SIAHA, 19 Khihpa, 2023, Pakhynoh – Atanoh dawh 12:00 Noon kha ta MADC Sports & Youth Department ta MADC Area liata Sports person hlaotlohpazy hnoh ta Incentive Cash Award raina hneipa a châ.

Programme he Puhpa T. Seido, Hon’ble EM i/c Sports & Youth Department official chamber liata ahmâpa châ ta, Puhpa VT. Martin Vabeiduakhei, ASPO ta chhihtha ta, pavaosana thlahchhâna a hnei pâ. Puhpa T. Seido, EM ta lymâ raina nata pasyuna bie a reih. 

Puhpa T. Seido, EM zachhihpa chata biereina chyupa a hneipa liata pasyupalina bie pha kawpa reih ta, tahmâhlâ social media ei ma mo khiah thina achalih leipa ta, zikyu thâtih sai châ ta, cha hry liata alyna programme hmâ thei awpa a châpa he aly’pa a châ hmeiseih tah ta, atanoh liata eimâ lykheipazy, amâ phana rakha liata ama talent papôhsa chyupa ta hlaotlohna rônah kawpa ama topa cha â lykheizie a reih. 

Bible liata Talent papôhsapa pakhopâna kyh reih ta, MADC Sports & Youth Department ta sports person nahzy ama theina nata thaina kao chyu liata ama talent papôhsa tah, hmahsie lymâ awpa ama hnabeiseih tahpa reih ta, tiama awpazy, ama theina rakha khô lâ taihta keih chakâ awpa apeimawhzie zy reih ta, “Marasawzy pi, moh phana achyhta eima to nahta anoleipa lâ ta sie tyh pi ta, a pei hmeiseih” tahpa reih ta, ato liata asohsipa ta atahmâ duasu tawhta hmialâ sie awpa nata a pha viapa sie lymâ awpa ta sports person-zy hnoh ta khokheina a hlâ.

Department vyuhpa ta Puhpa JH. Beihnai, Sports & Youth Officer chata biereina chyupa a hneipa liata noh hro Award pie awpa chhao y tyh vei ei - atanoh manôh 10 hlei tlai alykheina lymâ pie thei awpa a châpa he aly’pa a châ hmeiseih tah ta, sports person-zy cha niedo, paôpazy nata paritheipa tawhta aboh u la, hmo pha leipa liata asohsi u la, hyutuhpazy nata nôpaw biezy angiah ta, reingiana lâpi liata achhih awpa ta khokheina a hlâ hra ei.

Atanoh liata Incentive Cash Award piepazy:-

1. Lalruatdika – Boxing (Junior) = Gold

2. A. Nyusa – Taekwondo (Junior) = Gold

3. T. Malsawmkima – Athletics (Junior) = Gold 

4. Lalthanmawii – Badminton (Junior) = Gold

5. KL. Vabeikypacha – Karate (Senior) = Bronze

6. C. Rohluzuala – Boxing (Junior) = Silver

7. C. Vanlaltlanmuanhmangaihsangi – Boxing (Junior) = Silver

8. KL. Vabeikhokhei – Karate (Sub-Junior) = Silver

9. KL. Ngiaso – Karate (Junior) = Silver

10. Boys Team = Badminton (Junior) = Silver

(Lymâ he Gold Rs.10,000/-, Bronze Rs.5,000/- nata Silver Rs.3,000/- ta piepa châ ei ta, District, State nata National level zy hawhta a lymâzie chhao panino laihpa a châ.)

ISSUED BY:

Information & Publicity Department

Mara Autonomous District Council

Siaha.