SAIKAO, 15 Phiapi, 2023, Pakhynoh - Ary liata palâsapa he atanoh Saikao liata Pihnô Vaili ri pathliena liata Puhpa M. Laikaw, Hon’ble CEM, MADC biereipa a châ:-

“Atanoh eima Missionary hnôh chaipa Rev. VLA Mark ri pathliena liata MADC vyuhpa ta daihti ei vaw to theipa he noh hlao a tah na ta, MADC CEM zydua hry liata vâhnei patluapa ei châpa vâta ei ly hmeiseih.”

“Khazohpa ta a chyhsa taopazy pachha ta ano lâta eima kua heih thei nawpa ta, A saw chapaw Zisu Krista khizaw lâ tuapa ta chyhsapa sapa nata thisaih ta he khizaw liata daihti chyuta chakaona a hmâkhai tawh ta Cross liata pachhana rai a pangoh haw. Keimo Marapazy sapa nata thlahpa pachha papua awpa ta eima Missionary R.A. Lorrain & a viasanô cha nohtla beih lei Abeinô râh puasaipa ta 26th September, 1907 ta Maraland Saikao khih leilô tlypa ta, eima hnohta sapa tlaita maniah a vaw pahralâh haw. A paka tawhta Abeipa bie puapa chata Marapazy cha thina zohna tawhta pachhapa ta Krista khaihpa sawzy pachâsapa ta eima vaw châ haw.”

“Krista pheisaih riahphapa R.A. Lorrain & a lapinô Maraland liata maniah ama vaw pahrâlâhna tawhta, a saw, a samohnô atanoh ta miah a siesai hapa taihta Marasawzy hnohta Kô 116 tlai maniah ama ypâ hapa châ ta, atanoh cha eima Missionary nah sapa, pôhpa miah ama siesai chhâna noh eima vaw tlô haw; sasapa mopa ta cha hârapa hawh ta eima vaw châ hapa ta za pachâ na ta, Marapazy châta nôpo achhih ta, eima chana, arôhna nata mâchhie eima sana noh a vaw châpa ta ei pahno.”

“Anodeikua keimo Marapazy hawh ta Kô 100 hlei taihta ypa ta, ama thi khô lâ chhao ta a râh leilô liata apabu khaipa Missionary khizaw liata ama y vâ tly ma? Mara phopi reih pangawh hmâpa châta Missionary papangaw miah pie ta, eima râh leilô tawhta  vy heihna hâpa ta maniah ama ypâ thlâhpa he pachâ na ta, khizaw liata phopi vâhnei chaipa, a eihrâh kawpa ta Khazohpa khokhei patluana a topa eima châna he my khah ei suh u.”

“Eima Missionary-zy hmâpa ta, sapa nata thlahpa (Awnanopa nata Council) ryureina, Abeipa ta maniah a paduapa haw, eima Missionary zy chhâthôh taih mia ama ypâ chhôh ta, a eihrâh kawpa ta Abeipa ta maophaona A pie ei, R.A. Lorrain & a viasanô ta thâtipha chhâzaw hrona bieparu miah pavaosa ei ta, ama sawnah (Vaili Nô & Paw) zy ta, Awnanopa nata Council ryureina eihrâhpa maniah ama paduapa haw. Atanoh ta eima Missionary hnôh chaipa a Mission cha Marapa Missionary Avnanopa pyno lâta apachhaih hapazy a pôhkhana rai a châ. A hrochhôh ta a Mission hlao eima patlohsa thei leipa he pei ei tah hmeiseih. Eima Missionary hnoh chaipa nata Paw Khazohpa palôh apasa kaw thlyuna; rie maniah a ngiahthai ei sala. Atanoh keimo deikua a kyh eima pachâ hra khiatala, a Mission hlao apatlohsatuhpa eima châ chyu awpa ta a hrua pi ta, eimâ haw.”

“Abeipa ta a siesaipa chhôkha nata Marasawzy hnoh ta A khih nata râh athiepa ta vaw patlôsa mawh sy.”

“MAY GOD BLESS MARALAND”