PRESS RELEASE No.12/2021

SIAHA, 14 Hmypi, 2021 -  Siaha District Football Association(SDFA) Zone thiehpa “Chakhei Zone” târi 13 Hmypi, 2021, Pachynoh dawh 12:30 Pm pa ta Puhpa Beirahmo Syhly, EM i/c Sports & Youth (MADC) nata President, Siaha District Football Association (SDFA) ta a pahy.

Pahyna Programme he MTP Branch: Chakhei-I Information Centre cum Office, Chakhei Vaihpi liata ahmâpa châ ta, Puhpa Amos Khithie, President, MTP Sub-Headquarters: Chakhei ta a chhihtha; Machâ HT. Mawsi, Secretary, ECM Local Church: Chakheitlâh ta Programme pavaonasa thlahchhâna daihti a hmâh.

He pahyna daihti liata atliata liata chhâzaw râh lâ miah siesai hapa CL. Vabeichhuasa, Goal Keeper, Chakhei FC taokheina châta adua hmahta minute sâ 1 chhôh  ‘moment of silence’ daihti hmâpa a châ.

Chakhei biatuhpa MDC Puhpa K. Hrahmô, EM i/c Edu. (MADC) nata a viasanô Pihnô B. Ngiaso chhao, he programme he ahlao ei ta, Puhpa Hrahmo ta Chakhei Zone ôna liata thyutliazy châta tha patlôna bie nata pasyupalina bie pha kawpa a reih. 

Puhpa Khusa Khaila, Honorary Secretary, SDFA, Siaha ta Technical Report pie ta, Laihsa T. Cassidy, Asst. Secretary i/c Property, SDFA, Siaha ta SDFA moh ta Zone thiehpa châta Office siekhei nawpa chhaichhizy, Chakhei Zone OB zy châta Designation Plates nata Football sâ 3 zy Puhpa Salua Chozah, President, SDFA Chakhei Zone hnoh ta a hlâ.

Puhpa FC. Nâhlô, President, Village Council & Court, Chakhei-II ta Chakhei Joint VC (VC sâ 3) vyuhpa ta biereina chyupa daihti hmâh ta, Laihsa Suna Chanô ta Mara pho hla sapa ta Chakhei Zone pahyna hla a sa. 

Daihti chhâna lâ liata Puhpa Beichhao Thlyutha, President, Chakhei FC ta alynabie reina a hnei.

Puhpa Beirahmo Syhly ta Chakhei Zone a pahy khai tawhta biereina chyupa reina daihti hmâh ta, ary liata palâsapazy he a bierei tlâhpi viapazy a châ:-

“Chakhei Zone pahy awpa ta eimâ pahawhpa daihti miah tlôkhei tuhpa eima Khazohpa hnoh ta alynabie reih na ta, atanoh liata miah ahlaopa Chakhei biatuhpa Puhpa K. Hrahmô, EM i/c Edu. MADC, SDFA liata ei hrialâhpazy, MADC Official lâ tawhta miah ahlaopa Puhpa Beirokhu Beita, I & PO, Chapi, Mawhrei, Chheihlu, Chakhei & Siasi liata MTP nôpawpa nata Club leaders a vaw hlaopazy, Chakhei VC nôpawzy, khitlâh nôpaw hrua eihpa zydua, SDFA, Siaha vyuhpa ta châ naoh ei na ta, alynabie ei cha hlâ ei.”

“Ahmiatua ta Chakhei Zone pahy theipa a châ vâta châ lykhei ei na ta, Chakhei Zone ôna liata ypa khih zydua chhao alykheina nata khokheina ei cha hlâ ei.”

“Eima Thyutliapazy ta Football he neitluana châta hmâh thei ei sala tahpa he SDFA ta eima kho chaipa a châ.”

“Sports Discipline nano nanopa hry liata eima thyutliapazy ta nietluana taihta eima hmâ thei awpa ta eima hnabeiseihpa hry liata sâkha cha Football he a châ.”

“Atahmâ he Mizoram chyhsa, Mizoram khôtho lâta akhaih thei awpa ta Club phaphazy ta ama chaleipa Footballer 20-30 tlai hnei pi ta, he liata eima District tawhta pa 2-3 eimâ hlao ha hra. He nahzy hlao he season sâ 1 liata Rs.18.00 Lakhs – Rs.50.00 Lakhs taih a châ.”

“He hawhta lymâ pha kawpa y thlâh ta, eima thyutliapazy ta talent pha kawpa hnei ei ta, pari theipa nata pa-ôpazypazy tao leipa ta ama Talent pha kawpa ta ama hmâ lymâpa ta a châ khiah, Football liata hmah lapa ta nietluana châta hmâh ei si la, chhôhkhazy mohôh thei ei si la tahpa he Siaha District Football Association zy ta eima bietahpa nata eimâ pachu chaipa a châ tyh.”

