PRESS RELEASE
NO.9/2022
SIAHA, 26 Nawh (January), 2022 – Atanoh my dawh 11:00 AM khata Puhpa N. Zakhai, CEM, MADC ta MADC tlyliah, Siaha liata Indian Republic Day ei 73rd-na alyna châta Indian National Flag a pakai (unfurl). Puhpa H.Sahlo, Chairman, MADC he Chief Guest châta raopa châ ta, a tlâh leipa vâta, a vyuhpa ta Puhpa N.Zakhai.CEM, MADC raopa a châ.
Puhpa N. Zakhai chata Indian flag a pakai (unfurl) khai tawhta biereina hnei pazi.
Puhpa N. Zakhai, CEM, MADC biereipazy:-
Ahmiatua ta Marasawzy Chi nata Pho ta maniah paduatuhpa eima Khazohpa hnohta alyna bie ei reih. He 11th term Mara Autonomous District Council ryureina chhihtha awpa ta maniah deichhytuhpa, MADC liata ahriatuhpa nata Mara zawpi zydua hnoh chhaota alynabie ei reih hmeiseih hra.
Râh châta ei hrialâhpa zydua nata atanoh Indian Republic Day ei 73-na aly awpa ta he su liata ahmaohpakhypa zydua Indian Republic Day ei 73 na Samaw ei cha hlâ ei.
Indian Republic day he Kô 1950 liata India dâhpipa, Constitution eima hmâh pathaona alyna châta a kô chareih ta atanoh hawhpa Nawh Thlâpâ Târi 26 liata hmâh tyhpa a châ. India râh he eima pahno chyupa hawhta British ryureina ry liata Kô 200 hlei a y tawhta Independent – khotalaina hmôpa eima châ. Kô 1947, Thlazoh Thlâpâ târi 15 liata India ta khotalaina a hmô tawh khata Kô 3 chhôh cha British sawhkhâ ta dâh a taopa, Government of India Act 1935 kha â rypaoh dâh hawhta pananopa ta India râh chhithatuhpa hmiatuapazy khata ama vaw hmâh.
Chatanachata India dâhpipa cha kô 1950 Nawh thlâpâ târi 26 liata hmâh thei awpa ta Constitution Drafting Committee or Constituent Assembly, Dr.B.R Ambedkar chhihthana ry liata thlai patlôpa châ ta, he noh he Indian Republic Day” tahpa ta phuahpa a vaw châ.
Republic of India tahpa y zie chaipa cha India râh liata pahrâhpa moto, chito, photo he ahy bei, ahy pho, ahy chhôhkha ry liata hmahta y khao ma pi, moto he châna nata tovyuh, duahmo nata ryhpaohna alyupa nata â khopa hneipa, khotalaipa sai eima châ, tahna a châ chai. India râh he khotalaipa, photo apazao pakhypa, Union Republic of India eima châ tahpa he atanoh he su liata a hmaohpakhypazy pita eima pahno chanei heih awpa a peimawh ngaita.
Râh châta eima hrialâhpa zydua nata atanoh he su liata avy theipazy, nama pahno chyupa hawhta kha hlâ cha eima râh liata Republic Day rônah ngâsâpa ta alyna he Siaha District Tlyliah liata a lôhawh ngâsâpa ta Deputy Commissioner Siaha patohpatiana ry liata hmâh tyh pi ta, Kô 2020 tawh deikua Mizoram State sawhkhâ ta Order of Precedence main Table tawhta eima râh Nôpawpa, Mara zawpi vyuhpa ta eimâ tlyhpatlohpa zydua duahmo âhnai kawpa liata ama sopa pasâh via awpa ta hiapa hlaotlohna a y mâh lei vâta Mara râh ryureina O pi (MADC) Tlyliah liata eima râh chhihthatuhpa nata khitlâh nôpawpazy ryhraona hawh tlaita ano-eihta ta eima vaw hmâh hapa a châ.
