Puhpa N. Zakhai, CEM, MADC ta satlia Ezra Hlychho châbu palâhâh

SIAHA, 16 Di, 2020, Pakhynoh – Atamy dawh 11:00 Am liata Puhpa N. Zakhai, CEM, MADC zachhihpa ta satlia Ezra Hlychho châbu ropa “Mara Church History” cha Environment & Forest Deptt. Conference Hall, MADC liata zawpi rei thei awpa ta a palâhâh.

Programme he Puhpa MC. Pabei, Asst. Secreary, Board of Mara Literature (BML) ta chhihtha ta, Rev. VL. Ngaia Hlychho, Senior Executive Secretary, ECM HQ ta thlahchhâna a hnei. Puhpa Pachi Hlychho, Court President, MADC ta châbu thâtih rei chhieliena (preview) hnei ta, laihsa Clara K. Melita nata laihsa FC. Nipari zy ta hlasana a ma hnei hra.

Châbu palâhâhtuhhpa Puhpa N. Zakhai, CEM zachhihpa ta châbu a palâhâh khai tawhta bie reina chyupa hnei ta, ary liatahpazy he a bierei tlâhpi viapazy   a châ:-

“Atanoh liata châbu palâhâh awpa ta avy pakhypa zydua zana chô ta ei châ naoh ei. Palâhâh awpa ta nâ khokheituhpa châbu rohtuhpa satlia Ezra Hlychho nata BML nôpawpazy hnoh ta alynabie ei reih.”

“Châbu ro liata Marapazy pi ta thata hmahsiena hnei pi ta, atanoh lia chhao châbu miah aropa tuhpa satlia Ezra Hlychho hnoh ta alynabie rei awpa eimâ bâhpa ta ei pahno.”

“MADC Education Department ry liata Board of Mara Literature zy, Art & Culture Department, MADC nata Mara Writers’ Club zy hmahlana vâta (Mara reih ta châbu ropa liata) thata hmah eima sie. Board of Mara Literature zy, Art & Culture Department, MADC ta châbu arohpazy châta khatino rai apahy ei ta, châbu palâhâh khohpazy cha Programme ama taopa hleikhô ta thopi taihta amâ tôh awpa zie ama reih; aly’pa a châ hmeiseih.”

“Eima zydua hriaparaohna zawhzi ta eima Mara Literature cha vâro tlai hmah a siepa ta ei pahno.”

“Kaochao East satlia Ezra Hlychho ta he hawhta châbu pha kawpa a vaw roh theipa he ei vaw ly kaw. Hmialâ lia cha Kaochao East he ei bia a châ tyh vâta pahno pasia kaw na ta; châ thaipa chhao pua hluh tu leipa ei ta, rai lana kyh lia chhao saihei kaw hra ei si la, thaina abyuh tyh vâta la awpa y tyh vei ei. Atahmâ cha châ thaipa hluhpi ama y hleikhô ta châbu pha kawpa taihta aroh theipa Kaochao East satlia eima hnei haw – arohtuhpa Satlia Ezra chô liata alynabie ei reih chanei.”

“Châbu he châ athaipa nata degree ahneipa maihta ama roh thei awpa hawhta vaw pachâ tyh pi ta; vaw châ hlei leipa ta, talent ahnei phapa nata châ ro apahâhpazy deita ama vaw roh thei. Châ thaina nata degree phapa zy hnei vei hra ei sala eima râh liata châbu hluhpi miah arohpatuhpazy cha Puhpa A. Zakia (Padma Shi Awardee) Dr. S. Hrachu, Puhpa S. Mokia zy châbu ropazy he châ ta, N.E. Parry châbu ropa “The Lakhers” reileipa lia ta cha âmo zy châbu ropa he sapa nata thlahpa liata eimâ saohiah via chaipazy a châpa ei pahno.”

“Âmo zy he châ thaina sâh kawpa hnei vei hra ei sala, Mara chi nata pho thapasana hnei ei ta, Khazohpa ta talent a piepazy papôhsapa ta eima chi nata pho châta thata eima phahnai khei hmeiseihpa a châ.”

