SIAHA, 29 Phiapi, 2023, Pakhynoh – Atanoh my dawh 7:30 Am kha ta Pihnô R. Lalrodingi, Director, Tourism & Industries, North East Council (NEC), Shillong ta MADC Industry Department vaw tlypa ta apakyhna pha kawpa hneipa a châ.

Apakyhna he MADC Industry Department Staff room liata programme chyupa taopa ta hneipa châ ta, Puhpa K. Chhihrau, Executive Secretary, MADC ta chhihthapa ta, Pihnô K. Pari, Founder, MCHP ta pavaosana thlahchhâna a hnei. 

Puhpa MH. Tiabi, EM i/c Industry etc. ta MADC vyuhpa ta khichhai phapa Pihnô R. Lalrodingi nata a kaw zipazy hnoh ta alynbie reina hnei ta, MADC Industry Department hmahlana kyh liata abyuhna dâh hawhta mokhei tah hmahlakhei lymâ awpa ta ahawna a tao.

Pihnô R. Lalrodingi chhao biereina chyupa daihti piepa châ ta, NEC ry liata ano Department topa mahlanazy reih ta, a theina hawhta MADC nata Mararâh châta hmah lakhei lymâ â chhuah tahpa a reih. He hleikhô ta Mararâh he Tourism lâchhâh hmahla via awpa a peimawh tah ta, zawpi athôh thei awpa project nata Tourist-zy châta tlôkiana awpa (Homestay etc.) chhao pachâ peimawh awpa a pha tahpa a reih. 

Pihnô R. Lalrodingi he Pihnô Malsawmdawngliani, Sr. EE (Bldg.), Lunglei Division nata a hrialâhpazy ta kaw zi ei ta, Shillong tawhta he hawhta Mizoram a kaw tlyna chhâpa he DoNER (Development of North Eastern Region) Secretary thiehpa bie hawhta NEC ry liata Project ama hneipazy asu tly khai awpa a tah vâta châ ta, Siaha liata NEC tawhta project ama hneipa MCHP Dropping Zone Building apazaopa ta Mara Handloom Project O sa ngâhaipa mo awpa ta Siaha lâ he akhy tôhpipa a châ.

Daihti chhâna liata Puhpa K. Chhihrau, Executive Secretary ta alynabie reina hneipa ta apakyhna daihti pachhâsapa a châ.

Pihnô R. Lalrodingi he MADC Guest House, New Siaha liata patlôsapa châ ta, Siaha liata a tlôkiana nata hmoto zydua MADC ta buakheipa a châ. Zâhnia târi 29.11.2023 kha ta Siaha kaw tlô ta, atamy he Lawngtlai pangaipa ta a sie.