PRESS RELEASE

No.01/2023

SIAHA, 9 Nawh, 2023, Hriatuanoh – Atanoh my dawh 11:30 Am pa ta Mara Autonomous District Council (MADC) complex tlyhmia liata atakô 2023 châta MADC ry liata Office zy pahyna official re-opening programme ahmâpa a châ.

Pahyna programme he Puhpa K. Chhihrau, Executive Secretary, MADC ta chhihtha ta, Rev. VL. Ngaia Hlychho, SES, ECM Headquarters, Siaha ta Ryhpachaneina 11:10-12 nata Biesozy 16:1-12 Khazohpa Biehrai Pathaihpa reipapuana nata reipakhawna hnei ta, ECM Assembly vyuhpa ta MADC ry liata hriapa zydua kôthiehpa anaohna a hlâ. He khai tawhta kô 2022 chhôh ta MADC ry liata sawhkhâ rai hriapa miah apahâsai hapa manôh 7 zy taokheina hneipa châ ta, athipa chhôhkhazy châta Machâ P. Tluasa, SE (PWD) ta thlahchhâna a hnei.

Puhpa M. Laikaw, Hon’ble CEM ta kôthieh anaohna a hnei khai tawhta biereina hnei ta, Mara Missionary Rev. RA. Lorrain nah nôvah zy zawhzi ta identity base- biereina hnei ta, pa ta Khazohpa ta District Council miah a piepazy, District Council nata Awnanopazy he achhaih thai’pa eima châ lei vâta he spirit he khâ avao awpa a peimawh tahpa a reih.

Atanoh liata MADC Officers & Staff zy hmiakô liata CEM châpa ta a padua tuhpa Khazohpa nata a khokhei tuhpa a hrialâhpazy hnoh ta alynabie reih ta, MADC â vaw dua daihti tawhta nôpaw a vaw châ chiehpa zydua zana hlâ ta, ano ta a siekhei awpa sawhkhâna cha New Maraland tahpa padua â chhuahzie a reih. Atanoh taihta MADC eima chhihthana liata apha leipa zydua siesaipa ta kô 4 chhô a kaw sie awpa MADC liata Good Governance siekhei â chhuahpa a reih hra. He liata dâh nata phôh abei chai aw ta, adona (justice) ta su a hnei aw; corruption free sawhkhâ a y thei nawpata transparent aw ta, employee zy cha tovyuh dopa ama hnei chyu thei nawpa ta hmah la â chhuah tahpa a reih.

Political party colour hneipa ta phuh-lana y leipa aw ta, apathlua-paeihna y leipa ta nôkha saw hawhta employee zy mohôh â chhuah tahpa reih ta, eima Mara identity a laiseih lymâ thei nawpa ta Art & Culture Department nata Board of Mara Literature zy tha patlô lymâ â chhuahzie reih ta, Khazoh ngiachhiena vâta Marasawzy population eimâ pôh lymâ vâta MADC Opi palai byuh ta, biehneina lai viapa hiah awpa he atahmâ sawhkhâna ta Top Priority eima pie aw tahpa a reih.

CEM zachhihpa chata sô nata thih he ahmâ nawpa liata âdo kawpa ta hmâpa a châ thei nawpa nata achado kawpa ta hmâpa ta Austerity measures siekhei âchhuah tahpa a reih hra.

MADC ry liata sawhkhâ rai hriapa – Officers & Staff, Teachers etc. zydua MADC ahneituhpa palôh phaoh awpa ta ahawna tao ta, MADC he Marasawzy eih châ ta, azipa châna apahnopa ta miah adaohpa zawpizy chhao apha kawpa ta vaw deichhy awpa abyuh tah ta, office kia daihti nata adi daihti dopa avao awpa tah ta, duty chyu liata apha kawpa ta tao patlô lymâ awpa ta ahawna tao ta. Marasaw sawhkhâ raihriapazy, hlao hluhpi hnei tlôh ta, loan zy la ta, o lâ adi khei awpa a hnei leipa, management liata aphahla kawpa ama hluhzie reih ta, he kyh liata hmahla lymâ awpa âchhuahzie a reih.

Puhpa M. Laikaw, CEM zachhihpa chata MADC ry liata sawhkhâ rai hriapa zydua, kô 2023 liata Khazohpa tawhta byhnâ hluhpi to chyu awpa ta khokheina hlâ ta, byhnâ a awpa ei.

Daihti chhâna lâ liata MADC Golden Jubilee eima tlô thei vâta Khazohpa lâ alynabie reina, molei reihpha cheina, ahlâpathiehna nata kô 2023 châta apavaosana zawpi ta thlahchhâna hneipa a châ khai tawhta office pahyna programme he pachhâsapa a châ.

ISSUED BY:

Information & Publicity Department

Mara Autonomous District Council

Siaha.