PRESS RELEASE

NO.52/2021

SIAHA, 3 Phiapi, 2021 – Atamy dawh 11:00 AM pa ta CEM’s Conference Hall, MADC Complex liata MADC’s Budget Training for MJA Siaha pahyna hneipa châ ta, he liata Puhpa KT. Rokhaw, MLA cha Chief Guest châta hruapa a châna hawhta â hlaopa ta pahyna a hnei.

Puhpa Derick Salai Solo, Under Secretary, DP & AR, MADC ta Chairman châpa ta programme chhihtha ta, MJA lâ tawhta Puhpa M. Baithai, President, MJA, Siaha District ta biereina chyupa nata alynabie reina daihti a hmâh.

Chief Guest Puhpa KT. Rokhaw bierei tlâhpi viapazy: MJA zy ta he Training pahyna programme liata Chief Guest châ awpa ta amâ hawna cha hlao patloh cheingei khoh na ta, mylâ liata ei bia liata Siata khih, Model Village a tlypa a châpa alyna programme taopa ahlao awpa ta ei kaw sie no ta â vaw chhyh chho vâta vâhnei ei tah hmeiseih; he hawhta daihti rypaohpa nâ taopa tuhpa MJA, Siaha District nôpawpazy hnoh ta alynabie ei reih.

Refugee zy mohôh-na nata baona kyh liata MADC nôpawpazy, NGO zy, MJA zy nata Mararâh zawpizy chô liata alynabie reih na ta, eima unawh nahzy, ama râh rairuna vâta a zâ râpazy he deichhy angiahpa nata baokhâ angiâh hmeiseihpa châ ei ta, eima theina hawhta, Mararâh zawpi ta bao pazao lymâ awpa ta eimâ haw hmeiseihpa a châ.

MADC nôpawpazy ta MJA Siaha District châta he hawhta MADC’s Budget Training, MJA Siaha District zy châta ama pachhuahpanoh theipa he aly â chhih hmeiseihpa ta pahno na ta, he he ta thei phapa a vaw patheisa cheingei nahta khâcharâ ei hnabeiseih.

Press nahzy he Democracy râh liata ama peimawh hmeiseihpa a châ; sawhkhâ hmahlana nata raihriana, zawpi pahnosa tuh awpa cha Press chyhsa nahzy he nama châ; Press he ta hmodopa nata hmeiseihpa, riahpha kawpa ta a châkheipa ta a sie khiah cha sawhkhâ a sie haipa chhao â do kawpa ta a siethei awpa a châ. 

MJA zy he Sawhkhâ tawhta Scheme, Project, Mission etc. zawpi hnoh ta a chhopasia tuhpa châ ei chi ta, zawpi vâtlâh nata sawhkhâ apazaona phapa atao tuhpazy nama châ. Siaha District châta nama hriapasana zydua vâta alynabie cha hlâ ei na ta, tiama papua via lymâ awpa chhao ta ei châ haw ei.

Eima râh liata COVID vâta thata bua pi ta, eima Mararâh liata khihpi peimawh chaipa Saikao lia chhao thata hri oh ei ta, Saikao ta a maophyuh khiata cha Mararâh zydua maophyuh hapa hawhta pachâna hneipa ta keima chhao, Saikao châta ei theina zydua ei vaw papua ngâ hrapa kha a châ. COVID adyuhna kyh liata sôh nata thih, tha nata zâh a vaw hmâh tuhpa zydua hnoh ta alynabie ei reih.

He pahyna programme liata Siaha District MJA member zy puapha kaw ei ta, MADC ta he hawhta Training a pachhuahpanoh theipa vâta Siaha District MJA President Puhpa M. Baithai nata a hrialâhpazy ta alynabie ama reih.

Atanoh he, pahyna programme deita ahmâ chypa châ ta, daihti rypaoh tua chaipa liata Training he hneipa a châ aw.

ISSUED BY:-

Information & Publicity Department

Mara Autonomous District Council

Siaha.