(9.3.2018, Friday)
Atanoh liata Mara Cha-ypi rônah chaipa ‘LYUVA KHUTLA’ ahmâh awpa ta he su liata vaw pôhpakhypa zydua nata O lâ liata TV nata Internet siepahliepa ta maniah avaw mohtuhpa zydua hnoh ta ‘SAMAW’ pha chaipa cha hlâ ei.
Eima manô mapaw zy ta khati daihti tawhta ma he Lyuva Khutla he amâ vaw hmâh pathao tahpa vaw pahno chho hra vei sih la, he daihti he eima manô mapawzy khata tlô awpa nata ahmâh awpa amâ ngiatiah lei chaipa cha-ypi a châ tahpa deikua asia kawpa ta eima pahno thei.
Manô mapawzy kha lyu taopa ta nie atluapa nata khihsatôhtuna liata achahra ngaitapa, ahyhmah ta ychakhyh thlâh ha leipa ta nohchareih nohsa vâsua hry liata ku raihriapa chyhsa ama vaw châ.
Kôkha chhôh niebaw tluana châta ama hmâ chaipa lyuzy cha riethei thachhâ kawpa ta ama va khai tawhta lyu rao daihti a tlô hlâ, daihti huhiehpa ama hneipa daihti chyupata he apalypa-uasana daihti, he Lyuva Khutla eima tahpa ahmâh n’awpa daihti châta ama vaw hmâh tyhpa a châ tahpa eima pahno.
He Lyuva Khutla he Marapa haosai liata cha apha chaipa nata amâ ly chaipa tah thei’pa châ ta. Reizie thokha liata cha he daihti Lyuva Khutla amâ hmâh phatu hapa vâta nata ama pahâh tu hapa vâta khih thokha cha lyu raona châh chhao pahno khao leipa ta vâsuapa ta apachhai hapa, lyu tao hmâ khao leipa ta a ypa khih chhao ama vaw ypa hawhta reipa a y hra. A y zie cha nohkha ngâlâh châ leipa ta, noh hluhpi tlai, âzaopa ta ama vaw hmâh tyh tahna a châ.
Chatlupo ta manô mapawzy ta ama vaw pasôpa cha khizaw asosâh lymâpa vâta daihti khachâ rakha ma cha ahmâh khao leipa ta eima vaw y haw. Atahmâ thyutlia chhâ liata pathieh heihpa ta he daihti LYUVA KHUTLA ahmâh lymâ thei heih awpa a vaw châpa he aly ngaita kaw na ta, he Lyuva Khutla ahmâh thei awpa ta pachâna, tha nata zâh ahmâhtuhpa zydua chô liata alynabie ei reih hmeiseih.
Atanoh liata he Lyuva Khutla eimâ hmâh daihti liata Mara lâ chi nano nanopazy palâsapa ta, he Siaha Tlyliah liata eima vaw moh awpazy he, eima pasô thai kaw awpa pha aw ta, thyutliapazy chhaota eima lâ chi nano nanopazy he thai khai eimâ chhuah hra awpa a pha kaw aw. Eima chi nata pho abohna nata laiseihna kyh liata chhao phahnaina miakha chhâ a hnei thlyu aw tahpa ei ngiapâ hra.
Chipho uhthei viapazy ta ama chi nata pho taozie pasô ei ta, cheihchalo via lymâ awpa amâ chhuah tyh tahpa Museum nata Cha-ypi(Festivals) ama hmâ zie zy tawhta eima pahno thei. Keimo Marasawzy chhao, Khazohpa ta chi nata pho ta maniah padua ta, chi hropazy nata taozie no-eihpa maniah pahneisa ta, cha zawhzi ta kô 100 hlei asie hapa liata Krizyhpa Missionary zy ta tluapapuapa châ pi ta, Ryureina no-eihpa Autonomous District Council taihta eima vaw hnei thei haw.
He eima Culture nata Tradition zy he pabohsapa ta, eima cheihchalo via lymâ awpa he thyutliapazy ta eima maohphaohna a châ tahpa pahnopasiapa ta eima dady chyu liata chi nata pho châta keih eima chakâ lymâ chyu awpa ta ei cha pasyu khoh ei.
Khazohpa ta reih no-eihpa maniah pie ta, chi nata pho eihhrâhpa eima châna palâsatuh chaipa cha REIH no-eihpa eima hneipa he châ ta; atanoh he su liata vaw pôhpakhypa nata Marasaw zydua reih pabohsana nata palaiseihsana kyh liata a hriapasatuhpa nata cheihchalotuhpa châ chyu ei sih la, eima reih Literature palaiseihsana kyh liata chhao lôh miakha phaohpa ta bâlia a cha-ao chyu ei sih la, eima zydua ta tei khoh chyu ei suh u.
Achhâchaina liata, atanoh, Lyuva Kutla 2018 ahmâna noh liata, he su liata avypa zydua hleikhô ta Mararâh khito liata nata Marasaw su to nata râh to liata he eima cha-ypi pasô ta ahmâh tuhpa zydua hnoh ta alypa nata thapha kawpa ta ahmâh chyu awpa ta khokheina sâh chaipa ei cha hlâ ei.
Ei châ ly kaw ei.
(Admin, MNN)
