SIAHA, 29 Pamih, 2023, Pakhynoh - Noh 3 chhôh ta ahmâ awpa Mawhrei khih kô 100 (Centenary) a tlohpa alyna cha atanoh kha a noh 2 nawpa ta Vahai Chozah Byureih, Mawhrei liata ahmâpa a châ.

He noh liata Chief Guest châta Chapi biatuhpa MDC Puhpa C. Chehnei, Dy. Chairman hruapa châ ta, Guest of Honour châta Puhpa K. Chhihrau, Executive Secretary, MADC hruapa châ ta, ama pano ta aly kawpa ta amâ hlao thei hra.

Atanoh liata alyna liata Programme chhaih 2 lâta pachhaihpa châ ta, chhaihkhana liata Chief Guest nata Guest of Honour ahlao kheipa liata Puhpa Avis M. Teihmo, Chairman Centenary Managing Board ta chhihtha ta, ECM Chapi Pastorate biatuhpa Rev. ST. David Livingston ta Hlazy 126:1-3 nata Luka 14:11 reina nata reipakawhna hneipa ta Devotion hmâh ta, Puhpa C. Laizei, Mawhrei khih zipa ta alypangiana daihti a hmâh. Puhpa K. Laitha, Editor-in-Chief ta Souvenir thâtih rei a hnei ta,

Zyhno MTP tawhta akaw hlaopazy hry tawhta Puhpa J. Siaku, Adviser ta greetings reina a hnei.

Chief Guest Puhpa C. Chehnei, Hon’ble Dy. Chairman chata Mawhrei Centenary Souvenir palâhâhna a hnei khai tawhta biereina chyupa daihti hmâh ta, Mawhrei khih kô 100 chhôh a chhihthatuhpa Khazohpa cha reithai ta, atahmâ duahmo liata a paduatuhpa Khazohpa hnoh ta alynabie reih ta, Mawhrei khih liata apahrâpa zawpizy hmiakô liata aduah thei awpa ta nohâhtaotuhpa nata ama o lyu rai khâsia hmâ leina taihta a chhô a zâ ta Centenary aly nawpa abuakhei tuhla nata apatahpatiatuhpa Organising Board zy hnoh ta alynabie a reih.

O dyhcharu tawhta khih pathaopatô tah, khih nata tlâh châta riethei a vaw tao tuapazy zana hlâ ta, ama hmopha taona, hriapasana, riethei taona zy athei pi ta, lei leipa aw ta, atahmâ hroh ei sa la, amâ ly kaw aw tahpa reih ta, ama hmopha taopazy cha sawtliapazh ta taopazao lymâ awpa ta pasyuna bie reih ta, Centenary alykheina bie a reih.

Centenary he aly chakhyh leipa ta sapa nata thlahpa liata hmahsiena miah tlôkhei tuhpa châ awpa ta khokheina bie reih ta,  Centenary theilâpa hnei awpa ta a khopazy he hawhta a reih: 

1. Aryh thai leipazy aryhna tlôkhei sa la.

2. Riethei sipasapa nata sei châna tawhta miah papuasa mawh sy. 

3. Khazohpa kyhpachâna miah pahnopasiasa tuhpa châ mawh sy.

4. Centenary alyna Biepipa “Areisina nata nawhna” he tao lymâpa ta byhnâ tona a châ; areisipa ta apanawh lymâ awpa.

5. Khazohpa ta a chyhsazy ahnawpa nata khona a hnei; tiama kawpa ta khih nata râh châta hria awpa.

Dy. Chairman zachhihpa chata Mawhrei he nôpaw hmiatuapazy reikah phapa nata khichhai deichhy thaipa châ ei ta, chazy hmopha taonazy vâ chhao chata atanoh byhnâ a vaw tlô tah ta, Mawhrei khih ta Centenary a kaw tlôpa cha â lykheizie reih chanei ta, Centenary programme he alypa nata thapha kawpa ta ahmâ chyu awpa ta Mawhrei zawpizy khokheina a hlâ. 

Puhpa K. Chhihrau, Executive Secretary, MADC chhao biereina chyupa daihti hmâh ta, Biehrai Pathaihpa bie liata Zawsi nata Davi zy hro amopâpa ta atymâ nata aeichhia lei awpa ta zawpi pasyu ta, Mawhrei khihsawzy khih kô 100 a tlohna khô lâ liata hmahsiena khochhih kawpa hnei lymâ awpa ta khokheina bie a hlâ ei.

Atanoh 1st Session liata John Beizachhi Phuto, Jessica B. Khuhly, Clara K. Melita nata M. Nodao zy ta hlasapa ta zawpi ama palôpahawh.

Noh 3 chhôh ôpa Mawhrei khih Centenary alyna he târi 28 & 29 Pamih, 2023 liata sapa lâ aheipa ta ahmâpa châ ta, târi 30.3.2023 liata thlahpa lâ aheipa ta Awnanopa ta Programme siekheipa ta a khawna programme ahmâ awpa a châ.

Mawhrei khih he kô 1923 liata Chapi khih tawhta Odyh dyh 6 ta O châ kaw chôpa ta paduapa vaw châ ta, atahmâ taihta kô uhthei chaipa manôh pa 3 zy ary liata ama moh nata kôzie zy palâsapa a châ:-

CHAPAW:

1. Puhpa T. Neitha = 92

2. Puhpa C. Laizei = 90

3. Puhpa Khule = 89

CHAPAW:

1. Pihnô Nochhie = 90

2. Pihnô Noza = 90

3. Pihnô Zeidie = 90

Alyna programme chhâ tawhta zâla maih liata alyna kyhchhih pachhuahpanoh lymâpa châ ta, nôpawzy khozie hawhta kahlâno mahnô mahpaw daihi hlachâh hna liata pati nie tyhpa hawhta taopa ta tlyliah liata zawpi ta dôh chyupa a châ.