Puhpa Beirahmo Syhly, EM ta CEM MADC Running Trophy 2021 pahy

 

SIAHA, 16 Hmypi, 2021 – Atanoh my dawh 11:00 Am pa ta Chief Executive Member (CEM), Mara Autonomous District Council (MADC) Running Trophy 2021 cha Puhpa Beirahmo Syhly, EM i/c Sports & Youth Services, MADC ta Chief Guest châpa ta New Siaha East-II Volleyball Court liata a pahy.

 

Pahyna Programme he Puhpa CZ. Hluna, President, Siaha District Volleyball Association (SDVA), Siaha ta chhihtha ta, Puhpa K. Lalzawnga, Secretary, MYA (HQ), New Siaha ta devotion hmâh ta, Puhpa B. Lalrokhawma, Match Commissioner & Senior Vice President, SDVA ta report a pie. Puhpa Zoramliana Solo, Asst. Match Commissioner & Joint Secretary, SDVA ta Team captain zy bietaina (Oath Taking) a pahneisa. He khai tawhta Puhpa Beirahmo Syhly ta Tournament pahyna châta Spike off a hnei.

 

Chief Guest Puhpa Beirahmo Syhly ta bieraina chyupa reina daihti hmâh ta, a ry liata palâsapazy he a bierei tlâhpi viapazy a châ:-

 

1. Atakô liata SDVA ta CEM MADC Running Trophy a vaw pachhuahpanoh thei heihpa vâta SDVA leaders zy hnoh ta alynabie ei reih. He liata nâ vaw zipa eima Officer nahta Staff zy hnoh ta alynabie reih na ta, Tournament avaw hlaopa zydua hnoh ta alynabie ei cha hlâ ei.

 

2. Siaha District chhôh liata thyutliapazy maluh he thyno (20,000) daihmâ achâpa ta pahno na ta, he hry liata Sports lâ apahâhpa cha chyhsa chyhta châ pi ta, discipline lâta pachhaihpa châ sala Volleyball lia he cha eima chyh kawpa ta ei pahno. 

 

3. Eima District pôpalôhpa ta Sports Discipline nano nanopa liata Sports lâ ta apahâhpa he maluh 1,000 chhao eima tloh vâ ma tahpa he a châ. Atanoh liata ei rei khoh kawpa cha nâmo Volleyball liata apahâhpazy ta atanoh phahnai ngiah kawpa ta CEM MADC Running Trophy avaw hlao ei chi ta, he liata avaw hlaopa player zy mopakha tawhta chyhsa pa 5 chhâ Volleyball nata Sports liata vaw pahâsa awpa ta nama vaw pasyu chyu ei châ hnaw ei. 

 

4. He hawhta nâmo hawhta thyutlia hropazy ta Sports liata ama vaw pahâ khiah khitlâh a vaw pha via cheingei aw. Thyutlia hluhpi, Sports lâta apahâh leipa hluhpi ama y vâta eima khitlâh he aboh lei ta, thokha cha chariah achipa hawhta nohto ta eima ypa a châ. Chavâna chata nâmo hawhta Sports apahâhpa eima hluh khiah paritheipa hmo zy he lei khai ha aw ta, azuah tuhpa hmah y hra ei sala, achalei tuhpa ama y vei khiah azuah tuhpa chhao y khao hra aw vei ei. 

 

5. Chavâta nama thyutlia lâhpazy, Sports liata pahâh awpa ta avaw chhi u la, a eih-chapachaipa ta Volleyball liata pahâh awpa ta nama vaw pasyu chyu awpa ta khoh kaw na ta, ei châ haw pâ hra ei.

 

6. Sports eima tao nahta he ta hlaotlohna eima hmô ma, hmô vei ma – eima palôh â nai (down) awpa châleipa ta, hlaotlohna eima to leipa chhao ta palôh down leipa ta eimâ tao pathi awpa apeimawh ngâsâ. Eima tlô ma, tlô vei ma, eimâ chhuahna â sâh cheingei awpa a châ. “Ei tao thei aw – chyhsa hropazy ta ama tao theipa cha ei tao thei hra aw” tahpa palôh, atanoh tawhta nama phao pathao awpa apeimawh kawpa ta ei pahno.

 

7. Sports rai rai cha eima taochheina daihti liata eima no vaw za tah, eimâ sohsi vei khiah eima taochhei chanei thlâh heih tyh. Chavâta nama tao chhei hapa chhao ta, noza thlâh leipa ta aheihpa liata tao chhei khao lei awpa ta palôh a tao u la, kheihta ei tao pado thei aw tahpa palôh phaona chô ta ataopasuana sports nama tao awpa ta ei cha khokhei hmeiseih ei. 

 

8. Atanoh liata sai nâ hei tuhpa SDVA Siaha leader zy hnoh ta alynabie ei reih chanei. Ei châ ly kaw ei.

 

Puhpa Beirahmo Syhly he MADC Official lâ tawhta Puhpa JH. Beihnai, Sports & Youth Officer, Puhpa Beirokhu Beita, I & PO nata Sports & Youth Department nata Information & Public Relation Department Staff thokhazy ta ama zi hra.

 

He Tournament liata chapaw team 7 nata chanô team 5 zy ahlao ei ta; he liata ataopha viapazy cha Mizoram State pôpalôhpa Tournament liata tua heihpa ama châ aw. 

 

ISSUED BY:-

Information & Public Relation Department

Mara Autonomous District Council

Siaha.