India noh peimawh kawpa he Boycott leipa pi ta Order of Precedence Notification 11th August 2020 taopathi awpa ta biehneituhpa lâta ei hluhpi tlôkheipa a châ tawh chhaota yzie a hnei leipa vâta Târi 30th August 2021 (Chutyhnoh) ta Mara râh liata All Political Party-zy, All NGO-zy nata MADC chhihthatuhpazy bie pathlupa hawhta ano-eih ta ta a hmâhpa eima châ.
Châhrasala atanoh deikua Abeipa ta Mara sawzy chata ryh a raopa vâ chhao a châ thei hra. Eima râh liata eima reih, Mara reih tlai ta India noh peimawhpa ahmâh thei hra n’awpa daihti ryhpaoh pha kawpa tlao vaw châ ta, a rônah ngaita.
Eima manô mapaw daihti tawhta Mara sawzy he ti nata râh phapa châ lymâ pi ta, atanoh taihta ti nata râh châta phahnaingiah ngaitapa ta a hria lymâpa eima châ.
Mara sawzy cha chyhsa veihseih palôhâhpa, saiheina a hnei kawpa, ngâchhihpa nata riahphapa, ti nata râh kyhpachâ kaw tyhpa eima châ.
Atahmâhlâ Covid-19 adyuhna daihti lia chhao heta State nata Central sawhkhâ ta maniah a mohôh dâh eima kho akhi leizie cha pahno chyu pi ta, MADC chhochhi cha he Pasana hri adyuhna kyh liata State nata Central sawhkhâ lâta eima rairuna ei hluhpi tlôkhei tawh chhaota atanoh taihta Tlawkha chhao State nata Central tawhta hlaotlohna hmô awpa y mâh vei. Châhrasala Mara sawzy pi heta nô-una rai hnei leipa pi ta, NGO, Awnanopa nata veihseihpazy ta deichhyna rai khâ ama hria lymâpa a châ. He heta ti nata râh phapa eima châzie thata a palâsa.
India Independence a hmô kô 1947 khata India sawhkhâ ta Puhpa Gopinath Bordoloi, Chairman chhihthana ry liata Sub-Committee of the Constituent Assembly a paduapa, a chyunazie ta Bordoloi Commission ta a Recommend pa hawhta Pawi-Lakher Regional Council cha Notification No.TAD/R/50/119 of 31.07.1951 ta Article 224 (2) nata 275 (1) hmâpa ta Sixth Scheduled to the Constitution of India liata pachohpa a châ. Kô 1971 liata Mizo Hills District Council cha Union Territory lâta sopa châ ta, PL regional council chhao cha LAD, PADC nata CADC ta pachhaihpa vaw châ hra ta; Kô 1988 Amendment of Sixth Schedule to the Constitution of India daihti lia khata MADC tahpa ta thlapa a vaw châ.
India sawhkhâ ta he hawhta ryureina no-eihpa maniah a piena chhâ chaipa cha eima chi nata pho, taozie nata phoryhpa, reih nata khozie, eima ti nata râhzy pabohsa ta, palaiseihsa awpa zy, eimâ sosah via lymâ thei n’awpa nata keimo tlaita ryu eimâ rei lymâ hra thei n’awpa ta khokheina maniah a patosapa a châ. He heta eima chheipâh liata chi hro pho hropazy ta maniah ama disao awpazy tawhta maniah a pabohsa. MADC he India Dâhpipa liata pachohpa a châpa vâta rainao kawpa ta State sawhkhâ chhaota maniah a disao thei leipa a châ.
11th term MADC sawhkhâna heta rairuna hluhpi chatôh lymâna chôta Mara râh châta a theina hawhta rai a hria hrapa thokhazy cha:
1. Land Revenue & Settlement Administrative building cha hlaotloh kawpa ta sapa châ ta, MADC Complex liata Land Revenue & Settlement Dept. building chhao he Extend pa a châ.
