Puhpa K. Chhuabei, EM, MADC ta Link Drain, Quarter & School Building zy pahy

 

SIAHA, 15 Hmypi, 2021 – Puhpa K. Chhuabei, EM i/c PWD etc., MADC ta târi 11 – 13 Hmypi, 2021 chhôh ta a bia tlypa ta a ry liata palâsapazy he a pahy.

 

1. Link Drain with RCC Step, Vahia

2. Quarter of Headmaster & Staff, RMSA HSS, Vahia

3. Primary School-I Building, Lôpu

 

Puhpa K. Chhuabei chata pahyna Programme taopazy liata biereina chyupa hnei ta, he hawhta a bia liata ryu tlohpa sai sâ 3 pahy theipa a châpa he â lyzie a reih; bia zawpizy ta Khazohpa lâ liata alyna châ pahno awpazy, sawhkhâ lâ liata alynabie reina châh pahno awpa apeimawh zie zy reih ta, ahmâhtuh awpa zawpi, school hawti nata pachutuhpazy chhao ta ahmâ dâh thai awpa a khozie reih ta; eima hmo hneipazy mohôhna dâh thai awpa apeimawh zie a reih.

 

“MADC ry liata Teacher rai pahypa vaw châ ta, chyhsa 70 hlei lapa liata ama châ no ta ei bia chhôh liazy cha a exam awpa dâhdei chhao y ma pi; châ achuna kyh liata eimâ hnai kaw tahpa â vaw lâ pasia hmeiseih. He hawhta eima duahmo a châ no ta Vahia liata RMSA School zy a aw ypa he eima vâhnei hmeiseih. Vahia liata RMSA teacher nahzy he chyhsa phahnai ngiah kawpa, amô azia lei ta eima sawnahzy châ ama thai thei nawpa ta abuakhei hmeiseihpa ama châ tahpa âlâ pasiana cha eima result pha kawpa eima hmôpa tawh kha ta a châ. He RMSA HSS, Vahia liatahpa he Class-XI & Class-XII achu theina ryhpaohpa a châna hawh ta Vahia khih châ ngâlâh châ leipa ta Mararâh Notla lâta khih ypa zydua ta eimâ thôhkhei cheingei nahta eima hnabeiseihpa a châ.”

 

Vahia liata eimâ chu thlâh vâta eima thaina â hnai via aw tahna châ hlei vei – he liata eimâ chupa nata Mizoram chhôh liata School zydua eimâ chupa â lyu khai thlâh ha – Headmistress pha kawpa nata teacher tiama kawpazy eima hneina zawhzi ta he su tawhta akaw chu patlôpazy ta achhuahna pha kawpa eima hnei khiata la Pastor, Officer, MCS, Engineer, Doctor etc. zy eimâ kaw chu thei thlâh ha aw tahpa pahnona chô ta student zy ta tiama papua awpa ta eimâ pasyu hmeiseih tahpa ta achuhaipazy hnoh ta khokheina bie a reih hra.

 

Puhpa K. Chhuabei chata ary liata palâsapa, a bia liata phahnai ngiah kawpa ta chichei bialopa a chhei/taopazy hnoh ta baona châta a chi chaleipa ei ta, hlaotlohna pha kawpa chhao ama hnei nahta a hnabeiseih zie a reih:-

 

1. L. Beimau (Môchhi) (Pharili Paw), Lôpu – Chohlô (cabbage).

2. Puhpa B. Mahawi (Beirasa Paw), Tomato nata Âhrâ.

3. B. Khepha, Lôpu (Laki) khihpa Kâchhao saihpa (Onion) nata Alu.

4. Puhpa L.Vatle, Siachô Paw, Lôpu – Chohlô.

5. Pihnô H. Nôkha (Felory Nô) Âhrâ nata Watermelon (Theichakuapa), Lôpu-I.

6. Puhpa KC. Deichhy (Hryuzi Paw) - Chhamei nata Âhrâ thi hneitupa, Lôpu-I.

7. Puhpa HC.Vahnei (Byhna Paw) Lôpu liata Alu thih. Diahdy tao nawpa khaoh 700 a chaopa.

8. Lôpu khih liata Puhpa L. Beimau (Pharili Paw) - chohlô.

9. Pachhua Lava (Ebera Paw) Lôpu-III - Chohlô.

 

Puhpa K. Chhuabei he ta a bia liata ku raihriapazy hnoh ta atakô chhao phahnai ngiah kawpa ta hria awpa ta ahawna tao ta, sasyh ativy awpa apeimawh zie a reih; Chi nata pho ta miah paduatuhpa eima Khazohpa angiapâtuhpazy pi ta Missionary Sponsor kyh liata eima tiama via awpa apeimawh tah ta, Missionary Sponsor nawpa sôh thyu thei awpa ta cha eimâ tivy tua abyuh vâta ku raihriapazy ta eima tiama via lymâ awpa apeimawh zie a reih. 

 

He pahyna khitlyna liata  Puhpa B. Luaha, Vice Chairman(Plg.) ahlao hra ta, Puhpa T. Seido, MDC, Puhpa C. Rahre, AE, PWD, Puhpa Pawsa Lava, AITO, Puhpa T. Pabua, Operator, Puhpa H. Hmôchhua, Forest Guard zy ta zi ei ta, Puhpa John Beizachhi Phuto, Artiste nata Laihsa Jessica B. Khuhly, Artiste zy ta Vahia liata programme liata ahlao awpa ta zi ei ta, a viasanô Pihnô Nakho Solo chhao khitlyna zydua liata a zi hra.

 

ISSUED BY:-

Information & Public Relation Department

Mara Autonomous District Council

Siaha.