PRESS RELEASE

NO.117/2024

SIAHA, 22 Phiapi, 2024, Chutynoh – Atanoh dawh 1:00 PM kha ta Siaha khichhôh liata Variety Store lai viapa a hneituhpazy cha Pihnô Nazee Khailah, Senior Revenue & Settlement Officer (Sr. R & SO), Mara Autonomous District Council (MADC) ta a official chamber liata awpakhypa ta apakyhna daihti a hmâh.

Pihnô Nazee chata atanoh liata meeting a awna chhâpa cha, nohto peimawhpa essential commodity-zy, adaihtita liata chalei awpa a y khao tyh lei vâta zawpi ta rairuna eima tyhna kyh a châ tahpa a reih. He hawhta rairuna a yna chhâpa cha foreign lâ supply awpa ta MRP hlâta a mâ ru viapa ta ama zuah tyh vâta a châpa ta pahnopa a châ. 

He kyh liata Pihnô Nazee chata, Siaha liata daoh lai viapazy he, zawpi rairuna pathlâtuh awpa ta hnabeiseihpa châ ei ta, chavâta Siaha District châta hmo ama la tyhpa nata ama zua papua tyhpa hawhta ama daoh zy cha siekhei awpa ta chho ei ta, demand â sâh kaw khiahta cha a hluh via order ei sa la, Mararâh he aphahla hleipa ta miah pazaosa awpa ta daoh hneituhpazy a chho ei.

Chahleikhô ta, sao chhôh ta hmo mâ rate a ru via tyhpa cha pahno thaipa châ ta, sao a chhâ tawhta cha a mâ tyhpa hawhta zua heih awpa ta chho ei ta, MRP hlâta ru viapa ta hmo zua lei awpazy, expired chiehpa zua lei awpa zy, sikhar nata cigarette, dâh ta a pasai leipa zua lei awpa zy, sahphâ kg. tloh leipa zua lei awpa zy, weighing scale dopa hmâ awpa zy nata daoh hmo liata paritheipa a phaoh pâpa ama y khiatala ama daoh license cha cancel theipa a châ aw tahpa a chho ei. 

Pihnô Nazee chata, daoh a hneituhpazy cha ama polite kaw awpa châ ta, riethei viapa nata sipasa viapazy nata hneirôh viapa nata hmiamo y viapazy pathluana hnei leipa ta ama daoh liata a vy tuapazy cha hmia pasah ta, akhokhâh kawpa ta ama customer nahzy cha vaw mohôh awpa ta pasyupa ta a chho pâ hra ei.

He daihti liata Siaha liata daoh hneituhpazy chhao ta ama rairunazy cha Sr. R & SO hnoh ta tlôkheipa ta reina hnei hra ei ta, Sr. R & SO biereipazy cha zy ama chhuah aw tahpa bie amâ taih hra.

Pihnô Nazee Khailah, Sr. R & SO he a ry liata officers Puhpa H. Beiradua, RO (Trade) nata Puhpa L. Lalduhkima, RO (Trade) zy ta chakaochahlâh ei ta, daoh hneituhpazy pahno awpa hmo peimawhpazy reina nata chhopasiana ama hnei hra.

I & P Department tawhta Puhpa BeiRôkhu Beitâ, I & PO nata Puhpa Martin L. Hlychho, Cameraman zy cha, hruapa ama châna hawhta he meeting he amâ hlao thei hra.

ISSUED BY:

Information & Publicity Department

Mara Autonomous District Council

Siaha.