SIAHA, 5 Pachawh, 2023, Pakhynoh - MADC Environment & Forests Department, Siaha zy ta 1st April 2023 liata râh akhiepa manôh pa 6 zy tawhta ama patupazy cha dâh pasai leipa a châna hawhta atanoh kha Puhpa Tiahlei Syuhlô, EM i/c E & D Department ta Forest Check Gate, Siahatlâh liata mei ta a rao.

EM zachhihpa chata “dâh pasai leipa ta a tao raruah tyhpazy he eima râh hmiahaopa ama châna hawhta râhsa pabohsa awpa ta hmah eima la haino ta Râh akhiepa eima y thlâh tyhpa he pei hmeiseih ta, he hawhpa hmo taopa nata ataopazy he eimâ dyuh lymâ aw tahpa pamosa nawpa ta atanoh he mei ta eima rao” tahpa a reih.

He manôh pa 6, dâh aparaopazy he New Siaha East-II liata apahrâpazy châ ei ta, The Wildlife Protection Act 1972 nata Arms Act 1959 hmâpa ta hrie awpa ta Police zy ta Case taopa ha ei ta, atahmâ he District Jail liata patâh haipa ama châ.

He dâh aparaotuhpazy he Rs.25,000/- pacheisa theipa ama châ hleikhô ta Lô-o (Jail) liata kum 3-7 chhôh patâhsa theipa ama châ.

(News & Picture Source: Evelyn Chozah, DDK Siaha).