PRESS RELEASE

NO.30/2025

SIAHA, 24 Pamih, 2025, Hriatuanoh – Atamy dawh 10:30 AM pa ta Mara Autonomous District Council (MADC) Budget Session 2025 cha MADC Session Hall liata Puhpa N. Viakhu, Chairman chhihthana ry liata pathaopa a châ.

Chairman ta Khazohpa Biehrai Pathaihpa Rawma 5:10-11 reipapuana hnei ta, he khai tawhta Chairman ta a raopa Puhpa HC. Lalmalsawma Zasai, 15-Amôtlâh biatuhpa MDC ta MADC Budget Session 2025 Khazohpa lâ pavaosana thlahchhâna a hnei.

Chairman ta Panel of Chairman châta Puhpa Albert TT. Sachu, 07-Chakhei biatuhpa MDC nata Puhpa ST. Vanmalsawmliana, 25-Siaha West-II biatuhpa MDC zy raona nata phuahna a hnei.

Atakô Budget Session noh 4 chhôh ô awpa, târi 24, 25, 26 nata 27 Pamih, 2025 nohzy liata hnei awpa he my dawh 10:30 AM tawhta 4:00 PM taihta hnei tyhpa châ aw ta, dawh 1:00 PM nata 2:00 PM likawh liata apahâna daihti (Recess) hmâ awpa a châ.

Atahmâ Session liata unstarred question (ropa ta achhy awpa) sâthôh (3) nata starred question (pakah ta achhy awpa) syno nata sâno (22) y ta, atanoh châta my râh liata starred question sâ 6 hiahrina nata achhyna hneipa a châ. Zâlâ daihti liata Puhpa M. Laikaw, CEM, MADC tawhta Budget Speech 2025-2026 nahthliepa ta atanoh châta daihti pachhâsapa a châ.

Kô 2025-2026 châta MADC Budget Estimate Rs.23,275.49 Lakhs cha târi 27.03.2025 liata Discussion nata Passing hnei achhuahpa a châ.

ISSUED BY:

Information & Publicity Department

Mara Autonomous District Council

Siaha.