PRESS RELEASE

NO.111/2022

SIAHA, 6 Thlarâh, 2022, Hriaheinoh - Atanoh dawh 12:00 Noon kha ta Sports & Youth Services Department, MADC ta Puhpa ST. Vanmalsawmliana, EM i/c Sports, MADC office chamber liata Incentive Cash Award raina programme ama hmâh.

Programme he Puhpa VT. Martin Beiduakhei, ASPO ta chhihtha ta, Puhpa ST. Vansawmliana, EM nata Puhpa JH. Beihnai, S & YO, MADC zy ta pasyuna bie nata tha patlôna bie ama reih.

Ary liata moh palâsapazy hnoh ta Incentive Cash Award raipa ama châ:-

1. Silvan Beihrothatlo (Weight Lifting)

Silver = Rs.25,000 (National)

2. ST. Rakho (MMA)

Bronze = Rs.10,000 (National)

3. Zomuansanga (Wrestling)

Gold = Rs.10,000 (State)

4. Rochard HT. Laltlanchhuaka (Chess)

Gold = Rs.10,000 (State)

5. Reuben F. Lalhruaizela (Shooting)

Silver = Rs.7,000 (State)

6. Jennifer Lalruatfeli (Wrestling)

Silver = Rs.7,000 (State)

7. A. Nyusa (Taekwonda)

Silver = Rs.7,000 (State)

8. FC. Jacob Laldinthara (Taekwondo)

Bronze = Rs.5,000 (State)

9. T. Malsawmkima (Athletic)

Gold = Rs.5,000 (District)

Puhpa ST. Vansawmliana, EM zachhihpa ta pasyuna bie a reih ta, “atanoh he noh ngiatlâh châ kawpa a châ; sports chyhsa a taophapazy eimâ châ palaikhei ngâsâ.”

“Marasawzy he sports lâ liata hnôh khaw kaw tyh pi ta, chavâta thyutliapazy, atanoh lymâ nama daopa he a chhâna châ leipa sa la, thapi phia viapa ta khizaw pôpalôhpa ta nama moh a lâ thei awpa ta talent ahneipha châ ei chi ta, ato liata asohsi u la, paritheipa nata sports he taopakaohpa chi châ leipa ta, hriapasana khô lâ ta hlaotlohna a y tahpa pahno heih teh u.” tahpa ta pasyuna bie reipa ta hmialâ ama sie lymâ nawpa liata khokheina sâh chaipa a hlâ ei.

Puhpa JH. Beihnai, S & YO, MADC chhao biereina chyupa hnei ta, atanoh liata MADC ta Sports liata ataophapazy Incentive Cash Award daihti ama hmâpa â ly zie reih ta, Sports EM hmahlana zawhzi ta atanoh daihti ahmâh theipa ama châ tahpa ta Sports EM hnoh ta alynabie reih ta, atanoh liata Award adaopazy he Marasawzy châta hmialâ lâpi apahmô tuhpa châ awpa nata amopâ tlâh châ awpa ta pasyuna nata bietana reih ta, atanoh Award raina programme liata Award adaotuhpazy, ama zydua ta amâ vaw ki thei leipa deikua pei a tah zie a reih hra.

Incentive Cash Award he MADC Sports & Youth Services Department ta kôchareih rai tyhpa châ ta, National, State nata District level pachhaihpa ta Gold, Silver & Bronze ta Award ziepa he â nanopa ta raipa a châ.

ISSUED BY:

Information & Publicity Department

Mara Autonomous District Council

Siaha.