PRESS RELEASE

NO.144/2024

SIAHA, 20 Di, 2024, Chutynoh – Atanoh dawh 1:00 PM kha ta Mara Autonomous District Council (MADC) Golden Jubilee Hall, MADC Complex liata atakô 2024 chhôh châta MADC office zydua khawna ‘office closing programme’ ahmâpa a châ.

He daihti he Puhpa Pheiki Solo, Secretary to District Council (Legislative) ta chhihtha ta, Rev. B. Beilua ta Khazohpa Biehrai Pathaihpa Hôsia 10:12 reipapuana nata reipakawhna hneipa ta pavaosana daihti a hmâh. laihsa Angeli Marapawpi, Mara Idol 2024 Top 5 nata laihsa FC. Siteite, Mara Idol 2024 1st Runner-up zy ta hla ama sa.

Puhpa M. Laikaw, Hon’ble Chief Executive Member, MADC ta biereina hnei ta, “Eima raihriana dyuchhai zy parua leipa ta kô chhâna eima tlô thei vâta Khazohpa liata alynabie eima reih awpa a châ; thokha promotion hmô pi ta, thokha hmô ma pi. Chahawhta thokha a tlâhpa y pi ta, thokha a tlâh leipa eima y - hmoto he eima Khazohpa pahnokheina nata â ryh a tah vâta a tlôpa sai a châ tahpa pahno si la, Ano lâ khâ alynabie reih suh u.”

“12th Term MADC he kô 2 tlai vaw sie ha ta, he daihti chhôh ta, Department to raihriana review nata achievement report programme taopa liata Power Point presentation ta eima mopa nata report eima nahthliepa liata Department to liata hmahsiena khochhih kawpa eima hmô vâta aly’pa a châ kaw. Sie dâh pha viapa liata sie si la, Mararâh zawpi châta a hriapa eima châna apahnopa ta eima raihriapazy a mohpakia tyh si la, kô 2025 liata activity & achievement pha viapa hnei awpa a chhuah chyu awpa ta eimâ pasyu.”

“Mo hropa châta lohpapua awpa he a peimawh hmeiseih; MADC ry liata sawhkhâ rai hriapazy ta keimo hlâta riethei viapazy bao awpa he eima maophaohna hawhta pachâ suh u.”

“Atakô chhôh ta suhrawh sukha eima pie pado ma tahpa amohpakia si la, a pie pado leipazy eima y pathlei khiatala kô 2025 January thlâpâ tawhta piepado bâ ei suh u.”

“MADC ry liata ahriapazy pi he Mararâh thlalâ eima châ. Mara zawpi amopâ tlâh châ awpa ta eimâ tyudua awpa apeimawh kaw. Marapazy pi he sapa nata thlahpa liata hmah eima sie thei nawpa ta eima Missionary hmâpa ta Khazohpa ta miah a padua - diathlâ leipa ta Mararâh châta eima theina hawhta hria lymâ suh u.”

“Khizaw liata alyna aki vei, a sia pakipa y hra ma pi. Bei thieh a vaw pihpa Bei Zisu a hneipazy deikua alyna kipa ama hmô tyh. Chavâta apanawh tah, Ano lâ aheihpa ta Krista ao thei a chhuahpa ta Ano nata azaona hnei a chhuah chyu awpa chhao ta Christmas nata Kôthiehpa alypa nata thapha kawpa ta hmâh chyu awpa ta khokheina ei cha hlâ ei” tahpa ta Christmas khokheina bie nata Kôthiehpa bietapa khochhih kawpa a reih.

Daihti chhâna liata zawpi ta Abeipa lâ alynabie reina thlahchhâna hneipa liata Puhpa C. Chehnei, Dy. Chairman ta a khawna thlahchhâna hnei ta, Rev. B. Beilua ta byhnâ awna hneipa ta programme he pachhâsapa a châ.

MADC ry liata Office zy cha atanoh tawhta atakô châta khaw chypa châ aw ta, târi 7 Nawh (January), 2025, Hrieheinoh liata pahy heihpa a châ aw.

ISSUED BY:

Information & Publicity Department

Mara Autonomous District Council

Siaha.