PRESS RELEASE

NO.1/2022

SIAHA, 5 Nawh, 2022, Pakhynoh – Atanoh dawh 11:00 AM liata kô 2022 châta MADC ry liata office zy pahyna programme cha MADC Complex tlyhmia liata ahmâpa a châ.

Puhpa K. Chhihrau, Executive Secretary, MADC ta programme chhihtha ta, Rev. B. Beilua, Moderator, ECM Assembly ta Biehrai Pathaihpa Isai 60:1, Philemaw 1:11 zy reipapuana nata reipakawhna hneipa ta Devotion daihti a hmâh. He khai tawhta Puhpa N. Zakhai, CEM, MADC zachhihpa ta kôthiehpa bietana nata biereina a hnei.

Daihti chhâna liata kô 2022 miah tlôkheituhpa Khazohpa lâ alynabie reina, Molei reihpha cheina, Ahlâpathiehna nata atakô 2022 liata MADC Golden Jubilee eima tlôpa alynabie reina nata Golden Jubilee Celebration programme apha kawpa ta eima kaw hmâ thei nawpa thlahchhâna Topics zy hmâpa ta Zawpi ta thlahchhâ paraohna hneipa a châ.

Atanoh liata Puhpa N. Zakhai, CEM, MADC zachhihpa bierei tlâhpi viapazy:-

1. Kô 2021 siepahliepa ta kô 2022 miah patlôsa tuhpa eima Beipa Khazohpa hnoh ta alynabie ei reih.

2. Eima MADC 11th Term chhâna lâ eima tlô theipa he Khazohpa chhihthana vâ dei a châ; rairuna hluhpi a y vâta keima mo pakha pachâ ta cha eima Term he eima pachhâ thei nahta pangiasa leipa na ta, he hawhta term chhâna lâ eima tlô theipa he, eima thlahchhânazy miah chyh-ei tuhpa Khazohpa a y tlaina tahpa he keima liata a sia hmeiseih. Awnanopa nata Mararâh zawpi ta thlahchhâ miah nama bao tyh vâta alynabie ei reih hmeiseih.

3. Kô 2021 liata tiama kawpa ta MADC ry liata sawhkhâ rai a vaw hriapa zydua hnoh ta alynabie reih na ta, COVID-19 Pandemic nata rairuna hro hropazy y hra sa la, adaihti ta liata apha kawpa ta office hours chhôh liata rai hria ei chi ta, nama tiamana zydua vâta apha kawpa ta hlaozy la pi ta, nama zydua chô liata alynabie ei reih. 

4. MADC he Mararâh ta chhienoh phanoh, eima paza chaipa, â hnia chaipa liata a ypa, a pawti eima zy chaipa a châ; he hawhpa su peimawhpa liata ahriatuhpa sawhkhâ rai hriapa nama châpa he a ly a chhih ta, arônah ngaita kaw. 

5. Hebrai mozy 6:1 liata Krista bie thabypa chho khao leipa ta, machâ lâ pangai ei suh u tahpa ropa hawhta MADC kô 50 eima kaw tloh bâ awpa tawhta la pitlohpa eima châ ha bâ; kô 2021 hlâta kô 2022 he tiama viapa nata palôru kawh viapa Mararâh châta hria awpa ta ahaw pi ta, Marasaw, eima zydua ta he MADC liata ahria thai’pa châ ma pi; vâhnei chhih kawpa ta he Office liata ahria haipazy ei chi ta, pitlohna lâ pangai a chhuah chyu awpa ta ei châ haw ei.

6. Marasawzy pi he Pathaihna liata pitloh awpa eimâ pahla kaw. Christmas nata Kôthieh likawh liata MADC LAD Sweeper zy vaw chhuti ei ta, he daihti chhôh ta eima Siaha khihpi cha a puapa ta bie ta, a pei hmeiseih. Lâlai liata hna noh chakhyh thlâhpazy, pazô sâ chakhyh thlâhpazy, Waiwai etc. niena thy chakhyh thlâhpazy, Kuva nata hmo eima nienazy thy chakhyh khai thlâh pi ta, apuapa byh liata thy awpa achhuah leipa eima hluh kaw tyh. He kyh he, pitlohpazy chhao ta aphahla pi ta, Nô & Paw zy chhao ta eima sawnah eima chho via awpa apeimawh hmeiseih. 

7. Thâtihpha vâta Achuna liata thata hmahsie pi ta, pathaihna lia deikua eima hmahsie thei vei. Chavâta MADC Staff zydua chhâ he la, kô 2022 tawhta pathaihna kyh liata thata hmah la ei si la, lâpi liata a puapa eima hmô khiah achapia thlâh leipa ta, ku ta lapa ta apuapa byh liata thy thlah tua u; nawh rai rai aw vei ei chi; eima hmotaopa eima nawnahzy ta miah vaw hmô aw ei ta, âmo chhao ta miah amopâ aw ei ta, ama vaw tao cheingei hra aw. Pathaihna liata eima pitloh, eima uhthei via awpa apeimawh kaw bâ.

8. Chyhra hropa châta byhnâ châna kyh liata eimâ pasyu khoh kaw – tlâhleina nata ration daohna kyh liata rairuna atyhpazy amâ râhnaoh tua chai awpa cha Council Staff zy nama châ; kô 2022 tawhta chyhsa châta byhnâ châna kyh liata pitloh via tah, palôh pitloh phao via lymâ awpa ta ei châ haw ei.

9. Atanoh tawhta Office kiah pathao awpa eima châ vâta zâhkô hlâta pitloh viapa ta office ngai patoh via, bâ  hawh via awpa a chhuah ei si la, zâhkô hlâta ei puhpa/pihnô rei angiah via, hrialâhpazy hrialâh (cooperation) pha viapa tao lymâ achhuah awpa ta, he kôthiehpa liata keih chakâ awpa ta châ haw ei na ta, chahawhta eima tao khiah kô chhâna liata Khazohpa khopa taona chô ta, aly kawpa ta eima Khazohpa ta kô miah papua aw ta, he Council chhao he pitlohna hro liata kaw khaih aw pi ta, Golden Jubilee chhao y zie a hnei kaw thlyu na tahpa ei hnabeiseih. 

10. Kô 2022 he nama zydua ta khokheina ei cha hlâ ei, ei châ ly kaw ei.

MADC ry liata Office ypa zydua cha zâhkô 2021 Di 21 pa ta khawpa châ ta, atanoh liata pahy heihpa a châ. 

GAD OM No.12011/1/2021-GAD of 7th October, 2021 bie hawh ta myrâh 9:30 AM to 12:30 Noon taihta office kiapa châ ta, dawh 12:30 PM to 1:00 PM chhôh nohchhô thopi do daihti a châ. Zâlâ liata 1:00 PM to 4:00 PM taihta office working hours a châ. 

ISSUED BY:-

Information & Publicity Department

Mara Autonomous District Council

Siaha.