Puhpa K. Chhuabei, EM i/c PWD etc. ta a bia zawpizy tly

SIAHA, 21 Phiapi, 2020, Pachynoh - Puhpa K. Chhuabei, Executive Member i/c PWD etc. MADC ta noh 3 chhôh a bia zawpizy tlypa ta pasyupalina bietana a hnei.

Puhpa Chhuabei ta a bia (Vahia MDC Bia) liata khih sâ 5 ypa - Vahia, Miepu, Supha, Lopu nata Khaikhy zy cha târi 18-21 Phiapi, 2020 chhôh apalâ kawpa ta tly papua khai ta, bia zawpizy hnoh ta khokheina nata pasyupalina bie pha kawpa hlâna a hnei ei. 

Khi to liata Puhpa Chhuabei bie rei tlâhpi viapazy:-

1. Nama thlahchhâ kheina zawhzi ta atanoh taihta râh chakaona raizy hria pazi thei awpa ta Khazohpa ta na pasaih ta, atakô cha COVID-19 Pandemic vâta bia zy he ei chahlô thei nahta pangiasa leipa na ta, atakô liata hmia ahmôna daihti zy chhao eima hnei thei nahta ei pangiasa lei no ta, atahmâ liata bia zy chahlô thei awpa duahmo liata avaw duah na ta, aly kawpa ta hmia zy ahmô thei pi ta, alyna kuzy eimâ patu heih theipa he nama thlahchhâkheina vâta a châ tah lei thei leipa na ta, eima Khazohpa lâ ta thata alynabie ei reih hmeiseihpa a châ. 

2. Ei za tlôna daihti maih liata eima VC nata khitlâh nôpawpazy ta thata na deichhy ei chi ta, nama khokheina zydua vâta palôh hmeiseihpa ta alynabie ei cha hlâ ei.

3. Marasawzy pi he sasyh ativyna kyh liata eimâ pahla kaw chy; Sahroh liata ativy thei mâh lei pi ta, Âhnalasi liata ativy thei mâh hra ma pi. He nahzy he eima râh, Khazohpa ta miah a piepa lia cheingei ta eima hriapapua theipa a châ tahpa pahno chanei heih ei suh u.

4. Atahmâ tawh he ta COVID-19 vâta tly ma, hri-iah hropazy vâ tly ma, rairuna vaw ypa ta sawhkhâ tawhta sahpha supply vaw y khao leipa sa la; Job Card zy vaw raih khao leipa sa la, kheihta ma eimâ tao aw tahpa pachâ â daih haw. Ativyna he chhôh to ta eima pachâ peimawh chai awpa a châ.

5. Alu, Tomato, Dal etc. zy he râh eima hneipa liata chheipa châsala pha kaw aw ta, eima bia nahta Mararâh zydua supply thei awpa eima châ no ta Silchar lâ tawhta ama kaw zuapa cha chalei pi ta, eima nie thlâh ha. He hawh tlupo ta chi nata pho ativy leipa he châ pi ta, pahneih parâh ta, a y chakhyh awpa châ khao ma pi. Biehneina sâh viapa ahneipa châ ei si la, he hawh ta eima y chakhyh khiah eima hneina sôh nata phusâzy cha chi hropazy hnoh ta a sie lymâ aw.

6. Atahmâ cha vâhnei chhih kawpa ta ei bia liata Airtel 4G zy avaw hmâh thei ha ta, he internet hmâ theina he hmâ phahnaipa ta chichei bialo chhei dâhzy chhao Internet website - YouTube liatazy mo theipa a châ. Hmâ phahnai achhuah chyu ei suh u.

7. Sawhkhâ phana zawhzi ta Leipalie, terrace etc. zy asaipa ta miah chhiahpa ei ta, he liata chhei awpa chichei bialo chi tao rai asaipa ta achi miah ama rai tyhpazy liata hlaotlohna hmô thei tyh ma pi; eima Mararâh khihpi Siaha liata âhnalasi eima chalei tyhpa hluh via cha District hro lâ tawhta akhypa sai a châ. Keimo notla Mararâh lâta apahrâpazy pi he eima vâhnei ngaita ta, chicheibialopazy pha khoh kaw ta, tiamapa ta mohôhpa ta eima chheipa ta a châ khiah eima Mararâh zydua supply thei awpa eima châ. Chahawhpa duahmo liata eimâ dua thei nawpa ta eima hriapasa awpa nata tiama awpa he apeimawh hmeiseihpa a châ. 

8. Leipalie zydua apha kawpa ta kôchareih tao lymâ ei si la, châhvâ avaw châ nahta châvâh chicheipazy chhei heih aw pi ta, nie tiah leipa eima hneipa khô lâ ta eima zuah thei awpa a châ; eimâ tivypa ta a châ khiah hmahsiena vaw y aw ta, su 10 su 1 zy pie hluh via aw pi ta, Khazohpa ta miah â hnawpa Missionary zy eima chyh hluh via lymâ thei awpa a châ. 

