PRESS RELEASE No.16/2021

SIAHA, 18 Hmypi, 2021 – Zâhnia târi 17 Hmypi, 2021, dawh 2:30 Pm pa ta Environment & Forests (E & F) Department, Mara Autonomous District Council (MADC) ry liata  Forest Staff Association (FSA) zy ta General Conference cum 10th Term FSA General Election programme hmâh ei ta, he liata Puhpa N. Zakhai, CEM, MADC zachhihpa cha  Chief Guest châpa ta akhawna Programme 2nd Session a hmâkhei ei.

He Programme he Puhpa TT. Vabeisu, President (a châ ngâhaipa), FSA   ta chhihtha ta, Puhpa S. Chhaly, Forester ta thlahchhâna daihti a hmâh. Puhpa N. Zakhai, CEM zachhihpa nata Puhpa Thaly T. Azyu, Conservator of Forests (CF) zy ta bierein daihti ama hmâ khai tawhta Leader thiehpazy alykheina châta zâ pati dôlâhna hnei pâpa a châ.

Chief Guest Puhpa N. Zakhai, CEM bierei tlâhpi viapazy:-

1. Atanoh daihti phapa miah pietuhpa eima Khazohpa hnoh ta alynabie reih na ta, E & F Department Officer nata Staff zy hnoh ta alynabie chareih ei na ta; a eih pachaipa ta Puhpa Thaly T. Azyu, CF hnoh ta alynabie reih na ta, nama khokheina eina patosa tyh vâ ei chi ta alynabie ei reih chanei.

2. MADC â vaw dua thaoh no ta cha E & F Department he a mohta dâhdei ta vaw y ta, atanoh deikua Officer nata Staff zydua ta cha maluh 130 hlei vaw châ ei chi ta, he Programme liata avaw hlao theipa chhao maluh 50 hlei tlai nama châ. Pawi-Lakher Regional Council daihti ta cha Siaha nata Tipa su liata amohta ta Forester nata Forest Guard chyhta eima y. Atahmâ deikua infrastructure zy hneipha via ngâ kaw pi ta, Mararâh apangiasa tuhpa lâpi chavei nahta chachâh lâ liata Road-side plantation zy vaw hmô lymâ pi ta, Kaochao-Siaha dei châleipa ta Siaha Tlâhpi lâpi lâ lia chhao hmô awpa a y; E & F Department raihriana he arônah hmeiseih; Mizoram pôpalôhpa lia chhao ta ataophapa châ pi ta, pahno eima hlao kaw tahpa eima pahno vâta eimâ ly hmeiseih.

3.  Pawi-Lakher Regional Council tawhta atanoh taihta Khazohpa ta miah achhihthazy eima pachâpasia khiah aly â chhih hmeiseihpa a châ; kha daihti no zy kha cha MADC ry liata Department zy he ta Association chhao eima paduapa ta pahnopa châ leipa ta, apôpalôhpa ta Federation ngâlâh kha paduapa a châ; atanoh deikua cha Department 20 hlei tlai MADC ta avaw vao ha hra ta, cha liata alai viapa Land Revenue & Settlement Department zy, Education & Human Resource Development Department zy, Local Administration Department nata E & F Department zy he MADC kua liata 100 liata 100 ypa ta eimâ vaopa châ ta, he Department lai viapazy he ta Association padua khi tlai Staff zy vaw y ha bâ pi ta, arônah ei tah ngaita kaw. Atanoh liata E & F Department ry liata FSA Leader thiehpa zydua châ lykhei ei na ta, khokheina chhao ei cha hlâ hra ei.

4. E & F Department Officer nata Staff zy he Mararâh châta nama raihriana kyh liata reithai tlâh nama châ hmeiseih. Mararâh zawpi zydua vyuhpa nata CEM ei châna lâ tawh chhao ta alynabie ei cha reih ei.

5.  Eima râh liata apahrâpa zawpizy pi ta Official nahzy biereipazy he eima zyhpha kaw tyhpa ta ei pahno. Chavâta dâh nata phôh he apeimawh kawpa ta pahnopa châ ta, atahmâ 11th term MADC he ta dâh nata phôh he thata eima tao; cha hry liata apeimawh kawpa General Service Rules 2019 taopa cha atahmâ Governor pasaina ta vaw pua ha ta, atahmâ Clerical rai hriapazy châta Ministerial Service Rules tao ngâhaipa châ ta, Department thokha châta chhao pachhuahpanohna siekhei ngâhaipa a châ hra.

6. Eima râh liata pazu-pavaw, atanoh taihta azuahpa ei hmô pei ei tah kaw tyh; chavah-chahaoh lâta asiepa chhao eima hluh kaw tahpa eima pahno. Chavâta E & F Department liata pheisâih eima cha hneipazy nama tiama via awpa apeimawh hmeiseih.

7. E & F Department ry liata raihriapazy he ama post chyu liata a y tiamapa, rai apachâ peimawhpa sai châ ei chi ta, Officer hluh via zy post tao thei ei si la, ahriatuhpazy hluh via ei si la tahpa he eima kho chaipa a châ no ta, 11th Term MADC he, â vaw thao noh tawhta phaohri phaona chô ta asiepa a châ. Term parohpa liata hlao adaih leina vâta term thiehpa liata kô khophie daihmâ cha adaih leipa ta vaw sie ta; eima hyutuhpazy tiamana zawhzi nata Puhpa Lal Thanhawna sawhkhâ phana zawhzi ta atanoh cha hlao aphahlana nata adaih leina cha rei awpa y khao vei.

