Puhpa N. Zakhai ta 'CEM MADC Running Trophy 2021' closing ceremony ahmâkhei

 

SIAHA, 19 Hmypi, 2021 – Atanoh dawh 11:00 Am pa ta Siaha District Volleyball Association (SDVA) pachhuahpanohpa “Chief Executive Member, MADC Running Trophy, 2021” cha New Siaha East-II Volleyball Court liata akhawna ‘Closing Ceremony’ programme ahmâpa châ ta, he liata  Puhpa N. Zakhai, CEM, MADC cha Chief Guest châpa ta Progamme a hmâkhei ei.

 

Khawna programme he Puhpa PC. Lahmingthanga, Vice President, SDVA ta chhihtha ta, Laihsa Jenny Lalrinpuii, Executive Member, SDVA ta Devotion a hmâh. Puhpa B. Lalrokhawma, Sr. Vice President, SDVA ta Techinical report pie ta, Satlia Steve Azyu, General Secretary, SDVA ta alynabie reina daihti a hmâh.

 

Khawna Programme chyupa hmâ khaipa a châ tawhta Final Match (Chanô & Chapaw) akhai pazipa a châ.

 

Ary liata palâsapazy he Puhpa N. Zakhai, Chief Guest bierei tlâhpi viapazy a châ:-

 

“Puhpa Chairman nata SDVA chhituhpazy, he Trophy achhu awpa ta khichhai lâ tawhta avaw hlaopazy, he Siaha khihpi liata Volleyball apahâhpazy COVID-19 vâta kô 1 daihmâ tlai  pua thei leipa ta Sports Activities chhao tao thei leipa ta vaw y pi ta, anodeikua cha, kô 2021 kôthiehpa avaw pahieh ta, atanoh he hawhta Sports Activity zy hmah la heih thei awpa nata tao pazao thei heih awpa ta daihti pha kawpa nata hnatlâ hri-aih pathaihpa miah pie tuhpa eima Beipa Zisu Krista moh ta alynabie reih na ta, nama zydua hnoh ta anaohna Samaw ei châ hlâ ei.”

 

“Atanoh he ly â chhih kawpa ta pahno na ta, he SDVA zy ta he running Trophy ama pachhuahpanoh theipa he reithai tlâh ama châ tah na ta, ama sôh hmâna zy pachâ na ta, he Tournament pi patloh thei awpa ta cha daihti hleikhô ta hriapasa kaw awpa zy peimawh ta, phahnai ngiah awpazy peimawh ta; he zydua he khâpa vâta ma a châ eima tah khiah eima thyutlia nahzy Sports liata hmah ama sie thei nawpa tahpa ta athôhna chhao y tlâ leipa ta he running Trophy he ama vaw patohpatia theipa a châ; ama zydua hnoh ta chhao alynabie ei reih.”

 

“COVID-19 vâta eima thyutlianahzy Sports tao thei khao leipa ta ku pahkopa ta kô 1 daihmâ tlai nama ypa cha rairu nama tah kaw tahpa chhao eima pahno.  Chahawhna hra chata khitlâh nata Awnanozy chhao ta rairuna eimâ vaw tyh. Atanoh deikua vâhnei chhih kawpa ta thyutliapa, Talent ahneipha kawpazy vaw pua pakhy ei chi ta, Team 19 (Chapaw Team 13, Chanô 6) tlai ta vaw pua thei ei chi ta, reithai tlâh nama châ hmeiseih.”

 

“Eima râh buah kawpa liata eima thyutlianahzy ta Sports nano nanopa liata hmahsiena hnei pi ta, azâhkô lâ chhao he su lia he ta Inter-District Volleyball Tournament pachhuahpanohpa vaw châ ha ta, aly’pa a châ hmeiseih. Eima District pôpalôhpa mopa ta eima rairu kaw tahpa pahno pi ta, a District Council hawhpa chhao ta eima rairu kaw ta; chahawhta achâ no ta keima nata ei hrialâhpazy ta eima Thyutliapazy Sports lâ ta apahâhpazy, nama hmialâ daihti awpazy pachâ pi ta, Khizaw hmahsie viapazy nata eima chheipâh District hropazy sai pi ta, he Field (volleyball) liata hmahsiena hnei leipa ta nama y awpa chi ngaita pi ta, chavâta atanoh he eima hnei lei kawna chô ta eima theina eima papua ngâkaw hrapa châ ta, he liata Volleyball Court chhao he SDVA chhituhpazy nahta hrialâhpa ta, eima Sports & Youth Services Department siepahliepa ta, su hro râh hro lâtahpa atlu vei hra sala, he hawhta apeimawhna daihti liata hmâ thei awpa ta taopa vaw châ ha ta, he kyh lia chhao ta eima hyutuhpa (SDVA leaders) zy reithai tlâh ama châ tah na ta, ama hnoh ta alynabie ei reih chanei.”

 

“He zydua he eima thyutliapazy châta tahpa ta pachhuahpanohpa a châ.”

 

“Atanoh lia chhao daihti rairu kawpa, COVID-19 daihti a châ tarawpa ta, atahmâ cha bâhta azie vaw y via ha ta, chavâta daihti ryhpaohpa a y pata nahta tahpa atanoh he nâmo volleyball players zy châta nama hyutuhpazy ta ama vaw pachhuahpanohpa a châ. Chavâta eima râh nata eima Council chhao ta Thyutlia Sports lâta apahâhpazy ta nama hmialâ daihti pha nawpa pachâpa ta he hawhta ama taopa a châ; nâmo chhao he kyh liata keih vaw chakâ ei chi ta, aly â chhih hmeiseih.”