9. Sievawna eima bai tyhpa Motor lâpi zy chhao atahmâ cha Khazoh ngiachhiena vâta vâro tlai vaw pha ha ta, châhvâ daihti chhochhi cha Car hmahta asie thei khai bâpa a châ; chavâta atakô tawhta cha ku raihriapazy pi ta thathyu kawpa ta nata tiama kawpa ta eima hria awpa ta eimâ pasyu khoh hmeiseipa a châ.

Atakô COVID-19 Pandemic vâta khitlypa ta bia chahryh awpazy he hmo theipa a châ lei vâta, kô hro lâ ta a tao tyhpa hawhta atakô cha bia lâ hmia palâ awpa arairu kaw ta, bia zawpizy lâ ta pachâthaina ahaw ta, he hawhta rairuna eimâ tyh haipa vâta Christmas hlâta biazy a chahlô thei khao lei awpa a châ pathlei khiah tahpa ta Puhpa K. Chhuabei chata a bia zawpizy hnoh ta Christmas nata Kôthiehpa anaohna nata khokheina a hlâ ei.

Vahia MDC bia liata Tlâh lyu taopa tawhta atakô 2020 liata sâh ahria/hnei hluh viapa dyh 3 a tly papuapazy:-

1st = Hukô, Lopu (Tin 360)

2nd = K. Sinai, Miepu (Tin 320)

3rd = K. Beihu,  Vahia (Tin 273)

He nahzy he Pihnô Nakho Solo (w/o Puhpa K. Chhuabei) tawhta 1st Rs.6,000/-, 2nd Rs.4,000/-, 3rd Rs.3,000/- zy alykheina châta raipa ama châ.

Lopu liata Puhpa T. Seido, MDC, Laki biatuhpa ta a khitlyna liata a vaw chapia vâta biereina chyupa hnei hra ta, "eima râh he byhnâ thata to pi ta, eima Missionary nahzy pasopakâna zawhzi ryureina eihrâhpa MADC zy hnei pi ta, eima Mararâh liata eima mahnô mahpaw nahzy Tâkô a chatapa ta Mararâh châta luh tai bâh tai apapeisa leipa avaw hriapasapazy ta ama saw nahzy châ vaw pachusa laih ei ta, atahmâ cha School hyutuhpa nata Office rai hriapa hluhpi eima za y; he sawhkhâ rai ahriapa sawnawhzy he ta atahmâ cha châ kaw thai via heih ei ta, thokha cha MADC he mohnaopa nata reipachhiepa ta amâ chiavo tyh; Marapazy pi ta MADC he byhnâ eima tona hnawh na a châ tahpa pahno leipa ta Khazohpa ta a raopa MADC liata ryureihtuhpa zy reipachhie ei ta, pei ei tah hmeiseih; Marapazy pi he eimâ mopasia via lymâ awpa apeimawh hmeiseih" tahpa ta reih ta, Marapa Officer thokhazy adaoh rairu kawpa eima y tyhpa cha pei a tah zie a reih hra.

Puhpa K. Pawkhai, HEO (GoM), Tipa ta Lôpu liata Horticulture Department lâ tawhta ama raihrianazy reipa ta biereina chyupa hnei hra ta, he liata ku raihriapazy hnoh ta Training ama za pie theina chhâpa nata raihria awpa ta amâ zuna chhâpa cha biatuhpa Puhpa K. Chhuabei ta a bia châta phahnaingiahna nata hriapasana vâta a châ tahpa ta reih ta, hlaotloh cheingei awpa ta cha ahneituhpa, azipazy ku liata apahnieh ta, Department lâ tawhta apha kawpa ta hmah la nawpa ta achhohiapa tyhpa a châ no ta, thokha cha tao phathi thei leipa ta, baona ngâlâh hnabeiseihpa ta ataopazy eima y pathlei khiah hmahsiena y aw vei tahpa ta a reih hra.

Puhpa K. Chhuabei he a viasanô Pihnô Nakho Solo ta zi hra ta, official lâ tawhta Puhpa N. Abela, CAO & RO, Vahia, Puhpa Beirokhu Beita, I &PO, Puhpa C. Rahre, AE(PWD), Puhpa Beipathai Hlychho, Surveyor, Puhpa B. Sawma, Cameraman, Puhpa T. Pabua, Operator zy ta zi ei ta, zawpi palôhpahawh awpa ta B. Priskili chhao a zi thei hra.

ISSUED BY:-

Information & Public Relations Department

Mara Autonomous District Council

Siaha.