SIAHA, 18 Di, 2024, Pakhynoh - Atanoh dawh 1:00 PM kha ta MADC ry liata Social Welfare (SW) Department nata Sports & Youth Services (S & YS) Department zy ta ama Department a vaotuhpa Puhpa T. Seido, Hon’ble EM office chamber liata programme pha kawpa taopa ta Advance Christmas amâ hmâh.

He daihti liata Puhpa T. Seido, Hon’ble EM ta biereina chyupa daihti hmâh ta, “Atanoh liata programme he kô kha chhôh eima raihria khô lâta kô chhâna zy eima tlô thei vâta Abeipa liata eimâ lyna pamosana châta a châ. Carol nata Advance Christmas zy hleikhô ta Christmas noh rônahpa daihti tlô awpa he, eima hawti via no cha angiatiah tyh ma pi; kaw lai via pi ta, palôh rietheina nata nôpona eima hneipazy my nawpa châta eima hmâh tyh hrapaba châ.”

“Mylâ hânoh khâpa ma eima tlô aw pahno ma pi; chavâta he hawhpa daihti he eima pasô kaw awpa a châ.”

“Atakô Christmas he Khazohpa nahta azaona phapa eima hnei thei nawpa zy, Khazohpa eima parônahsa chai nawpa châta zy vaw châ sala, apalypa-uasa tah, a chaki lâ ta awh zy rao laih thlâh leipa ta Achhyna O nata Chareipakhyna su liata eima y cheingei awpa a châ” tahpa reih ta, ano mohôhna ry liata officers nata staff nahzy hnoh ta kô kha chhô a taopasina nata ama palôh a pasasa hapazy a y pathlei khiah angiahthai awpa ta a haw ei ta, “nama hnoh ta adyhna vaw tlô mawh sy” tahpa Christmas 2024 nata Kôthieh 2025 zy alypa nata thapha kawpa ta hmâh chyu awpa khokheina a hlâ ei.

Programme he Puhpa VT. Martin Vabeiduakhei, ASPO ta chhihtha ta, Pihnô J. Lalrinmawii, UDC (S & YS) ta pavaosana a hnei.

Puhpa T. Seido, Hon’ble EM hleikhô ta Puhpa Beirahmô Syhly, Hon’ble EM i/c RD etc., Pihnô Patricia Azyu, SWO nata Puhpa Beirôkhu Beitâ, I & PO zy ta biereina chyupa daihti hmâh ei ta, Puhpa S. Vabeihasa, S & YO ta vote of thanks reina a hnei. Daihti chhâna liata Paw Thlahchhâna reiparaohpa ta programme pachhâsapa châ ta, he khai tawhta Advance Christmas zâpati patohpatiapa chhao aly kawpa ta dôh chyupa a châ.