Puhpa N. Zakhai, CEM, MADC ta Puhpa A. Saimaw châbu palâhâh

 

SIAHA, 23 Phiata, 2020 – Atanoh my dawh 11:00 Am liata Puhpa N. Zakhai, CEM, MADC ta Mara Officer hmiatua chaipa Puhpa A. Saimaw châbu ropa “Hnôh lâ daihti nata Keima” cha zawpi rei thei awpa ta Environment & Forest Department’s Conference Hall, MADC liata a palâhâh.

 

Palâhâhna liata Puhpa Laicho Nôtlia, Vice Chairman, Board of Mara Literature ta chhihtha ta, Rev. B. Beilua, Moderator Elect, ECM ta Thlahchhâna a hnei. Puhpa FC. Chhuasa, President, Mara Writers’ Club ta châbu thâtih reina (saichhieliena) hnei ta, Laihsa Chhingpuii Azyu ta mo pakha hlasana a hnei. Daihti chhâna lâ liata Pihnô A. Jenny (Puhpa A. Saimaw sawchanô) ta alynabie a reih.

 

Châbu palâhâhtuhpa Puhpa N. Zakhai biereipa peimawh viapazy:-

 

1. Marasawzy ta Mara Literature pasâhsana nata pabohsana liata hmahsie lymâ pi ta, aly’pa a châ hmeiseih. Mara reih, Hlabu nata Biehrai eima hnei vâta District Council ahmôpa eima châ. Mara chi nata pho abohna eima rei nahtazy, eima Council thâtih zy eima rei nahta eima Missionary (Rev. RA. Lorrain nah nôvâh) nahzy my thei’pa châ vei ei; atanoh lia chhao palôru hmeiseihpa ta eimâ theipa a châ.

 

2. MADC ta Art & Culture Department eima vaw hnei tawhta Mara chi nata pho pabohsana nata Mara reih pasâhsana liata Department tawhta hmah thata vaw la ei ta, (Mara reih) Châbu ropa liata hmah thata eima vaw siepa ta ei pahno. Kô 2 kô 3 avaw sie hapa tawhta kô 1 chhôh liata Châbu sâ 5 hlâta chyh via leipa ta Art & Culture Department, MaDC ta a vaw sponsor lymâ.

 

3. Atanoh liata châbu papua thei awpa ta apachhuahpanoh tuhpa Puhpa A. Saimaw hnohta chhao eimâ ly ngaita. Ano he Marasawzy châta ryusôh ngaitapa a châ tahpa ei rei khoh kaw. Eima Missionary, Vaili Mahnô nata Vaili Mahpaw kuzô zy cha thata vaw laiseihpa ta a thei vaw pathei lymâ ta, atanoh he Puhpa A. Saimaw chhao âmo theilâ châpa ta, kô 95 a vaw tloh tawhta a thyutlia daihti tawhta atahmâ taihta ta â tyhpa hmo zy châbu liata miah aropa theipa he, a hluhpi aki thei vei hra sala, arakhapa ropa ta, ano cheingeipa hmi chhao atanoh hmô thei pi ta, ei vaw ly ngaita. Ano he Missionary nah kuzô, Mongyu Pheisaih ry liata hmo chybia thaipasiana (experience) a vaw hneipa, Vaili mahpaw ta châ a pachupa a vaw ô hapa, atanoh liata miah a hrolâhpa eima hneipa châ ta, vâhnei â chhih ngaita.

 

4. Marapa chi nata pho thapasana liata bie ta, a theina khô lâ chhaota rai a hria tahpa, a châ papuapa tawhta vaw hmô na ta, a sôh ei tah ngaita. Chaleipa chhao ta eima râh he ryureina liata âsosâh thei nawpa ta PL (Pawi–Lakher) Regional Council tawhta eima nôpaw nahzy nata Abei nahzy chhaichhi hiabah sâkha vaw châ lymâ ta, India râh Prime Minister hmiatua chaipa Pandit Jawaharlal Nehru hmia liata Mara chi nata pho taozie nata lâ zy a zâ pamosapa hapa pakha a châ. Cha cha atahmâ he eima hnoh ta y ta, phôhpa châ mâh vei; aly â chhih hmeiseih.

 

5. Education lâ ta reih heih si la, ano daihti liata Primary School Teacher 320 appoint tuhpa a châ. Thokha cha chavah siena liatazy appointment piepa châ ei ta, arônah hmeiseih. Keimo CEM cha rei lei, Chief Minister hmahta cha hawh ta ei kha pi ta rai a la thei nahta pangiasa a chhih vei. Ano ta rai a piepa tawhta ama pathla saw nawh zydua pachâpa ta chyhsa hmâtlâh châpa nata hlaotlohpa a thy hlei ama tloh bâ nahta ei pangiasa.

 

6. Ano mo pakha thâtih he châbu ta ropa châ sala, a chha kaw nahta ei pangiasa. Mara chi nata pho kyhpachâ tuhpa, Mara Patriot dopa a châ hmeiseihpa ta ei pahno; ano he Mara Ryusôh Paw a châ tahpa ei rei khoh kaw.

 

7. Ano he Marasawzy châta kao hluhpi liata chyhsa hmiatuapa miah a châpa lymâ; Puhpa V. Hlychho zy ta Shillong liata châ amâ chu daihti liata ano ta châ paphao ta, MTP chhao he paduapa a vaw châ. Awnano lia chhao nôpaw miah a châpa pa, New Colony Awnanopa chhao he ano moh bipa a châ. 

 

8. He hawhpa chyhsa he Thyutliazy ta pasâhsana châh zy, cheihchalona châh zy vaw pahno khao vei hra ei sila, atanoh, he châbu he vaw roh papua ta, a châbu ropa a vaw reihpatuhzy ta novâhna, sona phapa nata pachâna kawhpazy a pie ei nahta ei pangiasa.

 

9. Achhâ chaina liata he châbu areih tuhpa zydua pathipalôrupa liata he châbu he hroh lymâ sa la, Mara chi nata pho thapasana, thyutliapazy ta ama vaw hnei lymâ thei nawpa ta Abei Khazohpa ta byhnâ pie sala, âmo nôvah chhao hropasina, hropareina byhnâ, Abeipa ta rie pie mawh ei sy tahpa ei khokheina sâh chaipa ei hlâ pâ ei. Ei châ ly kaw ei.

 

He palâhâhna liata MADC nôpawpazy tawhta Puhpa K. Chhuabei, EM i/c PWD etc. nata Puhpa B. Luaha, Vice Chairman (Planning) zy amâ hlao thei hra.

 

He Châbu he Puhpa A. Saimaw ta ano mo pakha hro liata â tyhpa nata a hnôh lâ daihti liata hmo â tyhpa thâtihzy rona a châ tah si la, tah chhei lei awpa châ ta, a chhôh liata tho 116 y ta, bo 39 lâ ta pachhaihpa a châ. A mâ he Rs.100/- ta zuapa châ ta, copy 500 taopa a châ. A copy a khohpazy châta BML Office, MADC liata chalei theipa a châ aw.

 

ISSUED BY:-

Information & Public Relations Department

Mara Autonomous District Council

Siaha.