PRESS RELEASE

NO.115/2022

SIAHA, 13 Thlarâh, 2022, Hriaheinoh - Atanoh dawh 4:45 Pm kha ta Kiasie khih liata NGOs - MTP, MCHP & MSO Branch zy ta ama biatuhpa MDC Puhpa HC. Malvina, Hon’ble CEM, MADC cha a office chamber liata programme chyupa taopa ta palyupalihna nata ryuchâ hlâna daihti ama hmâh. 

Programme he Puhpa F. Beichatlai, Adviser, MTP ta chhihtha ta, alykheinabie nata khokheinabiezy a rei hleikhô ta pasyunabie pha kawpa chhao reih ta, MADC liata sawhkhâna a vaw sia tawhta saozy vaw châ laih ta, rairuna nano nanopa a vaw y laih vâta ama vaw hawh kawpa cha pei ama tah zie reih ta, CEM zachhihpa hnoh ta pachâthaina â haw. 

RA. Lorrain ta, “Mararâh notla lâ hmahsiena a vaw y aw” tahpa a vaw rei hapa cha Phura bia tawhta â thao hapa ta a pahnozie reih ta, Ti nata Râh he sapa ta chhihtha khai thei awpa a châ lei vâta Abeipa liata apahnieh tah, thlahpa râh lâ tawhta raihria pathao awpa apeimawhzie chhao reih ta, Abeipa nahta hrialâh awpa ta bieta ta, atahmâtahpa hlâta tiama viapa ta hria awpa nata Mararâh godown eima tah tyhpa Phura khih chhao a hmia panano thei awpa ta thlahchhâ ama bao lymâ aw tahpa ta Puhpa F. Beichatlai he ta pasyunabie pha kawpa a reih.  

Puhpa H. Mavina, Hon’ble CEM chata sao, sievaw aru chaina daihti liata riethei rairuna papeisa leipa ta Siaha lâ akhypa ta palyupalihna akaw hlâtuhpa Kiasie NGO zy chô liata alynabie reih ta, he hawhta a bia liata NGOzy ama veiseih palôhâhna he amopâ tlâh ama châ tah ta, ama ngiachhiena nata khokheina arônah tah ta, hiakha lâ deikua â ngiahma kaw tahpa a reih. 

“Bei dyuchhai liata atyupa ta Abeina lakho chhao ta Mararâh avao tah, mohôhna rai he a rônah kaw no ta, hlohlakho chhao eimâ kho pâ hra; zawpi nata chyhsazy hmô thei leina liata eima thizy a loh pâ ngâ kaw hra. Anodeikua he hawhpa rairuna eima chatôh ngâh lymâ thei nawpa ta thlahchhâ na bao awpa ta ei châ haw ei.”

“Bia châ nata party sâkha châ ngâlâh CEM châ leipa ta Mararâh zydua châta CEM ei châ vâta pathluapaeihpa hnei leipa na ta, tao theipa ei hneina liata cha bia zawpizy rairuna mokhei lymâ ei chhuah.”

“Tahmâhlâ khitlâh hro arao ngâhaipa he NGOzy ta tiama nama papua via lymâ awpa apeimawh hmeiseih. Atahmâ he Mararâh khito vaihto liata pari theipa ta miah â ngiahnaoh ngâhai; thyutlia hro a rao khiah Mararâh raona rarôh viapa a tlô thei awpa a châ vâta NGOzy pahnai ngiah kawpa ta nama tiama via lymâ awpa ta ei châ haw ei.”

“Bia zawpi deichhyna nata Awnanopazy thlahchhâkheina vâta maophyuh leipa ta keih ei châ lymâ aw tahpa hnabeiseih na ta,  atahmâ 12th Term MADC he thla 4 hleita a vaw sie chypa liata Khazoh ngiachhiena vâta eima MADC liata hlaotlohna thokha eima hnei haw, cha nahzy cha:

1. Dy. CEM post a y beih leipa hiah pi ta, eima hnei haw.

2. Opposition Leader châta Office eihrâhpa eima tao.

3. Mizoram sawhkhâ liata eima hiapa Order of precedence thiehpa miah taopa ei ta, MADC nôpawzy duahmo sâh viapa liata miah ama sopa haw.

4. Nominated MDC seat 3 eima hnei ngâhaipa cha Seat 1 hia baichhi pi ta, a hlao tloh ha ta, tahmâ seat 4 eima hnei thei haw bâ.

“Abeipa ta byhnâ thata mia pie ta, chi nata pho aboh nawpa nata Mararâh hmahsie nawpa ta hmahla awpa hluhpi eima hnei; nama thlahchhâna liata miah athei tyh awpa ta nama ngiachhiena ei châ haw ei.”

“Atanoh liata nama palyupalihna he ei phuh leipa hmo a châ, nama phana nata ngiachhienazy he keima ta châ thô palie thei awpa châ leipa na ta, atotaotheipa eima Khazohpa ta namâ ngiahna nata peimawhnazy lia maih ta byhnâ cha pie hri mawh ei sy” tahpa ta alyna biereina nata khokheina bie a hlâ ei.

Achhâna lâ liata Palyupalihna ryuchâ hlâna daihti hmâpa châ ta, MTP vyuhpa ta Puhpa C. Beizachhi, Vice President ta hlâ ta, MSO vyuhpa ta Puhpa Mara B. Syuhlô, General Secretary ta hlâ ta, MCHP vyuhpa ta Pihnô K. Nôngia, Finance Secretary ta a hlâ khai tawhta Puhpa F. Beichatlai thlahchhâ ta alykheina daihti pachhâsapa a châ.

Puhpa H. Malvina, CEM zachhihpa he Puhpa Beirôkhu Beitâ, I & PO, MADC ta a chakaochahlâ.

Atanoh pyly kha ta Kiasie MTP zy ta Agape Home (Amôbyuh Vaithieh) nata Kavary Healing Ministry (Siahatlâh) liata Tho tipa Pickup khophie raihrie hlâ ei ta, MTP, MSO & MCHP Kiasie zy ta Kalvary Healing Ministry liata Tho tipa Pickup khophie, Sahpha bag 2 nata phusâ Rs.3,000/- piepa ta ama lohpapua pâ hra.

ISSUED BY:

Information & Publicity Department

Mara Autonomous District Council

Siaha.