 

“Atahmâhlâ khizaw eima mopa ta a châ khiah eima râh thyutlia hluhpi cha pari theipa sahma, drugs etc. liata palôhzy pachhô khai ei ta, hluhpi cha vaw kua thei khao vei ei. Chahawhpa zydua eima pachâ nahta a professional cha soh chy ei si la, eima thyutliazy hro tao pathipa a châ thei nawpa; ama hnatlâna avaw pha thei nawpa; chyhsa tyhpa hawhta ama vaw châ thei hra nawpa ta tahpa ta nama hyutuhpazy ta he hawhta activity he ama vaw patohpatiapa a châ. Chahawhna hra chata eima pahno chyupa hawhta Sports he Khizaw ta pasâhsa kaw ta, India nata Mizoram State chhao ta a pasâhsapa a châ. A pasâhna chhâpa miakha cha thyutliazy hnatlâna phapa apie tuhpa a châ vâta a châ chai nahta ei pangiasa. Atahmâ he eima râh liata Pari theipa sahma, drugs etc. zy ta thata miah ngiahnaoh ta, he kyh liata eimâ boh thei nawpa ta nata Talent ahneipha kawpazy ta Sports liata nietluana taihta ama hnei thei nawpa ta nata ama hmialâ daihti châta tahpa ta atanoh he hawhta ama theina hawhta nama hyutuhpay ta hmah ama vaw la ngâ kawpa a châ.”

 

“Cha zydua hlao patloh awpa chata atanoh he liata avaw hlaopazy dei châleipa ta Siaha District liata eima thyutlia zydua he eimâ khokheipa a châ. Chavâta atanoh he, he Tournament he, sôh eima hneilei kawna chôta eima tao hnolopa châ ta, eima taona dâh zy he kho âkhi lei ngyu thei; anodeikua ahy chhâ ma – Sports apahâhpazy ta athôhna vaw hmô hra sa la, Sports khizaw liata keih vaw chakâ ei sa la tahpa he eima saduthliena a châ. Cha palôrupa cha, he running Trophy avaw hlaopa zydua nata atanoh liata Finalist nahzy ta nama phaoh awpa ta eima cha khokhei hmeiseihpa a châ. Chahawhna hra chata eima râh chhituhpa – Sports lâta eima râh chhituhpazy ta pachâna thata ama vaw hmâhpa a châ.”

 

“Khazohpa ngiachhiena vâta Siaha District chhao, dua tiarâh hlei ma pi; eimâ reithai pathlei hapa chhao ta areithaina daihti a châ – Boxing khizaw liata Siaha District dei châ leipa ta Mizoram State pôpalôhpa ta mohphana eima dao; eima reithai hmeiseihpa a châ. Chahawhna hra chata Football khizaw lia chhao eima District tawhta chyhsa hluhpi ta State Level liata angia thei ha ei ta, aly â chhih hmeiseih. He hawhta a châ no ta Volleyball khizaw lia deikua moh rei awpa eima hnei mâh leipa ta ei pahno. Chavâta, he activity lia he ta tiama eima papua via heih awpa apeimawh ngâsâ; nama hyutuhpazy ta thapi ama phia hmeiseihpa a châ.”

 

“Eima thyutlia, Sports chyhsa viapazy nata Talent ahnei pha viapazy ta, ngiachhiepa ta palôh liata vaw hnei u la, nâmo châ ngâlâh châ leipa ta, eima District pôpalôhpa ta – eima Mizoram State châta nâmo zawhzi ta mohphana eima to theina tahpa he nama pahno awpa ta ei khoh ngaita. Cha hawh duahmo liata dua awpa chata atanoh liata nama duahmo tawhta thlie theipa a châ. Chavâta, atanoh he palôh kawh kawpa (broad minded) hneina chô ta, khâchâ achhuahna nata tiamana chhao ta tao hnolo chyu suh vy tahpa he atanoh liata nama hnoh ta ei rei khoh kawpa a châ.”

 

“Atanoh liata ei bia (Amôbyuh MDC Bia) tawhta Finalist (Chapaw) nama vaw y thei vâta palôh hmeiseihpa ta alynabie ei cha reih ei.  Chahawhna hra cha ta atanoh liata Final angiapa zydua, nama khih, nama vaih zy ta amâ châ palaikhei kawna tahpa reih khoh na ta, moral support eima cha pie khai tahpa ei reih khoh kaw hra. Finalist nah zydua, Champion palôh phaopa ta namâ khaih chyu awpa ta cha khokhei ei na ta, Sportsman Spirit palôrupa hneina chô ta ângia kawpa ta akhaih chyu awpa ta ei cha khokhei ei; ei châ ly kaw ei.”

 

Puhpa N. Zakhai he Programme âthaona tawhta Final akhaihpa chhâna taihta moh hra ta, lymâ raina chhao ano ta a hnei pâ hra.

 

Chapaw Final he Amôbyuh VC nata Southern Spikers zy akhaih ei ta, Southern Spikers zy 3-1 ta ama tlô. Chanô Final liata Old Friends VC nata College Vaih VC akhai ei ta, Old Friends VC zy ama tlôh. Lymâ châta Chapaw Champion=Rs.15,000/- + Trophy, Runner-up=Rs.10,000/- + Trophy. Chanô Champion=Rs.10,000/- + Trophy, Runner-up=Rs.6,000/- + Trophy a châ.

 

Puhpa N. Zakhai he Puhpa JH. Beihnai, Sports & Youth Officer nata Puhpa Beirôkhu Beitâ, Information & Publicity Officer zy ta zi ei ta, Sports & Youth Department nata Information & Public Relation Department tawhta Staff thokhazy ta ama zi hra.

 

ISSUED BY:-

Information & Public Relation Department

Mara Autonomous District Council

Siaha.