PRESS RELEASE

NO.71/2023

SIAHA, 2 Patô, 2023, Hriaheinoh - Atanoh dawh 1:30 Pm pa ta MSO Branch: Maisa zy ta ama biatuhpa MDC Puhpa Beirahmô Syhly, EM i/c RD etc. cha a office chamber liata MDC a tlohna nata 12th Term MADC Sawhkhâna thiehpa liata Executive Member a châpa alykheina daihti ama hmâh.

Programme he Puhpa L. Johnson, Maisa Welfare Committee Chairman, Siaha ta chhihtha ta, Puhpa M. Beingase, Adviser ta pavaosana thlahchhâna a hnei. MSO Maisa vyuhpa ta St. N. Beipazi, President ta alykheina ryuchâ hlâ ta, he khai tawhta biereina chyupa daihti hnei pazi ta, EM zachhihpa hnoh ta achuna hmahsie nawpa zy, Pachutuhpa adaih leina zy nata Preschool Teacher adaih leina zy mokhei awpa ta tlôkheipa ta ahawna a tao.

Puhpa M. Beingase, Adviser biereina daihti piepa châ ta, Khazohpa ryhraona hawhta a tlohpa biatuhpa MDC hnoh ta alykheina nata khokheina bie a hlâ.

Chairman ta EM zachhihpa biereina nata pasyuna bie rei awpa ta daihti pie ta, Puhpa Beirahmô Syhly, EM zachhihpa chata alykheina hnei awpa Maisa khih tawhta kaw siepa ta sôh nata thih, tha nata zâh hleikhô ta alykheina ryuchâ saiheina nata khokheina ama hlâ vâta alynabie reih ta, Maisa MSO zy hnoh ta achuna kyh nata khinatlâh kyhpachâna vâta riethei rairunazy papeimawhsa leipa ta keih ama chakâna kyh liata reithai tlâh ama châ tah ta, atanoh liata avy theipazy nata Maisa MSO zydua hnoh ta alynabie a reih.

Atanoh liata ama tlôkhei pâpa Teacher adaih leina kyh cha MADC nôpawpazy ta ama pachâ peimawh kaw hrapa a châ tah ta, abyuhna hawhta hmahla khei lymâ â chhuahzie a reih.

He hawhta a châ no ta Teacher a châ ngâhaipazy cha tiama kawpa ta pachu awpa ta ahaw ta, Teacher nahzy cha ama quality â kho khai ei ta, Maisa liatahpa nata khi hro lâtahpazy thai via pachai leipa ei ta, training a puapa sai ama châ tahpa a reih. Studentzy cha nôpaw zy ta ama backup awpa apeimawh tah ta, pari theipa tawhta khitlâh eimâ boh thei nawpa ta hmahla chyu awpa ta ahawna tao ta, khitlâh hmahsie via lymâ nawpa kyh liata MSO Maisa zy nahta ahrialâh pha lymâ awpa ta pahruana nata ahawna a tao.

Chairman ta he programme liata EM zachhihpa achakaochahlâpa Puhpa Beirokhu Beita, I & PO biereina chyupa hnei awpa ta hrua ta, ano chata MSO zy cha Daihti avao thai awpa zy, achuna hmahsie nawpa liata khitlâh thapasa hmeiseihna hnei awpa ta pasyunazy reih ta, MSO Maisa zy hmialâ ama sie lymâ nawpa liata khokheina sâh chaipa a hlâ ei.

Daihti chhâna liata Chairman Puhpa L. Johnson ta atanoh liata MSO Maisa châta a daihti sôh kawpa aparua tuhpa Puhpa Beirahmô Syuhly, EM nata a hrialâhpazy hnoh ta alynabie a reih.

ISSUED BY:

Information & Publicity Department

Mara Autonomous District Council

Siaha.