PRESS RELEASE

NO.131/2022

SIAHA, 29 Thlarâh, 2022, Pobienoh – Atamy dawh 11:30 Am kha ta Land Revenue & Settlement (LR&S) Department, MADC ta New Siaha Assam Riffles yna lâtlei kiapâh liata Puhpa Lengerha Tipâh (Water Tank) cha pasaina y leipa ta a râhri khô lâ a tao raruah vâta ama parao.

He Tanky paraona rai he Puhpa Pheiki Solo, Senior Revenue & Settlement Officer (Sr. R&SO) chhihthana ry liata Backhoe Loader (JCB Company taopa) hmâpa ta hriapa châ ta, MADC LR&S Department ry liata Officers nata Staff, atanoh office akiah theipa zydua ta tlâhrai hriapa ta ama puapakhy.

Puhpa Pheiki Solo, Sr. LR&SO chata reih ta, “atanoh liata eima hmotaopa he eima khoh kaw vâta ataopa châ lei pi ta, mopakha ta dâh nata phôh za lei kawpa ta â piena kyh liata pei tah pi ta, eima hyutuhpazy pasaina nata pahnokheipa ta ataopa eima châ; MADC ta dâh nata phôh hnei pi ta, he dâh nata phôh zachhina pabohsa awpa he ta Department ta eima theina hawhta eima hria lymâ aw” tahpa ta a reih.

“LR&S Department pasaina nata paryhsana leipa ta cha ahy hmahta lâthlôh chadienazie ta O tôh bô lei awpa châ ta, tanky, ie-o nata vao-o, fencing zy chhao pasaina leipa ta cha chyhsa O nata zawlâ chadienazie ta ahy hmahta tao raruah lei awpa ta zawpi eimâ pahnosa pâ hra. Khazohpa ta ti nata râh miah a piepa Mararâh pabohsana kyh liata LR&S Department he ta riahpha kawpa ta hmodopa liata eimâduah lymâ aw,” tahpa ta reih ta, atanoh liata hmo tlôpa he reingia leina vâta châ ta, atahmâ tawhta cha, he hawhpa hmo he a tlô khao lei nawpa ta zawpi chhao ta dâh nata phôh zyh lymâ awpa ta a hawna a tao hra.

Puhpa Pheiki Solo chata, ngiapâtuhpa châ chyu pi ta, Land/Building Tax zy chhao âdo kawpa ta pie lymâ awpa ta ahawna tao ta, “Km. 1000 sq. hleita ngâlâh râh eima hneipa Mararâh, Khazohpa ta miah a piepa pabohsa lymâ awpa he LR&S Department biepi chaipa a châ” tah ta, “pabohsana kyh liata zawpi chhao ta tha miah patlô tah, miah deichhy lymâ awpa ta ei châ haw ei” tahpa a reih hra.

Puhpa Lengerha he ta ama râh tawhta feet 2 nata khophie hleita khô lâ liata ti sona he tao ta, LR&S Department officials – Survey officer nata Surveyor zy ta tao lei awpa ta ei hluhpi ama chho hapa chhao ta a tao raruah vâta he hawhta atanoh liata ama paraopa a châ tahpa, Puhpa Pheiki Solo, Sr. R&SO he ta a reih hra.

ISSUED BY:

Information & Publicity Department

Mara Autonomous District Council

Siaha.