PRESS RELEASE

NO.113/2022

 

SIAHA, 10 Thlarâh, 2022, Pachynoh - Târi 5.9.2022 pa ta Tipi Ferry liata raihriana su Beinô chavah liata apiepasi hapa St. B. Rozamliana, kô 29 (S/o Puhpa B. Lalhmingliana, Tipi Ferry) ri tluana rai cha pazao lymâpa ta â piepasi tawhta atanoh he a noh 5-na a châ haw.

 

Atanoh târi 10.9.2022, Pachynoh he ta MADC CEM Puhpa H. Malvina nata Dy. CEM Puhpa HC. Lalmalsawma Zasai nata Puhpa HC. Biakcheuva, EM (Forest), Puhpa ST. Vanmalsawmliana, EM (Sports) zy ta ri tluana su nata vâdua atyhpa chhôhkhazy ama tly.

 

Ri tluatuhpazy buakheina su Tipi Ferry Bazarshed liata RV taopa ta Amôtlâh MTP Sub HQ chhihthana ry liata hmosai piepa apiekhohpazy nata ri atluapazy châta apatohpatiana sianô kawpa taopa a châ. 

 

He su he ta Puhpa H. Malvina chata biereina hnei ta, “Hehawhta chhiena rarôh y kawpa Mararâh ta eimâ tyhpa he pei hmeiseih ta. Vâduana atyhpa chhôhkhazy MADC ta taokhei hmeiseih ta, he ri tlua chhôh ta peimawhpa nata angiahpa zydua pachâ awpa ta MADC sawhkhâ ta amâ thlâh ha ta, Biatuhpa siepahliepa ta peimawhpa zydua athlachhie leipa ta vaw reih lymâ awpa ta châ haw ei na ta. Ri atluapa thyutlia nahzy - MTP Gen. HQ, Sub HQ nata Branch zydua nata Central YLA nata Branch nano nanopazy chô liata alynabie ei reih.  He vâduana vâta pathipalôh tawhta saiheina hneipa ta hmosai piepa apietuhpa zydua hnoh ta alynabie ei reih,” tahpa ta a reih. 

 

He bia liata biatuhpa MDC Puhpa HC. Lalmalsawma Zasai, Dy. CEM, MADC chhao ta biereina daihti hmâh ta, “He vâduana eimâ tyhpa kyh liata MADC liata ei hrialâhpa Executive Member zy, MDCs zy, LADC lâ liata CEM, Chairman nata a hrialâhpa EM, MDCs zy hleikhô ta MTP Gen. HQ, Sub HQ nata Branch zydua nata Central YLA nata Branch zydua hnoh ta alynabie reih hmeiseih na ta. He vâduana eimâ tyh no ta tilaipa vâta Rairuna hro eimâ tyhpa Tisôpi chavah Hleidy, tilaipa ta miah a phaopa hapa vâta ri tluatuhpazy buana lai kawpa eimâ tyh thei awpa vâta achatlie kawpa ta Hleidy dao awpa ta miah patohpatiapa tuhpa Puhpa Lalchamliana, Home Minister chô liata, palôh hmeiseihpa ta alynabie ei reih” a tah hra. 

 

St. B. Rozamliana ri tluana kyh liata tahmâ he chyhsa veiseihpazy ta sôh nata hmo lâta hmosaipiepa atlohpakhypa cha ₹.2.00 Lakhs hlei mâ a tloh pakhy ha bâpa a châ.

 

ISSUED BY:

Information & Publicity Department

Mara Autonomous District Council

Siaha.