SIAHA, 20 Khihpa, 2022, Pakhynoh - Atanoh dawh 3:00 PM pa ta MADC Officers Association (MADCOA) ta Puhpa HC. Lalmalsawma Zasai, Dy. CEM cha a office lia ahmôpa ta MADCOA Leader zy hmiapahnosana ama hnei.

He hmiapahnosana liata Puhpa Pheiki Solo, President, MADCOA ta chhihtha ta, 12th Term MADC liata atlypatlohpa nata Dy. CEM Puhpa HC. Lalmalsawma Zasai cha MADCOA ta palôh hmeiseihpa ta amâ lykheizie reih ta, ti nata râh chhihthapa ta hmialâ a sie lymâ nawpa liata Khazohpa ypâna a to lymâ thei nawpa ta MADCOA moh ta khokheina a hlâ.

Puhpa HC. Lalmasawma Zasai, Dy. CEM chata MADCOA Leader zy hnoh ta alynabie reih ta,  MADCOA member zydua, ama rai chyu liata maohphaohna (responsibility) ama hneipa apha kawpa ta tao tah, tiama chyu awpa ta ahaw ta, MADCOA he MADC Pillar hmeiseihpa a châ vâta ama ry liata a ypa zydua - LDC taihta rai ama thai khai thei nawpa ta rai pachu chyu awpa ta ahawna a tao hra.

He dei châ leipa ta MADC ry liata Officers & Staff zy, Office rai Training eima hnei thei nawpa ta ATI, Aizawl zy hmâphahnai awpa pha a tahzie reih ta, Grading ahy hmah arâsai lei awpazy, promotion due pazy post a rua khiah pakiasâhsa awpazy, Office hmo cha khôtho lâ papua lei awpazy, executive zy relationship phapa tao lymâ awpazy, office kiana kyh liata zachhih kawpa ta y chyu awpazy, LDC level tawhta HoD taihta file link khai awpa kyh zy reih ta, abyuhna liata Executive nahzy advice pie awpazy nata khopahâna vâta arasaona daihti a y awpazy chhao reih ta, atlyna râh a châ vâta office khôtho lâ liata party colour zy papuapa ta office lâta angia khei lei awpazy MADCOA zy hnohta pasyuna nata khokheina bie zy a reih.

MADCOA Leader zy he ta 12th Term MADC liata Elected Office Holders zydua hnohta alykheina nata hmiapahnosana tao khai amâ chhuah.