PRESS RELEASE

NO.33/2024

SIAHA, 11 Pamih, 2024, Hriatuanoh – Mara Autonomous District Council (MADC) Department of Personnel & Administrative Reforms châ Notification No. A.12023/3/2022/DP&AR-MADC of 28th February, 2024 bie hawhta atanoh dawh 3:30 PM kha ta Executive Secretary Official Chamber liata Secretary to District Council (Legislative) châ awpa ta raothiehpa Puhpa Pheiki Solo ta Secretary to District Council a châ ngâhaipa Puhpa K. Vanlalliana tawhta charge a la.

He charge ahlâna liata Puhpa K. Vanlalliana, Executive Secretary ta chhihthapa ta biereina chyupa daihti hmâh ta, MADC ry liata General Service liata cha ano nata Puhpa Pheiki Solo he a senior chaipa vaw châ ha bâ ei ta, he he Khazohpa ngiachhiena nata chhihthana a châ tahpa a reih. Legislative Department he kô 2 tlai a vaw mohôh chhôh ta maophyuh leipa ta officer nata staff zy hriaparaohna phapa ama hneina kyh liata alynabie reih ta, athiehpa chhao deichhy pazao lymâ awpa ta officer nata staff zy hnoh ta ahawna a tao.

Secretary to District Council (Legislative) thiehpa Puhpa Pheiki Solo chhao biereina chyupa daihti hmâh ta, he post he officer uhthei senior viapazy post hawhta pachâ tyhpa châ ta, atanoh he duasu liata â kaw dua theipa he Khazohpa ypâna nata khokheina a châ tahpa reih ta, Legislative Department ry liata officer nata staff zy cha ano deichhy, baokhâ ta pasopakâ awpa ta ahaw ta, hriaparaohna phapa hnei lymâ awpa a khohzie chhao reih ta, maophaohnazy chhao apha kawpa ta patlô achhuah lymâ awpa ta ahawna a tao hra.

Daihti chhâna liata Puhpa Z. Vacho, Instructor, Art & Culture Department ta thlahchhâna hneipa ta charge ahlâna daihti he pachhâsapa a châ.

Charge a hlana liana heta Legislative Department nata Art & Culture Department liata officer nata staff thokhazy amâ hlao.

Puhpa Pheiki Solo he Art & Culture Promotion Officer rai apatu ngâhaipa châ ta, bie heihpa a y hlâ via cha Secretary to District Council (Legislative) he additional charge la awpa ta raopa a châna hawhta atanoh he ta maophaohna zydua ano ku liata hlâpa a châ.

ISSUED BY:

Information & Publicity Department

Mara Autonomous District Council

Siaha.