PRESS RELEASE No.11/2021

CHAKHEI, 2 Hmypi, 2021, Hriaheinoh - Atanoh kha Government Primary School, Chakhei-I liata atakô AYUSH-MSO General HQ: Siaha High School Quiz Competition 2021 liata Champion - Chakhei MSO Branch vyuhpa ta apuapa K. Vabeihneikhai nata Eleni Chozah zy alykheina Programme ahmâpa châ ta, he liata Puhpa K. Hrahmô, EM i/c Edu. MADC cha Chief Guest châpa ta alyna programme he a hmâkhei.

Alykheina Programme he Puhpa Laichô Chozah, President, MSO Sub-HQ: Chakhei ta chhihtha ta, Rev. Jimmy F. Sachai, ECM Chakhei Biatuhpa ta Devotion hmâh ta, 

Chief Guest Puhpa K. Hrahmô chata atanoh liata Chakhei sawzy tawhta Mararâh pôpalôh pahlypa ta Competition liata sâkhana eima châ theipa he arônah a tah zie reih ta, Champion Team zy alykheina bie hlâ ta, kao totie liata âmo deichhytuhpa Nô & Paw lâta alynabie reih ta, Chakhei MSO Branch leader zy siana zawhzi nata ryhrao thaina zawhzi ta Champion ama châ thei vâta Chakhei MSO Branch lâ chhao alynabie a reih hra.

“He Champion Title khochhih kawpa avaw daotuhpazy he tiama kawpa ta châ achupa châ ei ta, heihzy ta Mobile phone liata Games akhaih ei ta, Korean Movies zy ama mo ngâhaino ta apahâ leipa ta châ avaw chu hnolopazy châ ei ta, amâ chupa Course zy pahnopasiapa ta tiama kawpa ta châ areih tyhpa ama châ.”

“He eima nawhta nawhzy hlaotlohna tawh he ta achuna he ta Khipi viapa nata supi viapazy liata achu byuh cheingei hlei vei; achupa bu alyu khai ta, kheihawh su tawh rai ta hlaotlohna to theipa a châ; Chakhei liata achuhaopazy dei châ leipa ta Mararâh thotlâh viapazy liata châ achuhaipazy ta taotheina eima hnei khai tahpa pahnopa ta achuna he pachâ peimawh awpa apeimawh hmeiseih.”

“Mongyuh reih ta ‘God helps those who help themselves’ ama tahpa hawh ta Khazohpa ta eima hriapasana nata tiama liata miah a bao tyh; ahriapasa leipa nata tiama leipa chyhsa cha eihluhpi thlahchhâ hra ei sala hlaotlohna ama to thei nahta hnabeiseih achhih vei.”

“Eima manôh nata mahpawzy hriapasana nata thlachhâna byhnâ to awpa ta keimo he eima hriapasa awpa nata eima tiama awpa apeimawh tahpa pahnona chô ta achuhaipa zydua ta, y chakhyh thlâh leipa ta, atanoh liata hlaotlohna he ta pahaona châta hmâpa ta tiama papua via lymâ awpa ta eimâ pasyu hmeiseih.”

Fecilitation Programme he MSO Branch: Chakhei ta a pachhuapanohpa châta, my dawh 11:00 Am liata pathaopa châ ta, zâlâ dawh 3:20 pm liata pachhâpa a châ.

MSO General Headquarters: Siaha tawhta Puhpa Judson KT. Zephatha, General Secretary cha Guest of Honour châ awpa ta ahawpa a châna hawhta ahlao kaw patloh thei ta, a hrialâhpa Puhpa John Tennyson Tlapyu, Finance Secretary, Laihsa Daphhney Lapi, Executive Member nata Laihsa Florence, Artiste zy ta ama kaw zi thei hra.

Alykheina Programme liata biereihtuhpazy ta Educational Awareness lâ aheipa ta biereina hnei pâ chyu ei ta, alyna châta Seihtôhpa nata Vao hmâpa ta kyhchhina pachhuahpanohpa cha programme chhâ tawhta programme avaw hlaopa zydua ta dôhpa a châ.

Seihtôhpa he Chakhei Joint VC zy ta avaw tôh ei ta, Vao he Eleni Nô & Paw ta amâ vaw tôh.

Chakhei liata School ypa zydua liata achuhaipa zydua hruapa châ ei ta, Chakhei khih puasaipa ta su hro lâta châ achupa zydua hruapa ama châ hra. He nahzy hleikhô ta khitlâh nôpawpazy, VC sâ 3 liata nôpawpazy, NGO leaders zy, Teacher Pensioners nata Chakhei liata ECM Local Church sâ 3 ypa liata Awnano nôpawpazy hrua khaipa ama châ.

Alykheina châta Schools nata NGOs zy ta Ryuchâ nata sôh lâta zy hlâ chyu ei ta, MSO Branch: Siasi zy ta alykheina programme amâ kaw hlao hleikhô ta alykheina Ryuchâ ama hlâ hra.

Puhpa K. Hrahmô he a viasanô Pihnô B. Ngiaso ta kaw zi ta, Puhpa Beirokhu Beita, I & PO ta a kaw zi hra.

ISSUED BY:-

Information & Public Relation Department

Mara Autonomous District Council

Siaha.