PRESS RELEASE

NO.30/2022

SIAHA, 24 Pamih, 2022, Pobienoh – Noh 3 chhôh ôpa Mara Autonomous District Council (MADC), Budget Session 2022 cha atamy dawh 10:30 Am pa ta MADC Session Hall liata a noh 3 nawpa ta pathaopa châ ta, myrâh liata Puhpa K. Pawhnie, Deputy Chairman ta Chairman châpa ta chhihtha ta, zâlâ liata Puhpa H. Sahlo, Chairman ta Chairman châpa ta a chhihtha.

Myrâh liata Starred question sâ 7 hiahrina nata chhyna hneipa châ ta, zâlâ lia he ta MADC Budget Estimate 2022-2023 reipahmaohna hneipa a châ.

Kô 2022-2023 MADC Budget Estimate Rs.17,468.99 Lakhs cha member zy ta lôhraoh kawpa ta pass pa a châ.

Atahmâ Session he 11th Term MADC liata a chhâ nawpa a châ vâta List of Business a chhâ tawhta Chairman ta member zy lâ alynabie a rei hleikhô ta House leader nata Opposition leader zy châta biereina daihti pahy ta, Amôtlâh biatuhpa Puhpa HC. Lalmalsawma Zasai, Opposition leader ta biereina hnei tua ta, Amôbyuh biatuhpa Puhpa N. Zakhai, House leader ta pazi ta, Puhpa H. Sahlo, Chairman nata Puhpa K. Pawhnie, Deputy Chairman zy hnoh ta 11th Term MADC Session ama chhihthana liata ama sona nata novâhna zy vâta apha kawpa ta session ama siekhei theina liata alynabie reih ei ta, a eihpachaipa ta politics tawhta apahâ chy awpa khona a hneipa Puhpa H. Sahlo, Chairman, hnoh ta Mararâh châ nata MADC châta a hriapasana zydua liata alynabie reih ei ta, hmialâ a sie lymâ nawpa liata khokheina sâh chaipa ama hlâ.

MADC Budget Session 2022 he Puhpa H. Sahlo, Chairman ta atanoh dawh 3:58 Pm liata daihti taihpa y leipa ta a pachhâsa.

Atahmâ session liata unstarred question (ropa ta achhy awpa) sâ 4 nata starred question (pakah ta achhy awpa) sâ 22 y ta, business hours chhôh liata a zydua ta hiahrina nata achhyna hnei khai theipa a châ.

ISSUED BY:-

Information & Publicity Department

Mara Autonomous District Council

Siaha.