PRESS RELEASE

NO.23/2023

SIAHA, 2 Hmypi, 2023, Pobienoh - Atanoh dawh 3:00 Pm pa ta Pala Welfare Committee, Siaha zy ta Puhpa Beirahmo Syhly, EM i/c RD etc. MADC cha a office chamber liata alykheina programme ama hmâh.

Alykheina liata Puhpa KT. Dena, Vice Chairman, Pala Welfare Committee, Siaha ta chhihtha ta, Puhpa A. Thykhu, Chairman, Pala Welfare Committee, Siaha ta alykheina Ryuchâ hlâna a hnei khai tawhta alykheina bie nata pasyuna bie pha kawpa reih ta, Pala khihsawzy byhnâ topa nata Khazoh kyhpachâna bie reihpakawh ta, Puhpa Beirahmo ta râh chakaona kyh liata rairuna â vaw tyh ti ta Khazohpa liata apahnieh awpa ta bieta ta, Biesozy 22:1 bie hawhta hneirôna hlâta mohphana atlyh awpa ta a pasyu.

Chairman ta biereina chyupa daihti pahy ta, Puhpa Vabeikhaihmo Solo, SCO ta biereina chyupa daihti hmâh ta, Welfare leader nahzy hnohta khih nata bia hmahsie nawpa ta aphana lâta biatuhpa liata ahawna nata pasyuna pie tyh awpa apeimawh tahpa reih ta, a sia leina nata tloh leina liata phana ta pabiepa ta, thlahchhâ khei lymâ awpa ta pasyunabie a reih.

Dr. Beizakaw Vytu, Asst. Secretary, Pala Welfare Committee, Siaha chhao biereina chyupa nata EM alykheina bie a reih hra. 

Puhpa Beirahmo Syhly, EM zachhihpa chata alynabie reina chyupa daihti hmâh ta, daihti khôchiehla liata a bia liata hmo a taochheipa hluhpi a hneipa cha pei a tahzie reih ta, atahmâ tawhta taochheipa hnei khao lei awpa ta asohsina chô ta sie â chhuahna kyh liata thlahchhâ bao awpa ta Pala Welfare zy ahaw ta, bia châta raihriana liata abyuhna nata ângiahna dâh hawhta pasopakâ lymâ awpa ta ahawna tao ta, Welfare amohôh nawpa kyh liata taotheina a ypa maih liata reikah pathlie lymâ hra awpa nata a theina hawhta tao lymâ awpa â chhuah tahpa reih ta, atanoh liata amâ lykheina cha a rônah a tahzie reih ta, Ryuchâ pha kawpa ama hlâ pâ vâta palôh hmeiseihpa ta Pala Welfare Committee, Siaha zy hnoh ta alynabie a reih.

Meeting Chairman ta officers avaw hlao theipa Puhpa Vabeikhaihmo Solo, SCO, Puhpa TT. Kholaw, RTO, Puhpa Beirokhu Beita, I&PO zy hnoh ta alynabie a reih.

Alykheina programme he Puhpa Beirahmo Syhly, EM châta zawpi ta thlahchhâ kheina hneipa ta pachhâsapa a châ.

ISSUED BY:

Information & Publicity Department

Mara Autonomous District Council

Siaha.