Puhpa Beirahmô Syhly, EM ta VSE Fashion Show hmâkhei

Siaha, 12 Di (December), 2020 – Pachyh zâ dawh 6:00 Pm liata Puhpa Beirahmô Syhly, Executive Member (EM) i/c Sports, Vety. Etc. MADC ta VSE Fashion Show nata Cement Masonry Certificate Distribution programme cha NSV Studio, Siaha liata Local Cable TV siepahliepa ta a hmâkhei ei.

VSE Fashion Show nata Cement Masonry Certificate Distribution Programme he Miss Ornilla nata Mr. MC. Beihrohmô ta chhihtha  ei ta, Miss St. Lalnuntluangi ta Welcome Speech reina hnei ta, Puhpa Vabeimozachhi Chozah, BDO, Siaha cha Guest of Honour ta raopa châ ta, Laihsa Jessica B Khuhly nata Puhpa John Beizachhi Phuto ta hlasapa ta zawpi ama palôhpahawh. Satlia Zodinpuia Bôhia (Speaker, HOPEAN (House of Prayer for All Nation) Ministry ta Programme a pavaosana thlahchhâna a hnei.

He programme liata Puhpa Beirahmô Syhly, (EM) khichhai laipa cha biereina hnei awpa ta hruapa châ ta, ary liatahpazy he a bierei tlâhpi viapazy a châ:-

Atazâ he eimâ ly kaw sai nahta pangiasa na ta kei chhao aly kaw na ta a nohhro cha he hawhpa programme he TV tawhta vaw moh tyh na ta Siaha District liata a pahrâpazy chhao TV tawhta nama moh tyh nahta pangiasa na ta. Atazâ he hawhpa programme he VSE (Vocational School of Education) nata Siaha khihchhôh lia cheingei ta vaw pachhuahpanoh ei ta, keima cheingei chhao khichhai laipa ta na hrua ei chi ta he su liata biereih thei awpa ta ei vaw duah theipa he ei ly hmeiseih.

Marapa saw ta he hawhpa hmo he TV lia ngâlâh ta vaw hmô tyh pi ta. He hawhpa programme (Fashion Show) he Marapa saw ta eima tao thei hra vâ ma i tahpa vaw pachâ tyh na ta, chanonachata eima thyutlia nah Satlia Thatha Khaimeichho nata a viasanahzy ta he hawhpa pachhuahpanoh thei awpa ta ama sona, ama theina nata ama thainapazy hmâh papuapa ta eima District nata Mara saw châta he hawhpa ama vaw taopa he ama chô liata alynabie ei reih hmeiseih. Atanoh liata eima râh châta cha hmo ngiatlâh châpa, daihti ngiatlâh châp a châ tahpa he eima pahno chyu awpa ta vaw reih khoh kaw na ta cha khôlâ liata thyutliapazy ta TV liata eima hmô tyhpazy Khizaw su hrolâ liata ama tao tyhpazy he keimo Mara sawzy chhao ta eima tao thei tlai hrana tapa ama vaw palâsapa chhao he a rônah ei ta hmeiseih. Atanoh liata thyutliapazy challenge miah pie kawpa ta ei pahno.

Atanoh liata Fashion Show dei châ leipa ta chi nano chi nanopa chhao Mara saw thyutliapazy ta eima tao theina tahpa chhao he eima palôh liata lai sala tahpa ei khoh ngaita kaw. A via pachaipa ta Fashion he, atazâ ta kei ei tobina he Mongyuh nah Coat ama tahpa ta a vaw tobi na ta, ei vaw ngia kaw hra bao. Ra-ao (Nectie) chhao vaw ao khai ha na ta Savo Pheiky chhao a vaw ky na ta ei vaw tobina cha ei vaw ngia ngâsâ. Cha cha Fashion a rônahna a châ. Atazâ liana heta Chaopasy pachhohpa ta a pasy thlâh haw sala, Viahpakao abâh pachhopa tazy a vaw ky thlâh haw sala angia va na. Ei hmi chhie kawpa chhao ta Coat ei vaw kyh nahta cha naw palyupalih ta ei hmi chhie kawpa chhao kha hmiphana lâta eina papua. Chavâta ta Fashion he a peimawh ngâsâ. Chanonachata cha hmo a peimawhpa atahmâ chhâ khizaw thyutliazy ta hmo peimawhpa eima thyutlia nahzy ta ama thaohpapuapa he a rônah tah kaw na ta, ama chô liata alynabie ei reih chanei heihpa a châ.

Chavâta atazâ liata he su liata ypa nata khôtho lâ tawhta TV tawhta vaw mohpa zy, thyutlia nahzy pi ta he hmo heta keimo liata challenge miah pie sala khapa ma ei thaina, ei theinapa, râh châta ei thaohpapua hra aw tapa pathipalôh novâhna miah pie sala, cha chata atazâ hawhpa hmo, hmo thiehpa he mia thaohpapuapa hra ula tapa Mara thyutliapazy ei châ hnaw hmeiseih ei, tahpa khâ ei za reih khoh ngaita kawpa a châ. A chhâ chaina liata cha atazâ he hawhpa programme eimâ hmâpa he a eikhana vaw châ ta hmialâ eima sie lymâ n'awpa liata VSE nah chô liata khokheina hlâ ei na ta, cha khôlâ liana chata eima theina dâh hawhta MADC Sports & Youth Department heta bao amâ ngiahna maih liata miah vaw pahnosa ei sala eima bao theina liata bao awpa ta eimâ mâ ngâthlâh ha, thytliapazy ama talent thaohpapua n'awpa kyh liata cha MADC Sports & Youth Services Department heta khatino raita âmâ thlâh ha ne tahpa he atazâ liata a chhâ chaina liata ei reih khoh kawpa a châ. Ei châ ly kaw ei.

He programme liata Puhpa J.H. Beihnai, Sports & Youth Officer, MADC chhao a hlaopa ta Certificate raina nata pasyuna bie pha kawpa a reih. Pihnô Patricia T. Azyu, Social Welfare Officer, MADC chhao programme he â hlao hra.

ISSUED BY:-

Information & Public Relations Department

Mara Autonomous District Council

Siaha.