PRESS RELEASE

NO.14/2026

SIAHA, Târi 11 Hmypi, 2026, Pakhynoh - Atanoh dawh 12:00 Noon khata District Level Fire Prevention Committee, Siaha pachhuahpanohpa ta Fire Prevention Week-2026 cha Forest Conference Hall, MADC liata pahyna daihti hmâpa châ ta, Puhpa Tiahlei Syuhlo, EM (Forest) MADC, Siaha cha khichhai Laipa(Chief Guest) châpa ta daihti a hmâkhei ei.

Puhpa Abraham Beirazi Khithie, Addl.DC, Siaha ta he daihti he chhihtha ta, Puhpa Vabeikhaihmo Solo, CF, MADC ta Biehrai; Ryhpachaneina 11:12 reina hneipa ta Abeipa hnohta daihti pavaosana Thlahchhâna hnei ta,  ECM KTP Branch: New Colony Hlapy ta daihti ziehpa pahyna hla ama sa.

Khichhai Laipa Puhpa Tiahlei Syuhlo, EM(Forest) ta biereina hneipa ta,"atanoh programme liata âvawhlaopa zydua nama chôlia ta alynabie ei reih. Eima pahnopa hawhta Khizaw liata chhiena atlôpa hryta ahluhvia he cha Chyhsapazy pi eima sohsi leipa vâta a tlôpa a châ tyh. He vâna heta Râh nanonanopazy ta chhiena avaw tlô thei awpa tawhta avaihna chi nanonaopazy ama pachhuahpanoh tyh. Gov't of Mizoram chhaota chhiena a vaw tlô thei awpa tawhta avaihna kao nanonanopa liata pachhuahpanoh hrata, cha hry liata a peimawh ngaita pa miakha cha; Fire Prevention Committee , 2000 liata a vaw paduapa he a châ. Kô tochhieh ta 9th -28th, February likah liata Fire Prevention Week he Biepi hneipa ta ahmâh tyhpa a châ. He mei kâpa tawhta avaihna siekhei tyhpa he kho a khi hra vei sala, eima hmahlana kao hluhpi liata hlaotlohna eima hmô hrapa ta ei pahno."

"Atanoh programme liata âvawhlaopazy eima Râh liata Thoti, Râhmâ, Râhsa nata Pazu Pavaw pabohsana he Forest Department,Fire Department nata VC nah tao awpa dei châ leipa ta, eima zydua maophaohna na a châ e tahpa he athiehpa ta eima pahno heih awpa he a pha kaw. Marapazy pi he kao nanonanopa liata hmâhsiena hnei lymâ pi ta, he ta a châ no ta, Râhmâ nata Râhsa pabohsana kyh lia deikua eima hnai kaw chy. Atanoh taih heta Meithei achaba tah Râhsa, Pazu Pavaw ka awpa ta âkhiepa nata Mei liata âsohsi theileipa eima hluh ngaita chy. Scientifically proven chhao yleipa ta 'cha pasana châta cha Râhsa cha apha e' tahpa ta Râhsa liata eima pasi chaipa Parih chhao thieh ta eima nie khoh thlâhpa he a phalei kaw. He vâna heta moto ta eima theina kao liata pabosahna rai he eima hria chyu awpa abyuh hmeiseih. Ahraohrâ leipa ta Râh eima pakâ leina awpa ta Sahdô nata Lyu rao daihti taipa kholeipa ta, meilâ a pha kawpa ta phipa ta eima rao tyh awpa a châ. Awnanopa nata NGOs chhaota eima programme liata Thoti nata Râhsa pabohsana kyh he eima reih hluh awpa nata apachuna siekhei awpa he âdaih kaw bâ." 

"Keima he Thotlâ liata a laiseihpa ei châpa vâta Râhsa, Pazu Pavaw sazy he pahâh tah kawpa ei châ, cha a châ no ta, EM(Forest) ei vaw châna rakha tawhta atanoh taih heta he Râhsazy he nie khaona. Ei theina zydua papuapa ta a pakhâna rai he ei hria hra. Marasaw he rei ângiahpa hluhpi eima y nota rei ângiahleipa hluhpi eima ypa he a pei kaw. Atanoh taih heta dâh hawhta patupa ta hriena eima piepa chhaota apathleih theileipa ama hluh kaw chy. He nah he ama pathleih theina awpa ta chhopasao viata eimaThlahchhâna liata chhao Thlah chhâkhei tyh awpa ta atanoh programme âvawhlaopazy ei cha haw ei. Ei châ ly kaw ei." tahpa ta Khichhai Laipa ta a biereipa a pachhâsa.

Puhpa Jimmy N. Ramdina, DCF, MADC ta report piepa ta,"zâhkô (2025) liana khata Siaha District chhôh liata râh kâpa pahnopazie cha 175 Hectares châ ta, râh apakâ hnôhchaipa khih cha Supha khih a châ. Râh pakâ lei awpa ta avaihna Awareness campaing hnei tyhpa cha khito liata siekhei lymâpa châta, atakô(2026) Fire Prevention Week liata _"Hmohrohneipa torai pahrâna nata ti pathaipa miah pie tuhpa râhmâhpazy mei kâpa tawhta pabohsa teh"_ tahpa biepipa hmâpa a châ. Atakô he târi 28th February, 2026(Last date) hlâta Sahdô rao khai awpa tahpa châ ta, târi 15th March, 2026(Last date) hlâta Lyu rao khai awpa châ ta, Daihti taipa(Last date) khôlâ ta Sadô tlyma Lyu tlyma a raopazy cha tlaw thykha(Rs,10,000/-) taihta pacheisa theipa a châ," tahpa report a pie.

Laihsa J.Vahneiso ta Fire Prevention Week 2026 Inauguration Programme âhlaopazy pahnie kawpa ta hlasapa ta a palôpahawh ei.

Puhpa T. Beihronga, DCF(W&P),MADC ta vote thanks reina hneita, Paw Thlahchhâna(Lord's Prayer) reiparaohna hneipa ta daihti pachhâpa a châ.

ISSUED BY:

Information & Publicity Department

Mara Autonomous District Council

Siaha.