8. MADC liata Revenue (sôh) â vaw ngia nawpa eima hnei tlakaihpa ta Land & Revenue Department tawhta Professional Tax ama kheipazy, leimâ nata Compensation tawhta zy nata E & F Department tawhta zy a châ; he eima sôh lana hnawh (source) peimawh kawpazy he ta tiama kawpa ta target tlô lymâ awpa ta tiama eima papua awpa apeimawh hmeiseih. MADC Revenue â pôh via thei nawpa ta nawpa ta atahmâ he dâh nata phôh buakhei ngâhaipa a châ.

9. MADC he, Khazoh ngiachhiena vâta hâhkô 2022 liata Golden Jubilee (kô 50) a tloh bâ awpa vâta athei thlâhna khâpa chhâma tao awpa khona y ta, atahmâ he Parking Lot sa haipa chô liata Golden Jubilee Hall sa awpa ta apatohpatia haipa a châ. He sa nawpa he ta MADC ta sôh eihrâhpa hnei lei pi ta, Revenue avaw ngiapa tawhta sa awpa achhuahpa a châ. He zydua vâ he ta Department ta Revenue ahneipazy ta tiama nama papua via lymâ awpa apeimawh hmeiseih.

10. Eima rai chyu liata ngâ eimâ chhih awpa peimawh ta, hyutuh zy bie eima zy awpa apeimawh ngaita. Ngâchhina nata adona he pachâ peimawh via lymâ awpa ta eimâ pasyu hmeiseih.

11. E & F Department ta râh nama mohôh ngâkawpazy, private râh châta piepa a vaw y pâ tyhpa kyh liata Department Officer & Staff zy châta a pasa kaw aw tahpa eima pahno; eima unawh sietanôzy, O lyu ahnei leipa hluhpi y ei ta, chyhsa khihsa râhsa mokhei abyuh vâta nata Ohmo châta râh ama peimawh vâta leithei leipa ta E & F Department râh eima piepazy avaw y pâ tyh; he kyh liata nama pachâthaina eima peimawh hmeiseihpa a châ.

12. E & F Department staff zy ta sahria phaoh ei chi ta, sawhkhâ rai hria leipa hawhta Forest Plantation nama pathai tyhpazy nata râh nama mohôh tyhpa zy he arônah hmeiseih; nama raihria phapazy vâta chyhsa palysa ta, Mararâh pôpalôhpa mophana zy miah pie ta, alyna nata mohphazy he a sôh ngaita. Eima râh miah avaw tlypazy ta thobuh pha ngaitapazy nata nohdi pha kawpazy, thokhô rôh zy vaw hnia khaipa vaw châ ta, he hawhta chyhsa alyna miah apiepa he amâ lâ chhupa châ sala amâru kaw nahta ei pangiasa; ei kha cha Tripura tawhta Assembly delegate akhypazy ta eima thâpha reih ei ta, “Kaochao East eima kaw tlô tawhta Marasaw hrozie awpa â hno thlâh na; nama lâthlôh y tlakaihpazy vaw pathaih kaw ta, lâpi kiah liata plantation eima hmôpazy miah a palysa ngâsa; ECM Awnanopa chhao eima cha hmô sâh kaw na.” miah ama tahpa a châ. Forest plantation ama vaw hmô tawhta Marasaw zydua palôru phapa nata ahriapasa kawpa hawhta miah ama pachâ. 

13. Atanoh he E & F Department rai hriapa hawhta Marasaw zydua hria ei si la, eima râh liata chakâhna tlô aw vei. Atahmâ cha E & F Department tawhta râhmâh pathai awpa ta a nohlaopa ta pahriasapa châ sala, ahria hohpa eima chyh kaw bâ; chi asosâh viapazy hawhta Marasawzy ta eima hria pasa awpa apeimawh hmeiseihpa a châ.

14. Atliata liata Compensate ahmôpazy ta O hmô lyu hmo amâ ru kawpa ta chalei lymâ ei ta, Siaha lia chhao O hmo mâ aru khai ha bâ; phusâ a hnei thlâhpazy chhao ta chalei ngâh’pa châ khao vei; chadei châ vei - eima râh thyutlia zy ta ahluah theipa liata thata arâpasao ei ta; he kyh he nâmo E & F Department Officer nata Staff zy ta khi nama tlyna liata reih hluh u la tahpa ei khoh kaw. 

15. E & F Department officer nata staff zy ta Marasaw châta byhnâ vaw châ via lymâ u la, nama rai chyu liata adona nata ngâchhina nama siekhei thei nawpa ta khokheina sâh chaipa ei cha hlâ ei. Ei châ ly kaw ei. 

FSA he kô 3 chhôh Term taopa châ ta, he 1st Session liata General Election hneipa châ ta, ar liata palâsapazy he 10th Term FSA Leader châta atlypatlohpazy ama châ:-

President  – Beichatlaisa Azyu, FRO (W&P)

Vice President – Biakchungnunga, Dy. Ranger

Secretary  – K. Beihrolai, Forester

Asst. Secretary  – N. Sapkhumliana, Forester

Finance Secretary – S. Sikô, UDC

Treasurer – Anita Ngodingia, Forester

ISSUED BY:-

Information & Public Relation Department

Mara Autonomous District Council

Siaha.