PRESS RELEASE
NO.44/2021
MADC ry liata MDC zy ta Pihnô Jeno Hlychho chhôhkhazy taokheina hnei
SIAHA, 31 Thlazoh, 2021, Hriaheinoh - Atanoh zâlâ dawh 2:00 PM kha ta Mara Autonomous District Council (MADC) ry liata Member of District Council (MDC) zy ta Puhpa L. Khaichyu, MDC, Siata biatuhpa pahrâna O, College Vaih-II liata Pihnô Jeno Hlychho (L) chhôhkhazy taokheina Programme ama hmâh.
Programme he Laki biatuhpa MDC Machâ T. Seido, Deputy Chief Whip ta Chairman châpa ta chhihtha ta, daihti thaona lâ liata Taokheina châta minute sâ 1 chhôh aduahmah ta achalihna (1 minute silent prayer) hneipa châ ta, he khai tawhta Chairman ta thlahchhâna a hnei pazi.
Amôbyuh biatuhpa MDC Machâ N. Zakhai, CEM ta "khitlypa nata khichhaipa eima châpa vâta, alei liata achhaihna biereipa a vaw byu ha tyh" tahpa reipa ta pavaosana (devotion) daihti a hmâh.
Siaha West-II biatuhpa MDC Machâ H. Sahlô ta taokheina châta hmosai piepa hlâna hnei ta, he khai tawhta Khazohpa bie tawhta thlahpalôhna bietapa reih pazi ta, "Khazohpa chhiesapa râh liata a pahrâpa eima châpa vâta nôpo pachârôna he kha eimâ tyh lymâ aw" tah ta, "he hawhpa daihti liata Khazohpa lâ khâcharâ aheipa ta, Ano liata apahniehpa ta vâ thlalôhna eima to aw" tahpa ta thlahpalôhna bie a reih.
Akhohpazy châta biereina chyupa daihti pahypa châ ta, he liata Chakhei biatuhpa MDC Machâ K. Hrahmô, EM (i/c Edu.) ta "atahmâ ta nôponazy a tyhpa ta cha ty hr'ei si la, noh hro lâ liata Abeipa hmia eima hmô ti ta eima riethei taona zydua â pai ha bâ aw" tahpa ta chhôhkha châta thlahpalôhna bie reih ta, Siaha North-I biatuhpa MDC Machâ Nahlô Solo chhao ta thlalôh bietapa a reih hra.
Chhôhkha lâ tawhta Siata biatuhpa MDC Puhpa L. Khaichyu, Pihnô Jeno Hlychho (L) avahpa ta biereina chyupa nata alynabie reina a hnei.
Taokheina programme he sawhkhâ SOP zyna chôta siekheipa châ ta, daihti chhâna lâ liata zawpi ta Bei thlahchhâna reipa ta programme pachhâsapa a châ.
Pihnô Jeno Hlychho (L) he thlâ hmiatuapa târi 8 July, 2021 kha ta a pahâ ta, MDC zy ama hrialâpa Puhpa L. Khaichyu nata a chhôhkhazy taokheina nata thlahpalôhna châta taokheina programme he taopa a châ.
ISSUED BY:-
Information & Publicity Department
Mara Autonomous District Council
Siaha.
