SIAHA, 23 Phiapi, 2023 Pobienoh - Puhpa N. Viakhu, Chairman chhihthana ry liata Mara Autonomous District Council (MADC) Winter Session cha atanoh târi 23 Phiapi 2023 ta hnei patlôpa a châ. Daihti pathao hlâta Chairman ta Biehrai Pathaihpa Ephesi 5:1-2 reihpapuana hnei ta,  Chairman ta thlahchhâ awpa ta a hruapa Puhpa T. Seido, EM (Sports, etc, MADC) Laki biatuhpa ta Abeipa lâ pavaosana a hnei. Puhpa Beihu Nôhro, Deputy Chief Whip nata Puhpa M. Manasia, MDC cha Chairman ta Panel of Chairpersons châta a rao ei. Member thiehpa Puhpa Nelson Khenglawt, MDC he Puhpa N. Viakhu, Chairman nata Puhpa M. Laikaw, House Leader ta âlykheina ku ama chalyu.

Rev. Violet Louise Anne Mark (L) taokheina nata a thâtih Puhpa N. Viakhu, Chairman ta reina a hnei khai tawhta pasaih leina bie nata palôh pasa taokheina bie he a ry liata moh palâsapazy ta ama reih:-

1. Puhpa Nahlo Solo, MDC

2. Puhpa H. Malvina, MDC

3. Puhpa N. Zakhai, Adviser to CEM

4. Puhpa HC. Lalmalsawma Zasai, MDC

5. Puhpa MH. Tiabi, EM i/c MS

6. Puhpa Beirahmô Syhly, EM (RD) 

7. Puhpa M. Laikaw, CEM, MADC.

Atakô Winter Session liata Official Rules sâ 2 a ry liata palâsapazy he phaw (introduce) pa châ ta, a sâ 2 heta pass pa a châ:-

1. The Mara Autonomous District Council (Fisheries Department, Group A, B, & C) Recruitment Rules, 2023.

2. The Mara Autonomous District Council (Environment & Forest Department Group B & C) Recruitment Rules, 2023.

Atakô Winter Session he zâlâ dawh 3:15 PM pa ta Puhpa N. Viakhu, Chairman ta a pachhâsa.

Atakô Winter Session he hiahrina (Question) a y tlâ leipa vâta nohkha ta patlôpa a châ.