“He hawhta ta hmah lana kyh liata sie vawna nata communication (azaona) zy apha tyh lei vâta Siaha tawhta hmah la thlâhpa ta cha Mara khih thokha liata eima thyutlia nah, Talent ahnei pha kawpazy kha vaw pahno thei khao tyh lei pi ta, cha nahzy thao papua awpa ta cha Agent he byuh ha ta, keimo SDFA châta Agent a châ awpa cha atahmâ ta eima pahy haipa Zone zy nata eima Club chhituhpazy he ama châ.”

“He hawhta a châ vâta Zone he pahy awpa ta SDAF Executive Committee ta paryhsapa châ ta, Zone pahy awpa liata ahiahpa hluhpi ama y taraw no ta Chakhei Zone pahy theipa a châna chhâpa he thliena (Criteria) hluhpi hry liata Chakhei he Executive Committee ta pahy awpa ta vaw paryhsa ta, chahleikhô ta Chakhei biatuhpa MDC Puhpa K. Hrahmô, EM i/c Education, MADC ta, keima padisaihpa tlai thata navaw hiah tyh ta, Chakhei bia liata thyutliapazy châta thata hmah lapa ta khokheina a hnei vâta nata thapi a phiah vâ chhao ta atanoh liata Zone eima pahypa theipa châ ta, he hawhpa thyutliapazy apachâpa biatuhpa nama hneipa he vâhnei â chhih kawna tahpa ei vaw rei khoh pâ kawpa a châ.”

“SDFA he ta Fund hnei lei pi ta, Mizoram sawhkhâ tawhta Siaha DC nata District Sports Committee siepahliepa ta sôh he kô 1 châta Rs.1.50 lakhs – Rs.2.50 lakhs zy ngâlâh dao pi ta, Sports Discipline nano nanopa ahluh kaw vâta eima to awpa chyh kaw sai ta, Football he major games a châ vâta Rs.20,000.00 – Rs.30,000.00 zy miah ama pie tyhpa a châ. He hawhta sôh duahmo rairupa eima châ no ta eima MLA nahzy nata eima Council nôpawpazy zawhzi ta SDFA he asie theipa eima châ.”

“Chakhei Zone eima vaw pahy no he ta nâmo châ chhao ta amohôh nawpa arairu ngâsâ aw tahpa eima pahno. Sôh la nawpa (Fund source) chhao y leipa aw ta, keimo hawh pyly ta ku ruapa ta aduah aw ei chi ta, ku ruapa ta hmah ala awpa nama châ tahpa pahno pi ta, kaokha lâ pachâpa ta cha eimâ châ ngiaroh khei ngaita kaw.”

“Anodeikua khitlâh nôpaw pha kawpazy nata NGO thatlô kawpazy hnei ei chi ta, chahleikhô ta biatuh MDC nata MLA apahnieh tlâh a châpazy y ei ta, âmozy angâhchhâna chô ta nata Chakhei Zone liata khih a ypazy hriaparaohna ta Chakhei Zone he a sie lymâ thei nahta eima hnabeiseihpa a châ.”

“Khitlâh liata nô nata paw zy tawhta deichhyna-support chhao eima peimawh kaw aw tahpa ei rei khoh kaw. Eima thyutliapazy he ta Sports liata hmah vaw siepa ta ama vaw pahâh hmeiseih khiah eima Nô & Paw zy liata pocket money zy châ hia khao aw ma pi; nama châta rai hria tuhpa tlao eima vaw châ ha bâ aw tahpa miah nama pahno khei awpa ta ei reih khoh ngaita kaw.”

“Sports eima taopa vâta eima sapa hnatlâna vaw pha sala, eimâ vaw huatlâ khiata la pa-ô pazy tao khao leipa aw pi ta, pari theipa tao khao leipa aw pi ta, phusâ hmâ chakhyh nawpa y khao aw vei; chhôhkha pabua khao leipa aw pi ta, chhôhkha châta khâpa ma aphahnei aw, khâpa eima hria thei hra aw tahpa he thyutliapazy ta palôh eima phaoh tyh. Chavâta eima pahâna Sports liazy he ta eima nô/paw zy chhao ta miah pahâ khei hra u la, tha miah patlô u la, nâmo aly nawpa hmozy eima tao thei hra aw na tahpa ei rei khoh kaw.”

“Khitlâh nô & paw zy chhao miah nama bao theina kao hluhpi a y aw - Sawhkhâ phana zawhzi ta Job Card zy asaipa ta hria awpa y ta, he liata palôh hneipa ta Club zy Zone zy amohôh nawpa ta miah nama bao thei nahta eima hnabeiseih. He hawhta miah nama deichhy theipa ta a châ khiah biatuhpa MDC zy, biatuhpa MLA zy asaohiahna chô ta Zone he hmah sie  aw ta, eima thyutliapazy ta ama palaopalâna liata hmah ama sie lymâ nahta hnabeiseihna lai kawpa eima hneipa a châ.”

