PRESS RELEASE

NO.9/2025

SIAHA, 27 Nawh, 2025, Hriatuanoh - Mizoram sawhkhâ ry liata Urban Development & Poverty Alleviation (UD&PA) Department pachhuapanohpa Mizoram Cleanliness Competition 2024 hnei patlôpa liata Siaha khihpi ta District Headquarters Category liata khihpi pathaih chaipa lymâ sâ 2-na a dao.

Mizoram Governor General (Dr) Vijay Kumar Singh, PVSM, AVSM, YSM (Rtd) chata Aizawl AR Playground liata Republic Day 2025 a hmâna liata lymâ a raina liata Siaha District vyuhpa Pihnô S. Lalmuanpuii, Sr. LAO, MADC nata Pihnô Ruatpuii, DEO, UD&PA(DC office), Siaha zy hnoh ta Citation angia kawpa nata phusâ lâ ta tlaw ₹.80,000/- a hlâ ei. 

Khihpi pathaihpa ataopasuana liana he ta Category nano nanopa taopa châ ta, Category 2 (District Headquarters) liata Saitual District cha sâkhana châ ta,  Siaha District sâ 2-na nata Serchhip ta sâ 3-na lymâ ama dao hra.

“He hawhta Siaha ta lymâ a la theipa he MADC LAD nata DC office lia ta Officers & Staff nahzy hria paraohna a pha kawpa vâta a châ hleikhô ta VCs, NGOs, Awnano nata Zawpi zydua tiamana vâta a châ” tah ta, Pihnô S. Lalmuanpuii, Sr. LAO, MADC chata alynabie a reih.

Siaha District he ta Mizoram Cleanliness Competition 2023 liana kha ta lymâ sâ 3-na a vaw dao haw hra.

ISSUED BY:

Information & Publicity Department

Mara Autonomous District Council

Siaha.