Puhpa K. Chhuabei, EM, MADC ta Laihsa Merina Hlychho Music Video Album palâhâh 

SIAHA, 15 Phiata, 2020 - Atanoh dawh 12:00 PM liata Laihsa Merina Hlychho, Maraland Idol 2017 "Ei chhôhso hneituhpa" Music Video Album cha MADC Forest Hall, Siaha liata Puhpa K. Chhuabei, Executive Member (EM), i/c PWD etc. MADC ta  a palâhâh. 

Palâhâhna Programme he Pihno T. Merisa, Secy. i/c Music, Mara Hlasa Py (MHP) General Headquarters ta chhihtha ta, Puhpa A. Thazi, President, MHP Gen. HQ ta biereina chyupa a hnei.

Puhpa John Beizachhi Phuto, Vice President, MHP Gen. HQ ta MHP Gen. HQ vyuhpa ta saichhieliena hnei ta, biereina chyupa a hnei. Rev. Z.Hrohmô ta Programme apavaosana thlahchhâna a hnei.

Khichhai laipa Puhpa K. Chhuabei bierei tlâhpipazy:-

Atanoh daihti pha kawpa miah pietuhpa eima Khazohpa lâta alynabie reih na ta, Album palâhâhna liata a vaw hlaopa zydua zana chô ta ei châ naoh ei.

Khazohpa ngiachhiena vâta Vahia khih he hlasa thaipa hluh kaw ei ta, Maraland idol chhao vâro vaw y ei ta, Vahia khih hlasa thaipa ama hluh zawhzi ta kei chhao khichhai laipa ta na hrua ty ei chi ta, ei châ ly kaw ei.

Kei chhao Khazohpa ta na ngiachhie ta, Lahpinô pha kawpa nata hlasa thai kawpa na pie ta ei ly hmeiseih. Ei lahpinô he Mararâh liata hlasa thai tua py, music cassette chhao a vaw taotuapa hry liatahpa vaw châ ta, ei ly hmeiseih.

Khazohpa ta Vahia khih he palôhliena zy, hla phi thaina zy, hlasa thaina zy miah pie ta, aly hmeiseih pi ta Mara reih he hla phi hluhna ta zy Mara hlasa hluhna tazy ta eima palaiseihsa lymâ awpa a byuh.

Khazoh biereipa ta thata miah sermon thlu ei ta, eima palôh miah pahnie tu khao leipa ta, hlasana deikua ta la eima palôh miah a pahnie kaw. Chavâta Khazohpa reithaipa ta Khazohpa hla chhao eima sa hluh via lymâ awpa a byuh. Mawrâh liata hlasa thai kawpa  Vanlalsailo ta maw hla a sapa nahthlie na ta ei palôh na hria thei vei, Mara hlasa thai kawpa ta Mara hla ama sapa ngâlâh ta ta ei palôh eina pahnie thei.

Khizaw liata râh hmahsie kawpazy he kheihta ma ama hmahsie eima tah khiahta cha ama râh hneirôna hmâpa ta tiama kawpa nata palôh hnei kawpa ta raihria ei ta, râh asosâhpa nata râh hmahsiepa ama vaw châ. Chavâta keimo Marasawzy pi he atahmâ tawhta la tiama papua chyu ei sih la, a rainao kawpa ta sôh nah thih lapa ngâlâh pachâ lei p'aw sih la, ku raihria hluh ta palôh hnei kawpa nata tiama kawpa ta raihriana liata eima tiama via lymâ awpa a byuh ngaita.

Sawhkhâ rai lia ngâlâh ta miah a tlôh khai thai'pa châ leipa ta cha hnaihta ku raihria lia heta palôh hnei kawpa ta tiama eima papua via lymâ awpa a byuh. Sawhkhâ rai lia heta arâpasua pi ta châhrasala sawhkhâ rai cha eima zydua ta hria awpa ta a khi thai'pa châ leipa ta, Siaha khihchhôhzy he eima za moh khiahta la Daoh tawtaw a hluh ngâsâ, ku raihria ta tiama papua awpa hlâ ta la, Daoh tawtawtazy tao ta, thadâh kawpa ta sôh nah thih la he a hluh via ta khoh pi ta a pei ngâsâ. Cha hnaihta tiama papua ta ku rai eima hria hluh awpa he a peimawh ngaita.

Chavâta he chi nata pho âboh n'awpa nata Abeipa Khazohpa ta a paduapa Mararah laiseih lymâ n'awpa ta cha eima zydua ta y chakhyh, zia chakhyh khao leipa ta, eima nietluana chyu liata Abei Khazohpa khozie ta ypa ta, nietluana nata ku raihriazy he pachâ peimawh chyu sih la, Khazohpa ta miah pabohsa awpa ta kao nano nanopa, py nano nanopa hmâpa ta â chhuahpa cha a hlao eima patloh thei aw. Chata leipa ta chi nata pho he disao pathlahpa eima châ pathlei aw tahpa ei vaw chi ngaita kaw. Eima dady chyu liata Mararâh châta nata Mara Chipho châta tiama papua via lymâ awpa ta eimâ haw hmeiseih. Ei châ ly kaw ei.

He Programme he MHP Gen. HQ ta a pachhuahpanohpa châ ta, Mara Writers Club zy hruapa ama châna hawh ta ahlao chyu hra ei ta, saihei kawpa ta Album ama chalei chyu hra. 

Machâ HC. Rochungsanga ta alynabie reina hnei ta, daihti pachhâsapa a châ.

ISSUED BY:-

Information & Public Relations Department

Mara Autonomous District Council

Siaha.