei khiahtala eima nô-paw nah miah hrolâh parei aw vei ei. 

9. Khitlâh liata sâ pawhpazy ama y khiah khitlâ nohâh a y. Sâpawhpazy ama y vei khiah khitlâh â huary kaw tahna a châ. Chavâta eima nôpawzy ama hro pareih awpa eima khokhiah thadâh kawpa ta eima pa-ysa byuhta, chahawh zydua hriaparaohna a vaw y khiah nôpaw chhao avaw ly aw ei ta, nâmo chhao nama hriapa nama nie khiah namâ ly aw. Kheihawh hmo rai tao si la, ngâchhih kawpa nata tiama kawpa ta eima tao khiah cha hlaotlôhna eima to aw.

10. Memorial miah pachhuahpanoh tuhpa Chhôhkha lâ tawhta nata Organising Board zy hnoh ta alynabie reih chanei na ta, eima râh thyutliazy hmahsie nawpa ta cha chyhsa hropazy chhao, eima hneina sôh zy eimâ vaw pasai via lymâ awpa ta eimâ hrua hmeiseih hra. Ei châ ly kaw ei. 

MTP Sub-Headquarters: Amôtlâh ta Puhpa Beirahmô Syhly nata avaw zipazy châta my pati châta Vao tihâh vaw sapa ei ta, Puhpa Beirahmô Syhly chata MTP Sub-Headquarters: Amôtlâh nôpawpazy hnoh ta alynabie a reih. 

Puhpa Beirahmo Syhly he Puhpa Beirokhu Beita, I & PO, MADC nata Puhpa Dr. Beizakaw Vyhtu, VO, MADC zy ta zi ei ta, I & PR Department nata Sports & Youth Services Department, MADC tawhta Staff thokhazy nata Puhpa A. Chhualai, Mara Artiste zy ta ama zi hra.

ISSUED BY:-

Information & Public Relation Department

Mara Autonomous District Council

Siaha.