Elected Office Holders & HODs, MADC zy Covid-2019 chôchâh Meeting hnei

SIAHA, 23 Pamih, 2020, Hriatuanoh – Atanoh dawh 12 Noon pata CEM’s Conference Hall, MADC Complex liata Elected Officer Holders nata Heads of Departments, MADC zy Joint Meeting hneipa châ ta, Corona Virus Disease (COVID-19) chôchâh reina hneipa a châ vâta Dr. S. Beihrokhu, Medical Officer, Siaha chhao Special Invitee ta hruapa a châna hawh ta â hlao thei hra.

He meeting liana he ta eima râh liata COVID-19, pasana hri chichhih kawpa he akiah/aveipa pahnopa châ mâh vei hrasala, avai awpa apeimawh zie nata eimâ vaw boh thei nawpa kyh zy reina hneipa châ ta, Dr. S. Beihrokhu tawhta pasana hri âvaw thaotôna dâh zy nata atanoh taihta a patlâhna thona hmôpapuapa a châ mâh lei zie reina nahthliepa châ ta, pasana â vaw lâna kyh liata reina hluhpi y hra sala, a châ hmeiseih tahpa pasiana a y mâh lei zie a reih. 

He pasana hri tawhta eimâ vaw boh thei nawpa ta avaina tlu ta aphapa y leipa ta, eima râh liata reingia leina vâta khôtho apua chakhyhpazy ama hluh kawpa pei a tah zie areih. Chavâta sawhkhâ biepuapa Lockdown daihti chhôh he zyh khaipa ta ahy hmahta khôtho lâ pua chakhyh tlâ lei awpa ta ahawna a tao.

Ary liata palâsapazy he, zawpizy pahno awpa peimawhpa thokhazy a châ:-

1. Sawhkhâ tawhta tao awpa nata tao lei awpa miah ama chhopa zydua apha kawpa ta zyh chyu awpa ta Mararâh zawpizy ahawpa eima châ.

2. Covid-19 avaina kyh liata niebaw rairuna atyhpazy châta MADC ry liata rai hriapa zydua hlao tawhta 3% chyu thyu awpa ta pathlupa châ ta, he he CEM’s Relief Fund siepahliepa ta piepapuapa a châ aw.

3. Mizoram sawhkhâ bie hawh ta MADC ry liata rai hriapazy cha, bie heihpa a y hlâta Office chhuti khai chy awpa châ ta, General Administration & Control Department nata Finance & Accounts Department ry liata hriatuhpazy deikua bie heihpa a y hlâ via cha ama kiah chy aw. March 2020 thla hlao A-Roll atao patlô mâh leipa Department zy liata HOD & Dealing Clerk zy cha office kiah chy hra aw ei ta; ama tao patlô tawhta bie heihpa a y hlâ via ama chhuti thei hra aw

4. MADC Office Complex tlyhmia liata ku asina sopa châ aw ta, Office akiahpa nata lie thei leipa ta office adaoh awpazy ta ku amâ si cheingei awpa a châ. Ku hruna deikua apachâ chyu awpa a châ aw.

5. Marasaw, phai lâ ta ypa nata châ achupazy cha, eima râh lâ kaw tlô tlâ mâh leipa châ sala, leithei leipa ta akaw tlôpazy cha Mizoram sawhkhâ ta Aizawl/Vairengte liata Quarantine facility taopa liata noh 14 chhôh so panano cheingei awpa a tahpa cha zyh chyu awpa ta ahawpa ama châ.

Issued by:-

Information & Publicity Office

Mara Autonomous District Council

Siaha.