NOVEL CORONA VIRUS - ADYUHNA KYH LIATA 

PUHPA N.ZAKHAI, HON’BLE CHIEF EXECUTIVE MEMBER, MADC – BIE

                     Khizaw ta abuakhei haipa Pasanahri chi chhihpa Novel Coronavirus (Covid - 19) adyuhna kyh liata reingia ngaitapa ta Sawhkhâ dâh nata phôh eima zyh pha kawpa vâta Mara zawpi zydua alyna bie ei chahlâ ei.

                     Veiseih palôhâhpa ta Baongiahpazy deichhy n’awpa ta CEM Relief Fund (MADC) liata pasai ngaitapa ta Sôh ahlâtuhpa zydua hnoh chhao ta alyna bie ei reih chanei.

                     Sawhkhâ ta ryhraona ataopa nata pachhuahpanohpazy he eima zydua pha n’awpa nata aboh n’awpa a châ tahpa myleipa ta, eima zyh pha via lymâ awpa tlao a châ. Athaipazy reizie ta cha Covid -19 hri he chatlie kaw hrasala, avai theipa nata patlâh theipa chhao a châ hra. Chavâta Sawhkhâ ta tao awpa maniah a tahpazy tao ta, eima zy lyhlia awpa he eima rai a châ.

                     He Covid-19 adyuhna kyh liata Sawhkhâ nata NGO – zy hria paraohna chhao pha ta; ei ly ngaita.

                     Râh hro lâta Marasaw a y pa, eima râh lâta avaw liepazy  ta thlahlôhpa nata aly ngaitapa ta he eima râh liana heta nama chhôhkha, sanawh nata viasazy kiah liata nama y awpa ta cha khokhei ei na ta, he pasana hri tawhta avaihkâna sawhkhâ ta ataopa deikua reingia kawpa ta nama zy lyhlia awpa ta ei châ hawh ei.

                     Quarantine inmate – zydua thlahzoh leipa ta reingia ngaitapa ta nama y lymâ awpa ta châ haw ei na ta; cha cha eima râh châta nama tao theina hluhpi hry liata a peimawh kawpa sâkha a châ. Marasawzy eimâ boh thei n’awpa nata he pasana hri ta maniah apahnie lei n’awpa ta eima zydua ta hriaparaoh haipi ta, athlachhie leipa ta nama peimawhpa nata angiahpazy cha ahriatuhpazy nama pahnosa lymâ awpa a châ. He pasana hri tawhna heta eima vaih thai awpa peimawh ta, avei pathleipa eima y pa chhaota thlahzoh awpa châ hra vei; patlâh theipa a châ. Nama châta hriatuh awpa Marasaw hluhpi eima y. Eima thlahchhâna liata khâ eima châ thei tahpa chhao nama my awpa châvei. Chavâta he Mara râh liana heta thlahlôhpa nata aly ngaitapa ta nama y awpa a châ.

                     Tiama ngaitapa ta Quarantine facilities – liata ahriatuhpazy nata veiseihpa ta tichho beihchho rai hriatuhpazy palôh hmeiseihpa ta alyna bie cha reih ei na ta; nama deichhyna nata baona zydua he Mara râh ta angiah ta, tiama papua via lymâ chy awpa ta ei châ hawh ei.

                    Awnanopa nata veiseih palôhâhpazy ta Sopa-eihna (Quarantined) su liata y pazy châta niebaw patohpatiana rai tiama ngaitapa ta hria lymâ ei ta, NGO, Political party nata mo pakha veiseihpazy ta ama chheipâh, O hri lyupazy rairuna mokhei chyupa ta, Village Level Task Forces, District Level Task Force, PM CARES Fund nata Prime Minister Relief Fund – taih chhao ta baona ahlâpa hluhpi Marasaw tawhta y ei ta, Australia liata Marsaw a y pazy ta Mara râh châta loh papuapa ta MTP Gen.Hqrs siepa hliepa ta baona ama kaw hlâpa thâh eima theipazy ta thlah maniah palôh ta, eimâ ly ngaita. He zydua vâ heta India ti nata râh phapa eima châzie chhao palâsa ta,  aly âchhih hmeiseih. 

                     Marasawzy rairuna mokheita pathlâ lymâ awpa ta MADC chhao ta anah khâ pachôh ta, eima District liata Sawhkhâ Official – hropazy, NGO, State nata Central sawhkhâzy chhao asaohiah lymâ pa ta a theina zydua apapua hai hra. Bao angiahpa nata deichhy angiahpazy chhao mokhei lymâ ta, thlai ta pathlâ khei lymâ awpa he khatino raita âpachy ta, atao lymâ hra.

                     State nata Central Sawhkhâ tawhta he Pasana hri adyuh n’awpa nata Chakâhna vawtlô thei awpa tawhta apatohpatia n’awpa sôh nata thih baona hmô tlâ hravei sala; MADC heta Border Area liata Mara râh Khih zydua cha tlypa ta âphana rakha ta baona pie khai ta, niebaw rairu viapazy pachha awpa ta Khito liata Sahphâ chhao atheina rakha ta apie khai hra. Eima râh châta phahnai ngiah ngaitapa ta ahria haipa MTP, MSO nata VLTF zy atheina hawhta bao chyu hra ta, MADC staff - zy chhao State Sawhkhâ hmahlana baokhâpa ta tiama ngaitapa ta ama deichhy lymâ hrapa a châ.

                     He Pasana hri ta avaw tlôkhei thei awpa; chakâhna nata niebaw rairunazy tawhta apatohpatia apeimawhpa vâta MADC chhaota eima Minister zachhihpa nata MLA zy hriaparaohpa ta MDC zydua ama hlao tawhta Thykha chyu thyu pakhypa ta Siaha District Covid-19 Food Security Consultative Committee – hmahlana sie khei haipa a châ hra.

                    Covid-19 vâta Thlahzohpa ta y leipa la; avai awpa deikua apeimawh.