PRESS RELEASE

NO.01/2025

SIAHA, 7 Nawh, 2025, Hriaheinoh - Atanoh dawh 11:00 AM kha ta kô 2025 châta Mara Autonomous District Council (MADC) office re-opening programme 2025 cha MADC Golden Jubilee Hall, MADC Complex, Siaha liata ahmâpa a châ. He daihti he Chairman Puhpa K. Vanlalliana, Executive Secretary, MADC chhihthana ry liata ahmâpa a châ.

He daihti liata Puhpa M. Laikaw, Hon’ble CEM, MADC ta biereina daihti hmâh ta, atakô 2025 liata cha office kiana kyh liata Regularity & Punctuality pachâ peimawh via heih awpa ta pasyuna bie reih ta, kô parohpa liata eima hrialâhpazy nahta eimâ tah thai leina nata eimâ dyh thai leipazy a y pathlei khiah atakô liata siesai ei si la, eima hrialâhpazy ahnawtina hnei leipa ta eima hmia liata hria awpazy cha azipa palôh phaopa ta hria lymâ si la, eima hyutuhpazy rei angiah si la, hmâ tlâh eima châ viana kô nata byhnâ eima tô ko vaw châ sala tahpa khokheina bie reih ta, Hriatuanoh maih liata devotion eima hnei tyhpa hneipazao lymâ awpa ta ahawna tao ta, “Missionary nahzy hmâpa ta Khazohpa tluapapuapa keimo Marapasawzy pi cha sapa nata thlahpa he pachhaih thai awpa châ lei pi ta, chavâta Awnano office liata hriapazy hawh tlai ta MADC office he vaw pathaih sala tahpa khoh pi ta, parithei taopa officers nata staff nahzy mohpazina hnei pazao lymâ eimâ chhuah” tahpa a reih.

“Phahnai ngiahna vâta arana daihti a y aw, Mararâh châta tiama papua via lymâ awpa ta ahaw pi ta, promotion & regularisation zy chhao eima theina hawhta eima moh lymâ aw. MADC ry liata officers & staff nahzy he, he râh leilô ahneituhpa châ pi ta, State & Central Government ry liata officers nata staff nahzy hlâ ta eimâ hnai viana y leipa ta, âmo nahzy hriaparaohpa ta eima râh châta phahnai ngiah awpa ta eimâ haw” tahpa reih ta, MADC ry liata hriatuhpazy cha kô 2025 eima kaw sie lymâ awpa liata Isai 43:1 bie hawhta china hneilei awpa ta pasyu ta, Khazohpa liata apahniehpa nata angâchhâpa ta he kô thiehpa he keih chakâ tah, râh zawpi châta byhnâ nata chhaichhi phahnaipa châ awpa ta khokheina sâh chaipa a hlâ ei. 

Puhpa N. Viakhu, Hon’ble Chairman, MADC chhao biereina chyupa daihti hmâh ta, “Kô thiehpa liata cha tha thiehpa tlai ta pathaopa ta, rai ta nâmo a chatluapa hâ thlâh leipa ta, nâmo ta rai nama tlua awpa a châ. 2024 liata Achievement report zy mopa ta HoD zy hmahlana a pha kaw no ta, kho a khi leinazy a y thei aw aw. Atakô he thapi phiah via ta apaphi via awpa ta a pasyu pi ta, keimo he MADC kyh a pachâtuh awpa eima châ” tahpa reih ta, Officer nata Staff zy cha kô 2025 liata tiama papua via heih awpa ta pasyuna bie pha kawpa a reih.

Rev. K. Laichhua Azyu, Moderator, ECM Assembly ta Philipi 4:8-9 reina nata thlahchhâna hneipa ta devotion daihti hmâh ta, Loisi Singers, ECM College Vaih zy ta pahyna hla pha kawpa ama sa. Laihsa HC. Teresa Ngianô, Mara Idol nata laihsa Pricilla Notlia, Mara Idol Top 7 zy ta programme likawh liata hlasapa ta zawpi ama palôhpahawh.

Daihti thaona nata daihti chhâna liata Mara Krizyhla Hlabu tawhta "Khazohpa ta einâ chhi tyh" nata  "Hy Khazohpa miah baotuhpa" zy zawpi ta hlasana hneipa châ ta, Abeipa liata apavaosana nata ahlâ pathiehna hneipa ta zawpi thlahchhâna hneipa a châ hra.

Daihti chhâna liata Rev. K. Vabeinochô, Moderator Elect, ECM Assembly ta byhnâ awna hneipa ta MADC office re-opening programme he pachhâsapa a châ.

ISSUED BY:

Information & Publicity Department

Mara Autonomous District Council

Siaha.