2. Farmers Training Hall or building hlaotloh kawpa ta sa patlôpa a châ.
3. Chhaolo-II nata Amotlah Village Gravity Water Supply Scheme chhao hlaopatlohpa a châ.
4. MADC Area liata Road side plantation a pha kawpa ta hriapazao lymâpa a châ.
5. Mara sawzy tlôkiana phapa eima hnei thei n’awpa ta Delhi liata Mara House sa n’awpa ta Râh chaleipa a châ. Fencing chhao tao khaipa a châ.
6. Zoram Medical College kiapâh Falkawn liata Râh chalei pâ hrapa a châ.
7. Siaha liata Lorrain Market hlaotloh kawpa ta sa patlôpa châ ta, Aizawl liata Mara Students’ Hostel - Chanô nata Chapaw châta anoeih ta sa patlôpa a châ.
8. Siahatlâh liata MDC Hostel sa patlôpa a châ.
9. Vahia nata Miepu, Amôtlâh nata Tisôpi lâthlôh chhao hlaotloh kawpa ta taopa a châ.
10. Industry Department, MADC chhao hlaotloh kawpa ta sa patlôpa a châ.
11. MADC main complex liata Motor parking sa patlôpa châ ta, a chô lâta MADC Golden Jubilee Hall chhao thlaita pahy thei awpa ta patohpatia haipa a châ hra.
12. MADC Vety Department liata Solar khaihna sopa châ ta, Viachao sâhpiti chhao Siaha khih chhôh liata rai tyhpa a châ.
13. Kô kha hlei khô hapa 2015 tawh khata achuhaipa Central nata State liata UPSC nata MPSC Preliminary Exam pass pazy cha Incentive Cash Award – UPSC Rs.100000/- (Rupees One Lakh) nata MPSC Rs.20000/- (Rupees Twenty thousand) pie lymâpa a châ.
14. Union Minister i/c Sports, a tliata liata miah a kaw tly no khata Sport Complex pitlohpa miah taopa awpa a khona maniah chho ta, he châta râh kawh ngâsâpa Chhâtlâh, Siaha liata chaleipa a châ. He he a pitloh thei khiata la eima thyutliapazy ta ataopasuana khizaw liata a tlô ngâsâpa ta nie amâ tlua thei hra aw tahpa hnabeiseihna lai ngâsâpa eima hnei.
15. He su lia pyly heta Solid Waste Management châta râh piepa châ ta, Solid Waste Management project he hlaotloh awpa ta hnabeiseihpa a châ hra.
He 11th term MADC ta eima raihriapa nata ryureina kyh hluhpi liata tlohleina nata kho akhi leina hluhpi chhao a y nahta pangiasa na ta, Mara zawpizy deichhyna nata baona chôta he hlâta hmahsiena rônah viapa liata eima Khazohpa heta maniah a chhihtha via lymâ aw tahpa deikua khâ ei hnabeiseih.
Nama zydua hnohta Indian Republic Day ei 73-na khokheina sâh chaipa ei cha hlâ chanei ei.
Ei châ ly kaw ei. Jai Hind!
MADC ta he hawhta anoeih ta eimâ hmâna chhâpa cha Mizoram sawhkhâ ta Warrant/Order of Precedence a taopa liata CEM, EM nata MDC zy duahmo ahnai kawpa liata ama sopa pasâh via awpa ta hiapa hlaotlohna a y mâh lei vâta a châ.
COVID-19 vâta Republic Day alyna liata chyhsa hluhpi hrua thai’pa châ leipa ta, Official thokhazy, Ex-MLAs, Ex-MDCs, All Political Parties zy hruapa châ ei ta, MTP (H), MSO (H), MCHP (H) nata MJA Siaha zy dei hruapa ama châ.
ISSUED BY:-
Information & Publicity Department
Mara Autonomous District Council
Siaha.
Attachment
