PRESS RELEASE

No.124/2020

 

 

SIAHA, 24 Thlazoh, 2020 – Atanoh dawh 11:30 Am liata Mara Autonomous District Council(MADC) – Advisory Committee on COVID-19 pachhuahpanohpa ta noh 1 chhôh ta Head Assistant (HA) nata Personal Assistant (PA) zy châta Agriculture Training Hall, MADC liata COVID-19 Awareness Campaign hneipa a châ.

 

Programme he Puhpa K. Beingiachhie, Sr. LAO nata Advisory Committee on COVID-19 ta chhihtha ta, Khichhai laipa châta Puhpa P. Sama, Executive Secretary hruapa châ ta, biereina chyupa a hnei. A biereipa tlâhpi viapazy:-

 

1. Eima râh liata COVID-19 hri a vaw y pathaopa ta pahnopa a châ pata nahta MADC Executive Committee chhao ta COVID-19 tawhta eimâ vaw boh thei nawpa ta a theina hawhta hmahla ta, COVID-19 adyuh nawpa ta MADC liata Senior Officer zy nata âmo abaokhâ tuh awpazy atlyh papuapa ta Advisory Committee on COVID-19 paduapa a châ. 

 

Advisory Committee on COVID-19 Member zy:-

 

Chairman - Puhpa K. Beingiachhie, Sr. LAO

 

Secretary - Puhpa BM. Khaimeichhô, Dy. Secretary (DPAR&P) 

 

Members:-

1. Puhpa Vabeikhaihmo Solo, SCO

2. Pihnô S. Lalmuanpuii, Dy. Secretary. (F &A)

3. Pihnô Patricia T. Azyu, SWO

4. Pihnô B. Ngiasô, Superintendent(GAD)

 

2. Mararâh chhôh liana heta Village Council sâ 93 y ta, eima population cha 64,000 hleita a châ. 2011 Census tawhta atanoh taihta eima population â kaw pôhna he reikhi pha vei. 

 

Chavâta eima sapa châta hmo pha leipa, pa-ô-pazy liata eimâ sohsi awpa byuh ta, sawhkhâ bie zy chhao reingiah kawpa ta eima zyh lymâ awpa apeimawh. 

 

Mara chyhsa eima chyhtupa vâta Mara chanô nahzy ta atahmâ tawhta cha saw ahluhpi sa lymâ awpa ta ei châ haw ei. 

 

3. Atanoh Programme liata avaw hlao penawhzy ta Resource Person nahzy tawhta mania ama pachupa awpazy he apha kawpa ta eima nathlie awpa ta ahaw pi ta, COVID-19 adyuhna liata phahnaih khei cheingei awpa ta khokheina eicha hlâ ei.

 

Puhpa B. Luaha, Vice Chairman (Plg.) chhao, he Programme liata ahlao ta, biereina chyupa hnei awpa ta hruapa châ ta; Advisory Committee on COVID-19 zy ta he hawh ta Programme ama pachhuapanohpa he reithai tlâh ama châ zie reih ta, Programme avaw hlaopa zydua ta athôhkheina hnei chyu awpa nata mo hropazy pachupachhuah thei awpa taihta phahnai ngiah kawpa ta achhâna taihta ahlao chyu awpa ta khokheina hlâ ei ta, pasyupalina bie pha kawpa reina a hnei hra.

 

He COVID-19 Awareness Campaign he MADC ry liata HA nata PA zy châta taopa châ ta, sawhkhâ bie hawh ta manôh 25 hlâ hluh via leipa ta ahlao awpa ta pachhuahpanohpa châ ta, HA y leina Department zy tawhta vyuhtuapazy ta amâ hlao hra. He nahzy he ta ama department chyu liata hmahlana ama hnei pazi awpa nata Advisory Committee on COVID-19 thla patlô tuhpa châ awpa ta hnabeiseihpa ama châ. 

 

Ary liata palâsapazy he atanoh Programme liata Resource person zy ama châ:-

 

1. Pihnô S. Lalmuanpuii, Member, Advisory Committee on COVID-19.

2. Puhpa Vabeikhaihmô Solo, Member, Advisory Committee on COVID-19.

3. Puhpa BM. Khaimeichho, Secretary, Advisory Committee on COVID-19.

 

Resource person zy he ta Computer tawhta Powerpoint Presentation hmâpa ta Programme avaw hlaopazy hnoh ta COVID-19 tawhta eimâ vaw boh thei nawpa liata tao awpa nata tao lei awpa peimawhpazy pachuna hnei ei ta, sawhkhâ bie puapazy nata MADC Advisory Committee on COVID-19 tawhta COVID-19 hri chichhihpa tawhta avaina châta Circular a puapapazy pachâ peimawhpa ta zyh chyu awpa ta ahawna chhao ama tao hra.

 

MADC Advisory Committee on COVID-19 zy he ta COVID-19 tawhta eimâ vaw boh thei nawpa ta hmah vaw la lymâ ei ta, atanoh taihta thatlô kawpa ta hmahlana siekhei lymâpa a châ.

 

ISSUED BY:-

Information & Public Relations Department

Mara Autonomous District Council

Siaha.