Puhpa K. Chhuabei, EM, MADC ta Rev.Dr. FC. Beichô châbu palâhâh

SIAHA, 20 Phiata, 2020 – Atanoh dawh 11:00 Am liata Puhpa K. Chhuabei, EM i/c PWD etc. ta Rev.Dr. FC. Beichô châbu ropa “Ecological Problems in Maraland of Mizoram” châbu cha Environment & Forest Dep’t Conference Hall, MADC liata zawpi rei thei awpa ta a palâhâh.

He palâhâhna Programme he Puhpa Thaly T. Azyu, CF, MADC Siaha ta chhihtha ta, Rev. B.Beilua, Moderator Elect, ECM Assembly ta Devotion hnei ta, thlahchhâna ta daihti a pathao. Puhpa Rev. S.Vabeikhokhei, Assistant Professor, MTC ta châbu thâtih rei chhieliena (preview) hnei ta, Puhpa John Beizachhi Phuto nata Pihnô T.Merisa zy ta Khazoh reithaina hla ama sa. Puhpa JB. Chozah, A&CO nata Member Secretary, Publication Board, MADC ta Châbu taona report nata biereina chyupa a hnei. Author of the Book Rev.Dr. FC. Beichô ta alynabie reina nata a saipa ta châbu raina a hnei. He khai tawhta Rev.Dr.M.Zakonia ta thlahchhâna ta programme a pachhâ.

Châbu palâhâhtuhpa Puhpa K. Chhuabei, EM, MADC khichhai laipa (Chief Guest) bierei tlâhpi viapazy:-

Atanoh daihti pha kawpa miah pietuhpa eima Khazohpa lâta alynabie reih na ta, Châbu pha kawpa arotuhpa ta Châbu pha kawpa palâhâhna liata khichhai laipa châ awpa nata Châbu palâhâh awpa ta eina vaw raopa vâta a chô liata alynabie hlâ na ta a vaw hlaopa zydua zana chôta ei châ naoh ei.

ECM liata Moderator a châ ngahaipa ta he hawhpa châbu pha kawpa a vaw roh papua thlâhpa he aly'pa châ ngâsâ ta, Mara sawzy pi eima vâ a hnei ngaita.

Nga nata zyuhsyzy a yna dâh hawhta atanoh kô 26 a vaw khô tawhta a ydâh thata a vaw hli bâ. Kô 26 chhôhta cha hawhta a vaw châ khiahta cha atahmâ cha Meithei pha kawpazy vaw pua laih lymâ heih ta, kha hlâ nota pheita sai eima sie tyhpa kha atahmâ cha Motorzy vaw y laih lymâ heih ta kô 26 liata he tlu pi ta â vaw hlie khiah cha kô 50 liata chhochhi cha khatluta ma â vaw hlie aw. Mararâh liata pavaw hmô'pa y khao ma? Lyurâh liata sa hmô'pa a y khao ma? Chavah liata Zyuhsy dâhdei chhao he hmô'pa a y khao nahta pangiasa chhih vei. 

Eima Khazohpa ta eima Moderator a châ ngâhaipa hmâpa ta he châbu pha kawpa miah pie ta, Awnano lâ tawh chhaota pazu pavaw, etc pabohsa a peimawhzie he eima reih hluh via lymâ awpa a byuh ngaita. Awnano hleikhô ta, Political leader zy chhao, NGO, Village Council chhihthatuhpazy lâ chhaota thata hmah eima la awpa a peimawh ngâsâ. Forest Department (Government) ku lia ngâlâh ta sai thai'pa châ khao vei tahpa he âlâpasia ngâsâ.

Eima chyhno ta cha Zero tawhta Tipa taih he râhmâhpa châ ta, atahmâ cha râhmâhpa hmô awpa y khao vei. Motor lathlôh laipazy vaw pua ta, thata râhmâhpa ama parao. Palâ tipo nata a chhôh liata reserve eima taopa zy Tôkalô liata Sanctuary zy he Forest lâ tawhta reserve nano nanopa eima hneipazy rei leipa ta cha râhmâhpa phapa hmô'pa hnei khao mapi. Atahmâ ta eima siedâh pachâpa ta râhmâhpa parao via lymâ awpa eima lyu. 

Fall Armyworm ta chicheipa chhâmeih, sâh, etc thata parao ta, he Fall Armyworm he khaziama thata a vaw hluh eima tah khiahta cha kha Fall Armyworm nietuh awpa pavawzy kha thata thie pita, Fall Armyworm a nietuh awpa pavawzy y khao leipa ta chavâta Fall Armyworm he thata a vaw pôhpa a châ. Lôvapa Pavaw chata ama nie awpa pha kawpa, a Pavawpa eima thie lymâ ha tawhta Lôvapa a nietuh awpa y khao leipa ei ta, thata a vaw pôh lymâpa a vaw châ.

Dr. A P J Abdul Kalam Scientist châbu ropa sâkha ei reipa liata cha he tawhta kô 50 liata cha râh thokha liata cha ti (water) doh awpa rairuna thata tlô aw ta, zawpi bua ei ta Police zy taihta ti vaihpa ta thata ama bua aw a tah. Atahmâ kô 50 tlô mâh leipa pita, atanoh Mararâh leilôzy thata parao pi ta,  pavawzy thata thie pi eima tahpa he a pei ngaita kaw. Atahmâ ti eima rairu via lymâ, chyhsa eima pôh via lymâ. Atahmâ tawhta la palôh hnei kawpa ta Mararâh leilô pabohsa ta pazu pavawzy he thie khao ei achhuah chyu suh vy.

He Programme liata a vaw hlaopazy heta Châbu ama chalei chyu hra. Châbu mâ he bukha ta Hardbound he Rs.600 châ ta Softbound he Rs.500 ta chalei theipa a châ. ECM Bookroom liata nata daoh hropa liata pado (chalei) theipa a châ aw.

Chavâta he chi nata pho âboh n'awpa nata Abeipa Khazohpa ta a paduapa Mararâh laiseih lymâ n'awpa ta cha eima zydua ta ychakhyh, ziachakhyh khao leipa ta, eima nietluana chyu liata Abeipa Khazohpa khozie ta ypa ta, eima râh Mararâh leilô, pazu pavaw pabohsa chyu sih la, Khazohpa ta miah pabohsa awpa ta kao nano nanopa, py nano nanopa hmâpa ta â chhuahpa cha a hlao eima patloh thei aw. Chata leipa ta cha eima râh eima parao khai tlamaw aw. Eima dady chyu liata Mararâh châta nata Mara leilô châta tiama papua via lymâ awpa ta eimâ haw hmeiseih. Ei châ ly kaw ei.

ISSUED BY:-

Information & Public Relations Department

Mara Autonomous District Council

Siaha.