“Reih he chi nata pho miah palâsapa tuhpa nata eima châna achhopasia tuhpa a châ ama tahpa he â do hmeiseihpa a châ. Bie sai ta reih ngâ kaw hra ei sila, eima reipa cha chyhsa mo pakha pano zy ta avaw thei/ngia aw ei ta, hluh via la eima my ha tyh. Châ ropo deikua la Khizaw a y chhôh zydua ta a y awpa a châ.”

“Atanoh satlia Ezra he BA, MA Degree pha kawpa zy ahneipa châ vei hra sala, Marasawzy châta ryu tlohpa châbu miah a ropa ta, a châbu ropa title eina vaw chho no ta, ei palôh liata a ypa cha, keimozy he Mara Church History apahno lei ngâsâpa châ pi ta, eima political history hmah apahno leipa eima châ. Athaipazy ta ama ropa eima vaw rei nahta he ta ei pahno lei zie zy, ei thai lei zie zy ei pahno papua tyh; Khazohpa ta eina raona kyh liata ei master lei ngâsâ tahpa ei hmô pasia ngâsâ.”

“Châbu areih hluh viapa ta so via ei ta, pahno kawh via ei ta, a phana pahno via hra ei ta, ama pahnona abaichhi via, aroh hluh viapa ta ama pahnona chhao a hluh via. Chahawhta satlia Ezra he degree title holder hmah châ vei hrasala, a rônah ei tah hmeiseih. Eima zydua he miah a pahao ngâsâpa ta ei pahno hra. Thyudyuta châ ta, kaolâhpa chhao a hnei mâh leipa a châ no ta, he hawhta châbu pha kawpa miah a ropa he arônah ei tah hmeiseih; Châ athaipazy miah pahao ta, Mara thyutlia nahzy miah pahao ta, apachaipa ta eima Reverend (Pastor) nahzy a pahao kawpa ta ei pahno. A moh (Mara Church History) tawhna he ta eima senior pastor nahzy – doctorate degree ahneipazy ta miah ropa ei sala â chaw/hmie ngâsâ awpa a châ no ta, he hawhpa châbu lâchhâh he ama ropa  ahluhpa ta pahno vana. Rev. RC. Nôhro nata Rev. Dr. M. Zakonia zy dei ta he hawh lâchhâh ama ropa ta ei pahno. Ahropa cha Puhpa A. Zakia (Padma Shi Awardee) Dr. S. Hrachu zy ama ropa zy tawhta eima vaw pahnopa ta ei pahno.”

“Atanoh tawh deikua cha eima râh Church History, Mara reih cheingei ta ropa he eima rei chyu nahta pangiasa na ta, he tawhta pachâna thiehpa zy, palôru thiehpazy, eima Awnanopa a vaw laiseihnazy vaw nie aw pi ta, a pahâ nahta pahâ lei vaw pahno aw pi ta, apha nata achhie zy, kho akhi leinazy eima vaw hnei hôlô nahta ei pangiasa. He hlâta â ki chochâ viapa chhao ro awpa peimawh aw ta, satlia Ezra chhao, he tawhta miah vaw tiamapa via lymâ aw ta, atahmâtahpa he âdaih tah leipa sa la, economic, education, râh development lâchhâh zy chhao – châbu hropa miah aropa via lymâ awpa ta ei hnabeiseih. Ei palaikhei ngaita.”

“Nama zydua chô lâ na ta, atanoh daihti nâ saihei tuhpazy hnoh ta alynabie ei reih chanei. Ei châ ly kaw ei.”

Daihti chhâna lâ liata châbu rohtuhpa satlia Ezra Hlychho ta alynabie reih ta, he châbu roh awpa he ta ano pôhpa tlaita Nochhi nata Notla Mararâh khih zy a tly laih tahpa a reih.

Châbu he tho 371 ahneipa châ ta, Rs.300/- ta zuapa châ aw ta, atanoh ta avypazy deikua alynabie reina châta Rs.200/- ta chalei sapa ama châ. Châbu achalei khohpazy cha Author hnohta tlyma, BML, MADC liata Office hours chhôh liata chalei theipa a châ aw.

ISSUED BY:-

Information & Public Relations Department

Mara Autonomous District Council

Siaha.