PRESS RELEASE 

NO.1/2026

Siaha, târi 7 Nawh, 2026 (Pakhynoh) - Atanoh dawh 11:00 AM liata MADC Office Re-opening Programme, 2026 cha Golden Jubilee Hall, MADC liata ahmâpa a châ.

He programme he Puhpa, K.Vanlalliana, Executive Secretary, MADC ta chhihtha ta, KHB Nuhby 30 na 'Hy Kazohpa miah baotuhpa' Zawpi ta sana hneikhai tawhta Rev. Jimmy F. Sachai, Moderator Elect, ECM Assembly ta Bible,Thatihpha Zawhana 14 :6 reina hneipa ta Abeipa hnohta apavaosana thlahchhâna a hnei.

Puhpa M. Laikaw, Hon'ble CEM, MADC ta biereina hneipa ta, " atamy ta devotion daihti miah ahmâpatuhpa, MADC liata eihrialâhpazy , MADC liata Officers nata Staffs zydua Kô 2026, kô thiehpa anaohna eima Beipa Zisu Krista mohta cha hlâ ei na ta. Kô 2025 chhôhta Staffs miah siesaipazy eima zydua vyuhpa ta taokheina palâsa na ta, ama siesaipa chhôhkhazy Abeipa ta ypâ ei sala thlalôhna pie mawh sy. Kô 2026 liata eima raihria chyu pazao heih thei awpa ta tlâna miah pietuhpa eima Khazohpa hnohta alynabie reih chyu awpa ta ei châ haw ei."

"12th Term heta kô thôh vaw hmâh patlô ha pita kô kha ngâlâh he raihria hmeiseih n'awpa daihti eima hneipa vâta atakô cha thapi phiapa ta hriapasana kô châta eima hmâh awpa a châ aw,. Kheihawhpa party raita Council lia heta vaw sawhkhâ sihla eima maophaohna laichaipa nata tao awpa hmiatua chaipa cha eima Autonomy pabohsa ta palaiseihsa awpa he a châ. He kô thôh chhôh heta eima zydua hriaparaohna ta achievement chhao rei thei awpa a hluh kaw. A tlâpi viapa,   hmô theipa nata hmô theileipa liata hlaotlohna eima hneipa nata tlaita hlaotlohna hnei awpa ta eimâ hnabeiseihpazy cha; hlaotlohna eima hmôhapazy : Customary Law, Marriage & Divorce Act, Mara reih palaiseihsa viana awpa ta atlyh eihpa School sâno(Nohaotlâh nata Tiba 'B') liata Mara Reih achuna siekheipa a châ, Service Rules hmâpathaopa a châ, Grievance Redressal Committee paduapa a châ, Taxation Wing taopa a châ, Common Recruitment Board paduapana a châ hra, Administrative set-up a phavia n'awpa ta CAO Châkhei pahypa a châ, Consultation Committee on Officers Promotion paduapa a châ, BML tawhta Mara Reih Nuhby reizie thiehpa taopa a châ, Mara Pho hla hneipa a châ, Râh leilô sawzy châ ta râh pabohsa n'awpa ta LR&S Deptt. ta dâh pha kawpa a hnei ha, Village Council Power Deligation phaviapa pachhuahpanopa a châ, Cooperation Deptt tawhta Project taothei awpa a vaw châ ha, Golden Jubilee Hall, Students hostel Aizawl, Mara House Lunglei, Pala Tipo Mini Hydal Project, Forest Rest House - Tisi, Forest Beat Post cum Rest House - Tisopi, NIELIT Computer Study Centre, Hraisua Hills Park zy patlopa a châ hra, PWD tawhta Office nata Quarters Building repair khaipa ta fencing chhao ama taokhai ha hra, Agri Deptt ta Power Tiller raipa ta nah ta field liata hriapa ta Leipalie hmah pasiesana zy chhao hria pazao lymâ pa a châ hra.Projects tlaita patlô awpa ta hnabeiseihpazy; Cold Storage - Kaocho'E', Iahmai nata Chhiehrie chariehna - Tokalo, Mara House - Delhi. Projects tlaita hriathei awpazy; Students hostel cum Quest House - Aizawl, Multipurpose hall - New Colony, Market - Tipa 'V', 14- School Buildings, nata CM khokheina ta CAO Office Châkhei sana awpa chhao Lo 80, thlaita hmô awpa hnabeiseihpa a châ hra, Forest Deptt ta Laki nata Lodawh liata Forest Rest House sa awpa ta pachhuahpanoh ngâpa a châ hra.Awnano nata hmahla khohpa ta Hospital sana awpa chhao tlaita pasia thei awpa ta eima hnabeisei hra."

" Atakô liata cha Staffs paritheipa liata âsohsi theileipazy pachâthaina y khaolei p'aw ta, he hleikhô ta Office liata ahriapa thokha Sawhkhâna siekhei ngâpazy hriaparao thaileipa eima y tyhpa he phalei ta, sawhkhâ rai ahriapazy ta cha ahyrai sawkhâna asiekheipa cha tlâ hriaparaoh thai awpa he nama duty a châ. Achhâchaina ta ei châ haw khohpa ei cha Discipline phaviapa hnei awpa, Office adaihti ta liata kiah ta zâlâ chhao office bâh daihti tlô cheingei awpa ta ei châ haw ei." tahpa ta CEM ta a biereipa a pachhâsa.

Atanoh ta programme âhlaopa zydua ta Abeipa hnohta alynabie reina, molei reihpha cheina, 2026 châta a hlâpathiehna nata apavaosana thlâhchhâ paraohna hneipa a châ.

Loisi Singers nata Laihsa FC. Siteite zy ta hla ta Abeipa reithai ei ta, Zawpi chhaota KHB Nuhby 386 'Khazohpa ta einâ chhi tyh' ta Abeipa ama reithai hra. Rev.T. Salaw, SES, ECM Assembly ta Byhnâ awna hneita, daihti pachhâpa a châ.

ISSUED BY:

Information & Publicity Department 

Mara Autonomous District Council 

Siaha.