“Khahlâ via nota tharôhpa ta a champion-pazy vaw y pâ tyh ei ta, buana chhao a hluh kaw tyh. Atahmâ chhâ lia deikua fair kawpa ta amâ khaih thei awna ata Referee zy Training piepa châ ei ta, chahleikhô ta atahmâ chhâ liata buana ataopazy nata reihrao akhaohpazy cha player list liata pahlao leipa ta Club member tawh chhao ta drop awpa a châ. Chavâta eima thyutliapazy he ta ama thaina zydua cha ama hmâh thei lymâ bâ tahpa eima pahno awpa a châ.”

“Player athai kawpa ta, apathi chhie kawpazy ama y khiah, cha nahzy cha athaipa tloh vei ei; pathi achhie kawpa chyhsa eima châ khiah eimâ tao pathi awpa a châ. Athaipa atloh awpa ta cha akhaih thaipa dei châ leipa ta kao totie liata dao thei ta, palôh naipa ta ama vaw tah tlamawpa chhao ta pachâthaina ahneipa chyhsa ama châ awpa apeimawhpa a châ.”

“Atanoh Chakhei Zone eima pahyna daihti liata miah nama pahno khei awpa ta ei rei khoh kawpa cha Chakhei Zone liata hnabeiseihna laipa eima hnei tahpa he a châ;  chavâta eima cha hnabeiseihna nata saduthliena hawhta hmah vaw la u la, he Chakhei Zone tawh he ta State Level nata International Level taihta puapha awpa nama vaw papua awpa nata player nahzy niebaw tluana khi a châ awpa ta player phapa nama vaw papua cheingei awpa ta khoh ngaita pi ta, eimâ châ hnabeiseihpa châ ta; cha cha hlao miah nama patloh awpa chhao ta eimâ châ hnaw hra.”

“Atanoh Zone eima kaw pahyna liata miah nama daodona zy nata miah nama welcome-na zydua vâta palôh hmeiseihpa ta alynabie ei cha hlâ ei. Ei cha ly ngâsâ ei.”

SDFA Leaders, Siaha tawhta akhytheipazy:-

1. Puhpa Beirahmo Syhly, President

2. Puhpa Khusa Khaila, Honorary Secretary.

3. Laihsa T. Cassidy, Asst. Secretary i/c Property

4. Puhpa KT. Neikha, Executive Member

He Chakhei Zone pahyna liata Chakhei Zone ôna chhôh liata y awpa MTP Branch (Chapi, Mawhrei, Chheihlu, Siasi) nôpawpazy vaw tlô khai ei ta, Puhpa Beirahmo Syhly, President, SDFA, Siaha nata a hrialâhpazy hnoh ta Pawpi hlâ chyu ei ta, ama Branch chyu tawhta leader a vaw tlôpazy hmiapahnosana ama hnei hra.

Zone pahy khai tawhta General Election hnei awpa a châ taraw no ta, Zone pahy tuana achâ vâta khito liata MTP Branch nôpawpazy ta Chakhei khih liata apahrâpazy he OB châta atlyna hnei awpa ta khona reih chyu ei ta, chavâta ama khozie hawhta Official lâ tawhta Candidate ama taopazy cha ama post awpazy paryhpa ta apykhei khaipa a châ. Ary liata palâsapazy he kô 2021-2022 châta atly patlohpazy ama châ:-

OFFICE BEARERS:-

President - Puhpa Salua Chozah (Chakhei-I MTP vyuhpa)

Senior Vice President - Puhpa C. Beireithai (Joint VC vyuhpa)

Vice President - Puhpa K. Ngohra (Chakhei-II MTP vyuhpa)

Honorary Secretary - Puhpa Robert Clive Chozah (MSO Sub-HQ vyuhpa)

Joint Secretary - Puhpa T. Vabeichhitha (Chakheitlâh MTP vyuhpa)

Finance Secretary - Puhpa Elvis K. Khaimeichho (Chakhei FC vyuhpa)

Treasurer - Laihsa TT. Neisi

Achô liata palâsapazy he SDFA: Chakhei Zone châta khitlâh liata ahriaparaohna phapa y thei nawpa ta NGOs nata VC zy tawhta vyutuapa hawhta OB châta raopa châ chyu ei ta, He OB nahzy he ta MTP Branch to tawhta Executive Member pa 1 chyu nata Adviser, Patron nata Auditor zy ama rao khai tawhta SDFA Siaha lâ pahnosana ama tao awpa achâ.

Election hnei khai tawhta hrua-eihpazy nata khichhai avaw tlôpazy châta kyhchhina achhuahnohpa cha dôlâhna hneipa a châ.

Chakhei Zone liata y awpazy cha MTP Branch hawhta – Chapi-I, Chapi-II, New Chapi, Mawhrei, Chheihlu, Chakhei-I, Chakhei-II, Chakheitlâh, Siasi zy a châ. He MTP Branch chhihthana ry liata tly ma, a khih hawhta tly ma Football Club padua chyupa châ ta, District Level liata akhaih awpa ta Chakhei Zone liata pahnokheina ama hnei awpa châ ta, Club member fee chhao Chakhei Zone liata pangia awpa a châ hra.

ISSUED BY:-

Information & Public Relation Department

Mara Autonomous District Council

Siaha.